تۇركىستان قالاسىنداعى №15 جالپى ورتا مەكتەپتىڭ تۇلەگى دامير ۇلتتىق بىرىڭعاي تەستىلەۋدەن 133 بالل جيناعان. مەكتەپتى بىتىرە سالىسىمەن تالاپتى بالانى شەتەلدىڭ 45 جوعارى وقۋ ورنى تەگىن وقۋعا شاقىردى. ولاردىڭ ىشىندە اقش, شۆەيتساريا, گەرمانيا, يسپانيا, مالايزيا, شوتلانديا سەكىلدى ەلدەر بار.
– مەكتەپتە گەوگرافيا, ماتەماتيكا جانە اعىلشىن تىلىنە قاتتى كوڭىل ءبولدىم. سودان IT سالاسىن تاڭدايمىن دەگەن جوسپارىم بولدى. دەگەنمەن 11-سىنىپتا بۇل ويىم وزگەردى. ونىما وكىنبەيمىن. قازىر بيزنەس باعىتىن تاڭداپ وتىرمىن, – دەيدى دامير.
تالاپكەر تاڭداۋىن جاساپ, شەشىمىن شىعارىپ قويىپتى. ول وقۋعا شاقىرتۋ العان ەلدەرىنىڭ اراسىندا چەحيا استاناسى پراگا قالاسىن تاڭداپ وتىر.
– شەتەلدە ءبىلىم الۋ ءۇش جىلعا جالعاسادى. تاعى ءبىر جىل سول ەلدىڭ ءتىلىن مەڭگەرەمىن. مەنى شاكىرتاقىسى 2,5 ملن تەڭگە بولاتىن ۋنيۆەرسيتەتتەر دە شاقىردى. بىراق جۇرەك قالاۋىم ەۋروپاعا ءتۇسىپ تۇر, – دەيدى العىر بالا.
ەسكە سالا كەتەيىك, وسىعان دەيىن تۇركىستاندىق تۇلەك يسلام ابدۋراحمانوۆ دا الپاۋىت 6 مەملەكەتتە ورنالاسقان 40-تان استام جوعارى وقۋ ورنىنان شاقىرتۋ العان بولاتىن. اتاپ ايتار بولساق, ءباا, اقش, انگليا, پولشا, مالايزيا, شۆەيتساريا ەلدەرىندەگى الەمگە تانىمال جوعارى وقۋ ورىندارىنىڭ گرانتىن جەڭىپ العان ەدى. ول دا تاڭداۋىن جاسادى. اقش-تىڭ تەحاس شتاتىنداعى حيۋستون قالاسىندا ورنالاسقان «North American University (NAU)» وقۋ ورنىندا ءبىلىم الاتىن بولدى.
– 8-سىنىپتا IT سالاسىنا قىزىعۋشىلىعىم ويانىپ, جاڭا باعىتقا قادام باستىم. بۇل سالادا رەسپۋبليكالىق دەڭگەيدە وتكەن «Hackathon» اتتى جارىستان التىنعا قول جەتكىزدىم, وسى ءىس-شارادا العان تاجىريبەم ەلىمىزدەگى ءبىلىم وليمپياداسىنان ءبىرىنشى ورىن يەلەنۋىمە سەبەپكەر بولدى. 9-سىنىپتا قوعامدىق ىستەرمەن اينالىسامىن دەپ شەشتىم. تۇركىستان قالاسىنىڭ «Eco Turkistan» كلۋبىنىڭ مۇشەسى بولدىم جانە ول جەردە ءبىراز تاجىريبە الىپ, كەنتاۋ قالاسىندا ءوزىمنىڭ «Green Team» اتتى جەكە ەكو كلۋبىمدى اشتىم, – دەگەن ەدى ول.
وزدەرىنىڭ ايتۋىنشا, ەكى جىگىتىمىز دە بالا كەزدەن ءبىلىم الەمىنىڭ ەسىگىن ايقارا اشقان. وقۋدا ەرىك-جىگەردىڭ, ۇلكەن ىزدەنىستىڭ كەرەك ەكەنىن ۇققان. سول جولدا تالماعان. ەندى, مىنە, جەمىسىن دە كورىپ وتىر.
