بەينە ءبىر ءمۇيىزىن جاسىرعان ەسكەندىر سەكىلدى ىشىڭىزدە ءبىر جانارتاۋ ەشقاشان تىنىشتىق بەرمەيدى. ادام قولىمەن جاسالعان قاعيداتتاردىڭ سىرتقى شەڭبەرىنە شىعىپ, «بارلىعى سەندەر ويلاعانداي ەمەس!» دەپ باقىرۋدى قالايدى. كەيدە «الەمدى تۇگەل مەن كورىپ, ەشكىم مەنى بىلمەسە» دەپ توپىراق حالىنە اينالۋدى كوزدەيدى. جوق! بىراق بۇل وي از مەرزىمگە, وتە قىسقا ۋاقىتقا سوزىلادى. ەپپەن سويلەگەن عالىمنىڭ جۇزىنە قاراپ جاي عانا توسىن سۇراق قويۋ نە جان تالشىعىمەن سىرىن جايعان مۇڭلىق الدىندا قارقىلداپ كۇلكىسى كەلۋ – اپىر-اي, قانداي قورقىنىشتى سەزىمدەر. وسى ءبىر ەركىندىكتىڭ ۇڭعىسىنان سوعىلعان جانارتاۋ نەگە ءبىر ساتكە سايابىر تاپپايدى؟ نەگە ول سونشالىق تاكاپپار, كەيدە سونشالىق ۇياڭ؟ ول نەگە بالا كۇنى كوز الدىندا بوتەن مىسىقتى تالعا دارعا اسىپ قويعان ساقالدى اتانى, تۇنشىعا جىلاعان بەيمالىم ايەلدى, ز ۇلىم قولعا قارسى تۇرۋعا ەشبىر مۇمكىندىگى بولماعان جەتىم بالانى ويلايدى؟ ادام ءومىرى قاراپايىم عانا قاتەلىكتەر مەن نەمقۇرايدى, عىلىمسىز, تالاپسىز, ارمانسىز, تەك ەپتىلىگى عانا بار سانانىڭ ساتتىك شەشىمىمەن ب ۇلىنە سالاتىنى قالاي؟
و دۇنيەدە ادامدار ءوزىنىڭ قانداي ارەكەتكە بارعانىن, نە ىستەگەنىن انىق كورەدى دەيدى. قاي قيىردا ءجۇرىپ, قانداي ىزگىلىك ەتكەنىن نە ز ۇلىمدىققا بارعانىن قاراپ, جانى شىرقىرار ەكەن. ال قازىر ءوزىن ۇنەمى كورىپ وتىراتىن, باقىلاپ وتىراتىن اقىل كوزى اشىق ادامدار كوپ پە؟ ءبىلىم يەلەرى نادان ادام ءوزىن باقىلاپ وتىراتىن كوزى سونگەن ادام دەسەدى. ءسىز ءوز-وزىڭىزگە ەسەپ بەرەسىز بە؟ ايارلىققا اھ ۇرىپ, جاقسىلىققا ويمەن, نيەتپەن ۇلەس قوساسىز با؟ ءسىز قايداسىز؟ ءوزىڭىزدىڭ قاي مەجەدە كەلە جاتقانىڭىزدان حاباردارسىز با, ويلى وقىرمان؟
