شارتاراپتىڭ سپورتشىلارى باس قوسقان بۇل سپورتتىق جارىستىڭ ماقساتى – سالاماتتى ءومىر سالتىن ناسيحاتتاپ, سۋدا جۇزۋشىلەردىڭ كاسىبي دەڭگەيىن ارتتىرۋ, سونداي-اق سۋ سپورتىن دامىتۋ. ءۇشىنشى جىل وتكىزىلىپ وتىرعان جارىسقا قاتىسۋشىلاردى قارسى العان الماتى وبلىسىنىڭ اكىمى مارات سۇلتانعازيەۆ «Oceanman» تەك سپورت مەرەكەسى عانا ەمەس, ءوڭىردىڭ تۋريستىك تارتىمدىلىعىن كورسەتۋ مۇمكىندىگىنە يە ەكەنىن اتاپ ءوتتى.
«سپورتتى دامىتۋعا ەرەكشە كوڭىل ءبولىنىپ جاتىر. وبلىستىڭ جارتى ميلليونعا جۋىق تۇرعىنىنىڭ 39,5 پايىزى سپورتپەن اينالىسادى. بۇگىن وسى ءىس-شاراعا كۋا بولۋ ءۇشىن 3 مىڭنان اسا ادام جينالدى. ءدال وسىنداي اۋقىمدى وقيعالار جوعارى دارەجەلى سپورتشىلاردى تاربيەلەيدى, سونداي-اق وبلىستا دا, ەلدە دە سپورت پەن ءتۋريزمدى دامىتۋ ءۇشىن قوسىمشا سەرپىن بەرەدى», دەدى ءوڭىر باسشىسى.
يتاليادان باستاۋ الىپ, قازاقستانعا جەتكەن «Oceanman» قۇرلىقتاردى بىرىكتىرەدى. بۇل – 2015 جىلى يتاليا مەن يسپانيادا باستالعان حالىقارالىق فرانچايزينگ. بۇگىندە جارىس بۇكىل الەمدە وتەدى, كاسىپقوي, اۋەسقوي جۇزۋشىلەردى جينايدى. ۇيىمداستىرۋشىلار قاتىسۋشىلاردىڭ دەڭگەيىنە قاراي ءارتۇرلى قاشىقتىقتى قاراستىرعان. جاڭادان باستاۋشىلار ءۇشىن 1 شاقىرىم بولسا, تاجىريبەلى سپورتشىلار ءۇشىن – 10 شاقىرىم.
«Oceanman Kazakhstan» تىركەلگەن قاتىسۋشىلار سانى بويىنشا كەيىنگى ءۇش جىلداعى رەكوردتى ورناتتى», دەدى باس ۇيىمداستىرۋشى, «Oceanman Kazakhstan» فرانشيزاسىنىڭ يەگەرى ەرالى ورالوۆ.
بيىل جۇزۋگە رەسەي, قىرعىزستان, وزبەكستان, ەۋروپا, ازيا جانە اۋستراليانى قوسا العاندا, الەمنىڭ 17 ەلىنەن 2 600-دەن اسا ءجۇزۋشى قاتىستى. قاتىسۋشىلاردىڭ جاسى 7-دەن 70 جاسقا دەيىنگى ارالىقتى قامتىدى.
«سۋدا ءجۇزۋ جارىسىندا كاسىپقوي جۇزۋشىلەر 5 پەن 10 شاقىرىمدىق جارىس جولىنا شىقسا, ءجۇزۋدى جاڭا باستاعاندار 1 جانە 1,5 شاقىرىمدا ءوزارا باق سىناستى. ال بالالار بولسا 800 مەتر قاشىقتىقتا سىنعا ءتۇستى. سۋدا جۇزۋگە قىزىعۋشىلار قاتارى جىلدان-جىلعا ءوسىپ كەلەدى. جارىستىڭ جوعارى دەڭگەيدە وتۋىنە اتسالىسقان وبلىس اكىمدىگى مەن قولداۋ بىلدىرگەن دەمەۋشىلەرگە العىسىمىز زور. جارىس جولىندا جۇزدەن جۇيرىك شىققان جەڭىمپازدار مەن جۇلدەگەرلەر كۇزدە دۋبايدا وتەتىن الەم بىرىنشىلىگىنە جولداما الدى», دەيدى «Oceanman» فرانشيزاسىنىڭ يەسى فەرمين ەگيدو.
ايتا كەتەرلىگى, حالىقارالىق سۋدا ءجۇزۋ جارىسىنىڭ ءوز مارەسىنە جەتكەنگە دەيىن قاتىسۋشىلاردىڭ قاۋىپسىزدىگىنە باسا نازار اۋدارىلدى. وسى ماقساتتا 24 ءجۇزۋ قۇرالى, 6 توتەنشە جاعداي قايىعى مەن قۇتقارۋشىلار قىزمەت ساپىندا تۇردى.
الماتى وبلىسى
