ءناپسىنىڭ ءبىر اتى – ءتان قالاۋى. ونى دا قۇداي تەكتەن-تەك جاراتپاعان. اسىلىندا جاقسى كيىم كيىپ, ءتاتتى تاماق جەگىمىز كەلسە, سونىڭ ءبارى ءناپسىنىڭ ىقپالىنان. ول بارلىعىمىزدىڭ ىشىمىزدە بار. باياعىدا سۇلەيمەن پاتشا قۇدايدان ءيسى ادامزاتتىڭ ءناپسىسىن مۇلدە جوق قىلىپ جىبەرۋىن سۇراپتى. كەيىن كوشەگە شىعىپ قاراسا, قىزىپ جاتقان ساۋدا, بالالاردىڭ ويىنى, توي-دۋماننىڭ ءبىرى دە جوق. بارلىعى ەستاندى ھالدە جاراتقانعا جالبارىنىپ وتىر. سوندا سۇلەيمەن ءناپسى بولماسا دۇنيە نەگىزگى سيپاتىنان اجىراپ قالاتىنىن تۇسىنگەن ەكەن.
الايدا ءناپسىنى قاجەت ەكەن دەپ, ءجون-جوسىقسىز قالاعانىڭنىڭ بارلىعىن جاساي بەرۋگە بولمايدى. ول ادامدى ازعىندىققا اپارادى. ءماشھۇر ءجۇسىپتىڭ كوپتومدىعىندا جاقسى مىسال بار. ادامنىڭ ءومىرى بەينە اق پاراق. ال ءناپسى – سيا سەكىلدى. اق پاراققا سيا مولىنان توگىلىپ كەتسە, قاعاز وتە شاتپاق, لاس بولادى. سوندىقتان ونى اقىل قالامىمەن ادەمىلەپ قاعازعا ءتۇسىرۋ كەرەك. ول قالام جاقسى بولسا قاعاز بەتىنە قانشا قۇسني ءسوز, ويۋ-ورنەك تۇسىرۋگە بولار ەدى.
ادام نەعۇرلىم ءوزىن قاراپايىم تومەن ساناعان سايىن, ونىڭ رۋحى سوعۇرلىم بيىكتەي بەرەدى. «كىسىنى بولشەك سانعا ۇقساتۋعا بولادى. ونىڭ تومەنى – ادامنىڭ ءوزى تۋرالى ويلاعانى, جوعارىسى – ادام تۋرالى وزگەلەردىڭ ويلاعانى. تومەنى كوپ بولعان سايىن, قورىتىندى ازايا بەرەدى», دەيدى لەۆ تولستوي.
ء«وزىڭدى ءوزىڭ جاتتاي سىيلا, جات جانىنان ءتۇڭىلسىن» دەگەن قازاق ماقالى دا رۋحتى پاك-تازا قالپىندا ساقتاۋ كەرەكتىگىن مەڭزەسە كەرەك.
