وڭىردە حالىققا ساپالى مەديتسينالىق كومەك كورسەتۋ ءۇشىن جىل سايىن اۋقىمدى جۇمىس اتقارىلىپ جاتىر. ماسەلەن, بىلتىر دا ءدال وسىنداي 29 جەدەل جاردەم كولىگى مەكەمەلەرگە بەرىلگەن ەدى. العاشقى مەديتسينالىق كومەكتىڭ ساپاسىن ارتتىرۋعا قولداۋ كورسەتۋ جۇمىسى جۇيەلى اتقارىلادى. ويتكەنى حالىقتىڭ دەنساۋلىعىن ساقتاۋ, مەديتسينالىق قىزمەتتى دەر كەزىندە كورسەتۋگە جاعداي جاساۋ, ونىڭ قولجەتىمدىلىگى مەن ساپاسىن ارتتىرۋ – باستى مىندەتتىڭ ءبىرى. وبلىس باسشىسى اق جەلەڭدى ابزال جانداردىڭ جۇمىسىنا ساتتىلىك تىلەپ, كولىك كىلتىن تابىس ەتتى.
«دەنساۋلىق ساقتاۋ مينيسترلىگى, «Kazakhmys Holding» كومپانياسى جانە وبلىستىق اكىمدىك ءوزارا ءۇش جاقتى مەموراندۋمعا قول قويىپ, وبلىس ورتالىعىندا جاڭا زاماناۋي ونكولوگيالىق ورتالىق سالۋعا كەلىسىم جاسادىق. بۇل ءىس حالىق يگىلىگىنە ارنالادى. ءبىز شالعاي اۋىلدارعا دارىگەرلىك قىزمەتكە كەلگەن ءاربىر مامانعا 10 ملن تەڭگە, قالالىق جەرگە كەلگەندەرگە 5 ملن تەڭگەدەن ءبىر رەتتىك كوتەرمەاقى بەرەمىز. الاكول, سارقان اۋداندارى مەن تالدىقورعان قالاسىنا كەلگەن 5 مامان كوتەرمەاقى الىپ, اۋدان, قالا حالقىنا قىزمەت ەتىپ ءجۇر. وبلىستا مەديتسينالىق قىزمەت كورسەتۋ ساپاسىن ودان ءارى جاقسارتۋ ءۇشىن 67 جەدەل جاردەم بريگاداسى جاساقتالعانىن ەرەكشە اتاپ وتكەنىمىز ءجون. ولاردىڭ ۋاقتىلى كەلۋىن قامتاماسىز ەتۋ ءۇشىن شالعاي اۋدانداردا قوسىمشا ورنالاستىرۋلار قۇرىلدى. جاڭا اپپاراتتار ناۋقاستاردىڭ كەلۋ ۋاقىتىن قىسقارتادى. بۇل دەگەنىمىز ناۋقاسقا دەر كەزىندە كومەك كورسەتۋدى بىلدىرەدى», دەدى ب.يساباەۆ.
بيىل ءتۇرلى زاماناۋي مەديتسينالىق جابدىق الۋعا جەرگىلىكتى بيۋدجەتتەن 4 ملرد تەڭگە قاراستىرىلعان. حالىق يگىلىگى ءۇشىن وبلىس اۋماعىندا 94 مەديتسينالىق نىسان ىسكە قوسىلادى دەگەن جوسپار دا جوق ەمەس. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە 59 نىسان بەرىلسە, العاشقى مەديتسينالىق-سانيتارلىق كومەك جەلىسىن كەڭەيتۋ ءۇشىن اۋىلدىق جەرلەردە 27 بلوكتى-ءمودۋلدى نىسان تۇرعىزىلماق.
«ولار قاجەتتى قۇرال-جابدىقتارمەن جابدىقتالعان جانە جەدەلدىكتىڭ 4-ساناتىنداعى شاقىرۋلارعا قىزمەت كورسەتۋگە ارنالعان. سونداي-اق مەديتسينا قىزمەتكەرلەرىنە قولداۋ كورسەتۋ, قىزمەتتىك باسپانامەن قامتاماسىز ەتۋ جانە قولايلى ەڭبەك جاعدايىن جاساۋ ماسەلەسى دە شەتىنەن شەشىلىپ كەلەدى. وسى قابىلدانعان شارالاردىڭ بارلىعى حالىققا مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا مۇمكىندىك بەرەدى. ماتەريالدىق بازانى نىعايتۋ ناۋقاستارعا ساپالى ءارى مەرزىمدى مەديتسينالىق قىزمەت كورسەتۋدى ودان ءارى جاقسارتىپ, سىزدەردىڭ ءوز مىندەتتەرىڭىزگە دەگەن جاۋاپكەرشىلىكتى ارتتىرا تۇسەدى دەپ سەنەمىن. اۆتوكولىكتەرىڭىز قۇتتى بولسىن», دەدى وبلىس باسشىسى.
ودان كەيىن كەربۇلاق اۋداندىق اۋرۋحاناسىنىڭ باس دارىگەرى قاناتبەك ءابدىراحمانوۆ اۋدان حالقىنىڭ دەنساۋلىعى مەن تۇرمىسىن, ءال-اۋقاتىن جاقسارتۋ ماقساتىندا اتقارىلعان شارالار ءۇشىن اۋدان جۇرتشىلىعىنىڭ اتىنان ريزاشىلىعىن ءبىلدىردى.
جاڭا اۆتوكولىكتەر اقسۋ, الاكول, ەسكەلدى, كەربۇلاق, كوكسۋ, پانفيلوۆ, سارقان, قاراتال اۋداندىق ورتالىق اۋرۋحانالارىنا, سونىڭ ىشىندە اۋىلدىق مەديتسينالىق مەكەمەلەرگە, تالدىقورعان قالالىق ەمحاناسىنا, تالدىقورعان قالالىق كوپسالالى اۋرۋحاناسىنا, وبلىستىق كوپسالالى كلينيكا مەن وبلىستىق فتيزيوپۋلمونولوگيالىق ورتالىققا بەرىلدى.
ايتا كەتەيىك, وبلىستىق دەنساۋلىق ساقتاۋ باسقارماسىنىڭ مالىمەتىنشە, 2022 جىلدان بەرى وڭىردە 40-تان اسا نىسان سالىنعان. بيىل دەنساۋلىق ساقتاۋ سالاسىنا بولىنگەن قاراجات كولەمى وتكەن جىلمەن سالىستىرعاندا ۇلعايىپ, 92,3 ملرد تەڭگەگە جەتىپ وتىر. سوعان سايكەس جاڭا مەديتسينالىق نىساندار سالىنىپ, مەكەمەلەردىڭ ماتەريالدىق-تەحنيكالىق بازاسى نىعايتىلماق.
«مەديتسينالىق ۇيىمداردىڭ ماتەريالدىق-تەحنيكالىق بازاسىن جاقسارتۋ ءۇشىن كەيىنگى ەكى جىلدا جەرگىلىكتى بيۋدجەتتەن 5 ملرد تەڭگە ءبولىندى. سونىڭ ناتيجەسىندە مەديتسينالىق ۇيىمداردىڭ زاماناۋي قۇرالدارمەن جابدىقتالۋ دەڭگەيى 93 پايىزعا جەتتى. مۇنىڭ ءبارى ءوز كەزەگىندە جەرگىلىكتى جەرلەردە دۇرىس دياگنوستيكالاۋ مەن ساپالى ەمدەۋگە, سىرقاتتىڭ الدىن الۋعا وڭ ىقپالىن تيگىزەدى», دەيدى باسقارما ماماندارى.
بىلتىر 3,1 ملرد تەڭگەگە 300 بىرلىك مەديتسينالىق تەحنيكا مەن 29 بىرلىك سانيتارلىق اۆتوكولىك ساتىپ الىنعان, بيىل دا وسى ماقساتقا 4,7 ملرد تەڭگە قاراستىرىلىپ وتىر.
جەتىسۋ وبلىسى
