كەمى بەس بوتەلكە اكەلىپ تاپسىرعان ءار بالاعا بالمۇزداق بەرىلدى. اسىرەسە, بۇلدىرشىندەردىڭ بەلسەندىلىگى جوعارى بولدى. ارنايى بوتەلكە قابىلداۋ پۋنكتتەرىنە وتباسىمەن كەلگەندەردە كوپ. مايقۇدىق ساياباعىندا بۇلدىرشىندەر 50 مىڭ بوتەلكە تابىستاپ, 10 مىڭ بالمۇزداق الىپتى. وسى ارقىلى اۋلادا شاشىلىپ جاتقان بوس بوتەلكەلەر جينالىپ قالدى.
بالالارعا ارنالعان مۇنداي اكتسيا ايماعىمىزدىڭ باسقا قالا-اۋداندارىندا جالعاستى. ماسەلەن, تەمىرتاۋدىڭ كىشكەنتاي تۇرعىندارى 45 مىڭ بوتەلكە جيناپ, 4 500 بالمۇزداق الدى.
– قالا تۇرعىندارى, اسىرەسە, بالالار بەلسەندى قاتىستى. الداعى ۋاقىتتا وسىنداي اكتسيالاردى تۇراقتى نەگىزدە وتكىزۋدى جوسپارلاپ وتىرمىز. ءبىر جاعىنان بالالارعا بازارلىق بولسا, ەكىنشى جاعىنان تازالىققا ۇلەس قوستىق, – دەيدى تەمىرتاۋ قالاسى اكىمىنىڭ ورىنباسارى سامات زياشەۆ.
مۇنداعى اكتسياعا قاتىسقاندار 10 بوتەلكەنى بالمۇزداق الاتىن تالونعا اۋىستىرىپ وتىردى. ال شاحتينسكىنىڭ بالالارى 12 500 بوتەلكە تاپسىرىپتى. بۇل جاقتىڭ بۇلدىرشىندەرى دە اتالعان اكتسياعا بىلەك سىبانا كىرىسكەن كورىنەدى. وزدەرى مارە-سارە بولىپ, مەرەكەلىك كوڭىل كۇي سەزىنىپتى. از عانا ۋاقىتتىڭ ىشىندە قالا تازارىپ قالدى دەيدى ۇيىمداستىرۋشىلار. قارقارالىلىقتار 4 500 بوتەلكە جينادى. ساران قالاسى, اقتوعاي جانە اباي اۋداندارىنىڭ تۇرعىندارى دا ەستە ەرەكشە قالاتىن تازالىق ەستافەتاسىن جالعاپ اكەتتى. ولار دا سايكەسىنشە 2 400, 3 000 جانە 2 000 بوتەلكە جيناپ تاپسىرعان. اكتسيا باستاۋ العان بەتتە دە بۇقار جىراۋ, نۇرا جانە شەت اۋداندارىنىڭ تۇرعىندارى 2 500-گە جۋىق بوتەلكە جيناعان.
ايماق تۇرعىندارى, اسىرەسە بالالار پلاستماست, شىنى بوتەلكە جيناۋ ارقىلى قالدىقتاردى قايتا وڭدەۋگە, وسىلايشا ولكەمىزدى تازا ۇستاۋعا ۇلەسىن قوستى. باستىسى, بالالار ەكولوگيالىق مادەنيەت داعدىلارىن ۇيرەندى.
قاراعاندى وبلىسى
