سپورتتىق مانسابىن قازاق كۇرەسىنەن باستاعان جامبىل وبلىسى سارىسۋ اۋدانىنىڭ تۋماسى اۋەلى دجيۋ-دجيتسۋمەن اينالىسىپ, الەم جانە ازيا چەمپيونى اتاندى. سودان الماتىدا دانيار قاسقاراۋوۆ ىرگەتاسىن قالاعان «الاش پرايد» كلۋبىنا كەلىپ, ارالاس جەكپە-جەكتى مەڭگەردى. 2019 جىلى اسۋ رەسەيلىك م-1 پروموۋشەنىنىڭ ۋاقىتشا چەمپيونى اتاندى. كەلەسى ماۋسىمدا قازاقستاننىڭ «نايزا» ۇيىمىنىڭ تەڭدەسسىزى دەپ تانىلدى. سول كەزدە «زۇلفيكار» (مۇحاممەد پايعامباردىڭ قىلىشى – رەد.) دەگەن جاناما ەسىمدى تاڭدادى. 2013-2024 جىلدار ارالىعىندا 22 رەت وكتاگونعا شىققان قانداسىمىز 20 مارتە جەڭىس تويىن تويلادى. 12 قارسىلاسىن ەسىنەن تاندىردى. ول تەك 2017 جىلى ءوزىنىڭ بەسىنشى جانە التىنشى جەكپە-جەگىندە داعىستاندىق تاگير ۇلانبەكوۆ پەن ازەربايجاندىق مەحمان مامەدوۆتەن جەڭىلدى. سودان بەرگى جەتى جىل ارالىعىندا قارسىلاس شىداتپادى.
ايقاس الاڭىندا اتوي سالعان اسۋ الماباەۆ بىلتىر UFC-مەن كەلىسىمشارتقا وتىردى. 5 تامىزدا نەشۆيلدە تۇساۋكەسەر كەزدەسۋىن وتكىزگەن قازاق فايتەرى يامايكالىق ودي وسبورندى قىلقىندىرىپ تاستادى. بيىل مايامي مەن ەنتەرپرايزدا اقش-تىڭ قوس سپورتشىسى سي-دجەي ۆەيگارا مەن حوسە دجونسوندى جەڭدى. سودان «زۇلفيكاردىڭ» بەدەلى كۇرت ءوستى. كۇنى كەشە عانا اتالعان پروموۋشەن باسشىلارى الماباەۆتى ماتەۋس نيكولاۋعا قارسى شىعارۋدى ءجون كوردى. بۇل قانداسىمىز ءۇشىن تاماشا مۇمكىندىك. ويتكەنى برازيليانىڭ وكىلى رەيتينگتە 8-ورىندى يەلەنىپ تۇر. ال وزىنەن ءبىرشاما جوعارى تۇرعان سپورتشىمەن ايقاسۋ كىم-كىمگە بولسا دا ءتيىمدى. ەگەر ونى ۇتساڭ, ۇزدىكتەر تىزىمىندە جوعارىلايسىڭ.
اسۋعا قارسى شىعاتىن فايتەر جايىندا نە بىلەمىز؟ برازيليانىڭ شىعىسىندا ورنالاسقان ميناس-جەرايس پروۆينتسياسىنىڭ ورتالىعى بەلۋ-ءوريزونتيدىڭ دۇنيەگە كەلگەن 31 جاستاعى ساڭلاق 2010 جىلدان بەرى ارالاس جەكپە-جەكپەن شۇعىلدانادى. UFC-دە ناپاقاسىن تاۋىپ جۇرگەنىنە ءۇش جىلدان استى. سول ارالىقتا 24 كەزدەسۋ وتكىزىپ, 19 رەت جەڭىسكە جەتتى. 10 باسەكەدە ايقىن باسىمدىق تانىتتى. الەمنىڭ ەڭ بەلدى پروموۋشەنىندەگى التى جەكپە-جەكتىڭ تورتەۋىندە مەرەيى ۇستەم بولدى. سوڭعى ەكى كەزدەسۋىندە اقش-تىڭ ارلاندارى برەندون رويۆەل (رەيتينگتە №1) مەن الەكس پەرەسكە (№6) نوكاۋتپەن ۇتىلدى.
قالاي بولعاندا دا, اسۋ الماباەۆتىڭ بۇرىنعى قارسىلاستارىنا قاراعاندا ماتەۋس نيكولاۋدىڭ دارەجەسى الدەقايدا جوعارى. كەلەشەكتە بۇل جايت تا ەسكەرىلەدى. 19 قازاندا لاس-ۆەگاستاعى UFC APEX ارەنادا اسۋدىڭ اسىعى الشىسىنان تۇسسە, وندا كەلەسى جەكپە-جەگىن ول توپ-بەستىكتىڭ قاتارىندا جۇرگەن ساڭلاقتاردىڭ بىرىنە قارسى وتكىزۋى ابدەن مۇمكىن. وسىلايشا, چەمپيوندىق ءتاج ءۇشىن تالاساتىن كۇن دە جاقىنداي تۇسەدى. ەڭ باستىسى, قازاقتىڭ قايسار ۇلى ايقاس الاڭىندا ايانباي ايقاسىپ, جەڭىسكە جەتۋى ءۇشىن جانىن سالۋى كەرەك.
