فوتو: istockphoto.com
رەسەيدىڭ استراحان وڭىرىمەن شەكاراداعى اتىراۋ وبلىسىنىڭ قۇرمانعازى اۋدانىنىڭ تۇرعىنى قاراقۇرت شاققانىن بىلمەي قالعان. ونى امان الىپ قالۋ ءۇشىن بالقۇدىق اۋىلىنداعى دارىگەرلەر استراحان وبلىسىنىڭ دارىگەرلەرىن شاقىرتۋعا ءماجبۇر بولدى.
«بالقۇدىق اۋىلىنداعى اۋرۋحانا دارىگەرلەرى حارابالى اۋداندىق اۋرۋحاناسىنا حابارلاستى. ونداعى ەمدەۋ مەكەمەسىنە 1970 جىلى تۋعان جەرگىلىكتى تۇرعىن جاندىكتىڭ شاعۋىنان كەيىن توكسيكالىق ۋلانۋمەن تۇسكەن. جەرگىلىكتى تۇرعىندى قاراقۇرت شاققانى جونىندە بولجام جاسالعان. ەر ادامعا شۇعىل مامانداندىرىلعان مەديتسينالىق كومەك قاجەت بولدى. مۇنداي كومەك كورسەتە الاتىن بالقۇدىق اۋىلىنا ەڭ جاقىن ورنالاسقان مەديتسينالىق مەكەمە – حارابالى اۋداندىق اۋرۋحاناسى. بالقۇدىق اۋىلىنا رەانيماتسيا بريگاداسى اتتاندى. زارداپ شەككەن تۇرعىن اۋداندىق اۋرۋحانانىڭ جانساقتاۋ بولىمىنە جەدەل جەتكىزىلدى», دەپ حابارلادى استراحان وبلىسىنىڭ دەنساۋلىق ساقتاۋ مينيسترلىگى.
حارابالى اۋداندىق اۋرۋحاناسىنىڭ دارىگەرلەرى ناۋقاسقا قاجەتتى ەمنىڭ ءبارىن جۇرگىزدى. ەكى كۇننەن كەيىن اتىراۋلىق ناۋقاس جانساقتاۋ بولىمىنەن پالاتاعا اۋىستىرىلعان. قازىر ونىڭ ومىرىنە ءتونىپ تۇرعان قاۋىپ جوق.
اتىراۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنەن ءمالىم ەتكەندەي, وبلىستىق اۋرۋحاناعا تۇسكەن 13 ادامدى قاراقۇرت شاققانى انىقتالعان. ناۋقاستاردىڭ تورتەۋى اۋرۋحانانىڭ جانساقتاۋ بولىمىنە جاتقىزىلىپ, تولىقتاي ەم-دوم شاراسىن الىپ شىققان. ال 9 ادامعا قاراقۇرتقا قارسى ەكپە سالىنىپ, امبۋلاتورلىق ەم الۋعا جىبەرىلدى. وبلىستىق بالالار اۋرۋحاناسىنا 3 بالا ءتۇستى. ونىڭ ىشىندە 2 بالا جانساقتاۋ بولىمىنە جاتقىزىلىپ, دارىگەرلەردىڭ باقىلاۋىنا الىنىپ وتىر. ءبىر بالاعا قاراقۇرتقا قارسى ەكپە سالىنعان.
«اۋدان ورتالىقتارىندا قاراقۇرت شاققان ءۇش جاعداي انىقتالدى. ونىڭ بىرەۋى – يندەر, ەكىنشىسى – يساتاي, ال ءۇشىنشى دەرەك قىزىلقوعا اۋدانىندا تىركەلدى. دارىگەرلەرگە جۇگىنگەن پاتسيەنتتەرگە العاشقى امبۋلاتورلىق كومەك كورسەتىلدى», دەپ مالىمدەدى باسقارمانىڭ ءباسپاسوز قىزمەتىنەن.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ رەسمي وكىلى اقتىلەك نۇروللاەۆانىڭ ايتۋىنشا, بيىل قاراقۇرت كوبەيىپ وتىر. اسىرەسە تۇرعىنداردىڭ يەلىگىندەگى ويسىلقارا تۇقىمىنا «جاۋداي» ءتيدى.
«وبلىس اۋماعىندا ماۋسىم-شىلدە ايلارىندا 485 تۇيەنى قاراقۇرت شاقتى. سونىڭ سالدارىنان 90 تۇيە شىعىن بولدى. سيمپتوماتيكالىق ەمدەۋ شارالارىنىڭ ناتيجەسىندە 306 جانۋار ساۋىقتى. ال 89 تۇيەگە ءالى دە ەمدەۋ جۇرگىزىلىپ جاتىر. قاراقۇرت شاققاننان ولگەن مالدىڭ يەلەرىنە 65 ملن 211 مىڭ تەڭگە تولەندى», دەدى ا.نۇروللاەۆا. ونىڭ مالىمەتىنە سۇيەنسەك, ۋلى جاندىكتەردىڭ شاعۋىنىڭ الدىن الۋ, ەمدەۋ جانە ولگەن جانۋارلارعا وتەماقى تولەۋ بيۋدجەت قارجىسى ەسەبىنەن قاراستىرىلماعان. الايدا سوعان قاراماستان جەرگىلىكتى ۆەتەرينارلار ۋلى جاندىك شاققان مالدى ەمدەۋ شارالارىن كۇندەلىكتى جۇرگىزىپ جاتىر.
«ۋلى جاندىكتەردى جويۋدى بيۋدجەت قارجىسى ەسەبىنەن اتقارىلاتىن ءىس-شارالار تىزبەسىنە قوسۋ جونىندە شارالار قابىلداۋ ءۇشىن اۋىل شارۋاشىلىعى مينيسترلىگىنە حات جولداندى. مال يەلەرىنە ۋلى جاندىكتەر كوپ تاراعان جايىلىمدا تۇيە, جىلقى جانە سيىردى جايۋدان باس تارتۋدى, اۋرۋ بەلگىلەرى بىلىنگەن جانۋارلار تۋرالى جەدەل تۇردە ۆەتەرينارلارعا حابارلاۋ, سونداي-اق ەمدەۋ شارالارى جۇرگىزىلىپ جاتقان جانۋارلاردى كۇتىپ-باعۋ ەرەجەلەرىن قاتاڭ ساقتاۋ ەسكەرتىلدى», دەدى ا.نۇروللاەۆا.
اتىراۋ وبلىسى
