جاقىن كۇندەرى الەۋمەتتىك جەلىدە ۇرساڭ سىڭعىرلاعان قوڭىراۋدىڭ ۇنىندەي دىبىس بەرەتىن تاستار تۋرالى بەينەجازبا تارادى. جالپى, بۇل تاستار تۋرالى العاشقى بەينەماتەريالدار 2019 جىلدان بەرى بار. سول كەزدەن باستاپ جەلى پايدالانۋشىلارى ءۇشىن ۇلكەن قىزىعۋشىلىق پەن تاڭدانىس تۋدىرعان ەدى. قوڭىراۋلى تاستار قۇپياسىن بىلمەك بولىپ اتالعان بەينەجازباداعى ابايدىڭ جيدەبايداعى مۋزەي-ءۇيىنىڭ مەڭگەرۋشىسى ايقىن اقبولاتوۆقا حابارلاستىق.
«بۇل تاستار جيدەبايدان قىرىق شاقىرىم شاماسىندا جيرەنشە قىستاۋىنىڭ ماڭىندا جاتىر. جيرەنشە «اباي جولى» رومان ەپوپەياسىندا ايتىلاتىن اقىننىڭ جاقىن دوسى, جان سەرىگى بولعان ادام. ەلدى مەكەننىڭ ارعى بەتىندە تاۋ-تاستى ايماق بولعانىمەن, ءدال وسى ەكى تاس ۇرساڭىز سىڭعىرلاعان قوڭىراۋدىڭ ءۇنىن شىعارادى. ءبىزدىڭ جوبالاۋىمىزشا, اتالعان تاستاردىڭ قۇرامىندا مەتالل كوپ بولعاندىقتان بولار دەپ ويلايمىز. باق دارىپ, كيە قونعان شىڭعىستاۋ ولكەسىنىڭ بۇل دا ءبىر شەشىلمەگەن قۇپياسى», دەيدى ايقىن بەرىكبول ۇلى.
قوڭىراۋ ءۇنىن شىعاراتىن تاستار اقش-تىڭ پەنسيلۆانيا شتاتىندا, رەسەيدىڭ كارەليا رەسپۋبليكاسىندا كەزدەسەدى. مۇندا تۋريستەر ءۇشىن بارىنشا جاعداي جاسالعان. اباي ەلىنىڭ كونەكوز قارتتارى تاستىڭ تۇراعىن كوبىنە جار سالىپ ايتا بەرمەيدى. اتالعان تاستار مەملەكەت تاراپىنان قورعاۋعا الىنسا دەگەن ءوتىنىش ءبىلدىرىپ, قاراۋسىز جاتقانى كوڭىلگە كىربىڭ ۇيالاتاتىنىن ايتادى.
عىلىمي-زەرتتەۋ ەڭبەكتەرىنە سۇيەنسەك, مۇنداي دىبىستار تاۋ جىنىسىنىڭ تىعىزدىعى مەن ىشكى كەرنەۋدىڭ جوعارى دارەجەسىنە بايلانىستى شىعاتىنى بەلگىلى. شىڭعىستاۋ وڭىرىندەگى وسىناۋ تاستار تۋرالى بۇعان دەيىن گەولوگ ماماندار تاراپىنان سەمەي يادرولىق پوليگون وشاعىنداعى جارىلىس سالدارىنان سول جەردەگى تاۋ جىنىستارىنىڭ وزگەرگەن ءتۇرى بولۋى مۇمكىن دەگەن بولجام ايتىلعان.
اباي وبلىسى
