اتتيلاعا ابىلايحاننىڭ ءالى جەتپەدى
وليمپيادالىق رەيتينگتىڭ 81 كگ سالماق دارەجەسىندە توپ-وندىقتى تۇيىندەپ تۇرعان 24 جاستاعى ابىلايحان جۇبانازار اتتيلا ۋنگۆاريمەن كۇش سىناستى. 35 جاستاعى ماجارستاننىڭ مارقاسقاسى كەزىندە ەۋروپا ويىندارىندا ءبىر رەت, ەۋروپا چەمپيوناتىندا ەكى مارتە قولا مەدالدى يەلەندى. دەسەك تە قازىرگى كەزدە ونىڭ جولى وڭعارىلماي ءجۇر. سوڭعى رەت ۋنگۆاري بىلتىر ناۋرىز ايىندا تاشكەنتتە ۇيىمداستىرىلعان گراند-سلەم تۋرنيرىندە باس جۇلدەنى ولجالادى. سودان كەيىن 20-دان اسا جارىسقا قاتىسقانىمەن, بارلىعىنان قۇر قول قايتتى. سونىڭ سالدارىنان ۇزدىكتەر تىزىمىندە 20-ورىنعا سىرعىپ ءتۇستى.
اتتيلاعا قاراعاندا ابىلايحاننىڭ جاعدايى الدەقايدا جاقسى. 2023-2024 جىلدار ارالىعىندا ول بەس بىردەي ءدۇبىرلى دودادان ولجالى ورالدى. تارقاتىپ ايتساق, تبيليسيدەگى گراند-سلەمدە كۇمىس الدى, ۇلانباتىر, ديۋسسەلدورف جانە استاناداعى گراند-سلەمدەر مەن حانچجوۋداعى ازيا ويىندارىندا قولا جۇلدەنى ەنشىلەدى. بىراق بۇل ەڭبەكتىڭ بارلىعى بەكەر كەتتى. تورتجىلدىقتىڭ باستى دوداسىندا جۇبانازار بىلگەنىنەن جاڭىلدى. ول رەيتينگتە وزىنەن 10 ساتى تومەن تۇرعان جانە 11 جاس ۇلكەن, «شاۋ تارتقان» سپورتشىعا گولدەن-سكوردا جول بەردى.
اتالعان سالماقتاعى ايقاستا تاكانوري ناگاسە ايقىن باسىمدىق تانىتتى. تىپتەن, سوڭعى ءۇش الەم جانە ەۋروپا چەمپيوناتتارىندا ەشكىمگە دەس بەرمەگەن گرۋزيالىق تاتو گريگالاشۆيليدىڭ ءوزى وعان جارىتىپ قارسىلىق كورسەتە المادى. فينالدىق سايىس نەگىزگى ۋاقىتتا «يپپونمەن» اياقتالدى. وسىلايشا, وردا بۇزار 30 جاستاعى جاپونيانىڭ جۇلدىزى توكيوداعى ناتيجەسىن قايتالاپ, ەكى دۇركىن وليمپيا ويىندارىنىڭ جەڭىمپازى اتاندى. ودان بولەك, ناگاسەنىڭ ريو وليمپياداسىنىڭ قولا جۇلدەگەرى, دۇنيەجۇزىنىڭ ءۇش دۇركىن چەمپيونى جانە ەكى دۇركىن قولا جۇلدەگەرى دەگەن اتاقتارى تاعى بار. قولا مەدال وڭتۇستىككورەيالىق لي جوونحۆان مەن تاجىكستاندىق سومون ماحامادبەكوۆكە بۇيىردى.
63 كگ سالماقتا ونەر كورسەتكەن 22 جاستاعى ەسميگۇل كۋيۋلوۆا بىلتىر حانچجوۋداعى ازيا ويىندارى مەن بيىل گونكونگتاعى قۇرلىق چەمپيوناتىندا قولا مەدالدى موينىندا جارقىراتىپ, جانكۇيەرلەردى ءبىر قۋانتتى. الايدا وسى ناتيجەنىڭ ءوزى وعان وليمپياداعا بارۋ ءۇشىن جەتكىلىكسىز بولدى. بىراق ەسميگۇلدىڭ جولى بولعىش ەكەن. ازيا قۇرلىعىنا بولىنگەن ساناۋلى عانا كۆوتانىڭ ءبىرى قازاق قىزىنا بۇيىردى. ءسويتىپ, دۇنيەجۇزىلىك رەيتينگتە 37-ورىندا تۇرعان كۋيۋلوۆا پاريجگە جول تارتتى. تۇساۋكەسەر كەزدەسۋدە ونىڭ جولى جاستار اراسىنداعى ەۋروپا چەمپيونى (U-23), گراند-سلەم تۋرنيرلەرىنىڭ ەكى دۇركىن جەڭىمپازى, اۋستريالىق لۋبيانا پيوۆەزانامەن قيىستى. بۇل تارتىس ەۋروپا وكىلىنىڭ پايداسىنا شەشىلدى.
نەگىزى ايەلدەردىڭ 63 كگ سالماق دارەجەسىن «سلوۆەنيالىقتاردىڭ سالماعى» دەپ ايتۋعا بولادى. ورتالىق ەۋروپادا ورنالاسقان نەبارى 2 ميلليوننان اسا حالقى بار شاعىن عانا مەملەكەتتىڭ تاتامي شەبەرلەرى وسىعان دەيىنگى وليمپيا ويىندارىندا التى جۇلدە جەڭىپ العان ەكەن. سونىڭ تورتەۋىن ولار ءدال وسى سالماقتا يەلەندى. اتاپ ايتساق, 2004 جىلى افينادا ۋرشكا جولنير قولانى قاناعات تۇتسا, 2012 جىلى ول لوندوندا التىننان القا تاقتى. 2012 جىلى تينا ترەستنياك الدىنا جان سالماسا, 2021 جىلى توكيودا كۇمىسپەن كۇپتەلدى. مىنە, ەندى پاريجدە سلوۆەنيانىڭ ءۇشىنشى التىنى مەن جەتىنشى جۇلدەسىن 27 جاستاعى اندرەيا لەشكي ولجالادى. اقتىق سىندا ول ەسىمى كوپشىلىككە بەيمالىم پريسكا گۋادالۋپە اۆيتي الكاراستان ايلاسىن اسىردى. بۇل – مەكسيكا دزيۋدوسى تاريحىنداعى تۇڭعىش جۇلدە. ءۇشىنشى ورىندا – فرانتسيالىق كلاريسس اگبەنەنۋ مەن كوسوۆالىق لاۋرا فازليۋ.
ەندى جارىس جولىندا ەكى دزيۋدوشىمىز عانا قالدى. 100 كگ سالماقتاعى نۇرلىحان شارحان بۇگىن الەم چەمپيوناتىنىڭ كۇمىس جانە قولا جۇلدەگەرى, ەۋروپانىڭ ەكى دۇركىن چەمپيونى, ەۋروپا ويىندارىنىڭ قولا جۇلدەگەرى, بەلگيالىق توما نيكيفوروۆپەن ايقاسادى. قاي جەڭگەنى الەم جانە قۇرلىق چەمپيونى, ازيادا مەن ماستەرس ءتۋرنيرىنىڭ جەڭىمپازى, وزبەك مۇزاففاربەك توروبوەۆقا تاپ بولادى. ەرتەڭ +78 كگ سالماقتاعى كاميلا بەرلىقاش ازيا ويىندارى مەن قۇرلىق بىرىنشىلىگىنىڭ جەڭىمپازى, موڭعوليالىق امارسايحانى اديااسۋرەنمەن بەلدەسەدى. ودان كەيىن ءبىز ارالاس كوماندالىق جارىستى تاماشالايمىز.
ادىلبەك السىزدىك تانىتتى
ەركىن تاسىلمەن 100 مەترلىك قاشىقتىققا جۇزۋشىلەر سايىسىنا ادىلبەك مۋسين شىققاندا دەمىمىزدى ىشكە تارتىپ وتىردىق. قانشا دەگەنمەن, وسى سپورت ءتۇرىن سەرىك ەتكەن قانداستارىمىز تىم سيرەك. ونىڭ ۇستىنە 24 جاستاعى سايىپقىراننىڭ اياقالىسى دا جامان ەمەس. ول بىرقاتار حالىقارالىق جارىستا جاقسى ناتيجە كورسەتتى. 2021 جىلى كونيادا يسلام ىنتىماقتاستىعى ويىندارىنىڭ جەڭىمپازى اتانىپ, دۇنيەجۇزىلىك ۋنيۆەرسيادادا ءۇشىنشى ورىنعا تۇراقتادى. 2018 بەن 2023 جىلدارداعى ازيا ويىندارىندا ءتورت رەت ۇزدىك ۇشتىكتى تۇيىندەدى. وسى جاعدايدىڭ بارلىعى ادىلبەككە دەگەن سەنىمدى نىعايتتى.
شىنى كەرەك, فرانتسيانىڭ استاناسىنداعى جارىستا مۋسين 2016 جىلى ريو وليمپياداسىندا ايدى اسپانعا ءبىر-اق شىعارعان دميتري ءبالانديننىڭ ەرلىگىن قايتالاي الماسا دا, ءبىراز جەرگە دەيىن باراتىن شىعار دەپ ۇمىتتەندىك. بىراق ول ىرىكتەۋ سىنىندا ءوز جانكۇيەرلەرىن جەرگە قاراتىپ, 8 ادامنىڭ اراسىنان مارەگە ەڭ سوڭىندا جەتتى. ەندى قانداسىمىز 2 تامىزدا وتەتىن باتتەرفليايشىلەردىڭ 100 مەترلىك باسەكەسىندە ونەر كورسەتەدى. بالكىم, سول جارىستا ادىلبەكتىڭ باعى جانار.
ستەند اتۋشىلاردىڭ (تراپ) ىرىكتەۋ سايىسىندا ماريا دميتريەنكو 73 ۇپاي جيىپ, ءتورتىنشى ورىنعا تۇراقتادى. وتانداسىمىزدىڭ كەلەسى كەزەڭگە ءوتۋى ءۇشىن وسى كورسەتكىش جەتكىلىكتى بولدى. ەندى دميتريەنكوعا فينالعا جولداما الۋ ءۇشىن وسى مەجەدە ۇزدىك التىلىقتىڭ قاتارىنان كورىنۋ قاجەت. ال ساداق اتۋدان سىنعا تۇسكەن يلفات ابدۋللين 1/32 فينالدا الەم چەمپيوناتىنىڭ كۇمىس, پانامەريكا ويىندارىنىڭ قولا جۇلدەگەرى, كانادالىق ەريك پيتەرسكە 4:6 ەسەبىمەن ەسە جىبەردى.
نۇربەك ازەر جەڭدى, ساكەن ايقىن ۇتتى
سەيسەنبىدە قوس بوكسشىمىز شارشى الاڭعا كوتەرىلدى. 80 كگ سالماقتاعى نۇربەك ورالباي اۋستراليالىق كاللۋم پيتەرسپەن جۇدىرىقتاستى. 21 جاستاعى جاسىل قۇرلىق وكىلىنىڭ باعىندىرعان پالەندەي بەلەستەرى بولماعانىمەن, سوققىسى وتە جويقىن ەكەن. تەحنيكالىق ارسەنالى دا مول. ەكىنشى راۋندتا ول قازاقتىڭ ۇلىن ءبىر مارتە ەسەڭگىرەتىپ تاستادى. دەسەك تە دەر كەزىندە ەس جيعان الەم چەمپيونى پيتەرستەن ۇپاي سانىمەن باسىم ءتۇستى. ءدال سول سالماقتا قىتايدىڭ نامىسىن قورعاعان الەم چەمپيوناتىنىڭ كۇمىس جۇلدەگەرى, ازيا ويىندارىنىڭ جەڭىمپازى توقتاربەك تاڭاتقان دومينيكان رەسپۋبليكاسىنىڭ وكىلى كريستيان حاۆەر پينالەستى ەكىنشى راۋندتا نوكداۋنعا جىبەردى. بىراق تورەشى قازاقتىڭ ەمەس, قارسىلاسىنىڭ قولىن كوتەردى.
51 كگ سالماق دارەجەسىندەگى ساكەن بيبوسىنوۆ تۇركيالىق سامەت گۋمۋشپەن قولعاپ ءتۇيىستىردى. تالاي دۇرمەكتە ىسىلعان مىرزاعالي ايتجانوۆتىڭ ءتول شاكىرتى 2023 جىلعى ەۋروپا ويىندارىنىڭ ءفيناليسى, 2024 جىلعى ەۋروپا چەمپيونىن ەش قينالماي-اق ۇتتى.
شيرەك فينالدا نۇربەك ورالباي ازەربايجاندىق مۇراد اللاحۆەرديەۆپەن ايقاسسا, ساكەن بيبوسىنوۆ وزبەكستاننىڭ ماقتانىشى حاسانبوي دۋسماتوۆپەن كۇش سىناسادى. بۇل باسەكەلەر 2 تامىزدا وتەدى. ال وعان دەيىن ءبىز ماحمۋد سابىرحان (57 كگ) مەن يسپانيالىق حوسە كيلەس, ۆالەنتينا حالزوۆا مەن (75 كگ) پانامالىق اتەينا بايلان, نازىم قىزايباي مەن (50 كگ) برازيليالىق كارولينە باربوسا دە المەيدا, ايبەك ورالباي (92 كگ) مەن ازەربايجاندىق لورەن الفونسو دومينگەس, مۇحامەدسابىر بازارباي ۇلى (63,5 كگ) مەن گرۋزيالىق لاشا گۋرۋلي جانە كارينا يبراگيموۆا (57 كگ) مەن پۋەرتوريكالىق اشلەيان لوسادا موتتا جەكپە-جەكتەرىن تاماشالايمىز.
كەشە جارىس جولىنا ءۇشسايىسشى ەكاتەرينا شابالينا, نىسانا كوزدەۋشىلەر يسلام ساتپاەۆ پەن كونستانتين مالينوۆسكي (50 مەتردەن ءۇش قالىپتا اتۋ), ستەند اتۋشى ماريا دميتريەنكو (تراپ), بوكسشى ماحمۋد سابىرحان (57 كگ) مەن ۆالەنتينا حالزوۆا (75 كگ), ۇستەل تەننيسشىسى كيريلل گەراسيمەنكو (جەكەلەگەن سايىس, 1/8 فينال), سپورتتىق گيمناسشى ميلاد كاريمي (كوپسايىس, فينال) سىندى ساڭلاقتار شىقتى. ولاردىڭ قالاي ونەر كورسەتكەنى جايىندا گازەتىمىزدىڭ كەلەسى سانىندا باياندايمىز.
