بيىل ءبىلىم كۋرسىنا قاتىسۋشىلار سانى 80 ادامعا دەيىن ارتتى. بۇل سەناتتىڭ «Taldau» مەكتەبى مەن ساراپشىلار كلۋبى سياقتى جوبالار اياسىندا ەلىمىزدىڭ ساراپشىلار قاۋىمداستىعىنىڭ تالداۋ قابىلەتىن شىڭداۋعا باعىتتالعان جۇيەلى جۇمىستىڭ جالعاسى ەكەنىن اتاپ وتكەن ءجون. اشىق فورماتتاعى ءتورت اپتالىق پراكتيكۋمعا سەنات جانىنداعى ساراپشىلار كلۋبىنىڭ مۇشەلەرى مەن «Taldau» مەكتەبىنىڭ تۇلەكتەرىنەن بولەك, كاسىبي بىلىكتىلىگىن ارتتىرىپ, ءبىلىمىن جەتىلدىرۋگە نيەتتى ماماندار, ونىڭ ىشىندە اقشا-كرەديت ساياساتى ماسەلەلەرىن تۇراقتى جاريالاپ جۇرگەن جۋرناليستەر دە قاتىسىپ جاتىر.
م.اشىمباەۆ قازاقستانداعى بيزنەس پەن الەۋمەتتىك سالانىڭ تۇراقتىلىعىن ايقىندايتىن اقشا-كرەديت ساياساتىنىڭ تيىمدىلىگى ىشكى جانە سىرتقى فاكتورلاردى كەشەندى تۇردە تالداۋمەن بايلانىستى ەكەنىن اتاپ ءوتتى. ەل ىشىندەگى ماكروەكونوميكالىق كورسەتكىشتەرمەن قاتار, ساراپشىلار ءوز ستراتەگيالارىندا قاقتىعىستار, ساۋدا-لوگيستيكالىق باعىتتاردىڭ وزگەرۋى, شيكىزات جانە قارجى نارىقتارىنداعى قۇبىلمالىلىق سەكىلدى سىرتقى سىن-قاتەرلەردى دە نازاردا ۇستاۋى قاجەت. وسى تۇرعىدان العاندا, ءبىلىم ءمودۋلى قاتىسۋشىلاردىڭ ماكروەكونوميكالىق ۇدەرىستەردى تەرەڭ تالداۋ جانە نارىقتاعى وزگەرىستەرگە جاۋاپ رەتىندە بىلىكتى شەشىمدەر ازىرلەۋ داعدىلارىن دامىتۋعا باعىتتالعان.
«پرەزيدەنت قاسىم-جومارت توقاەۆ ماكروەكونوميكالىق تۇراقتىلىق پەن اقشا-كرەديت ساياساتىنىڭ تيىمدىلىگى ماسەلەلەرىنە ۇنەمى باسا ءمان بەرىپ كەلەدى. بۇل ءبىلىم كۋرسى قاتىسۋشىلارعا جەكەلەگەن كورسەتكىشتەردى عانا ەمەس, ەكونوميكالىق ۇدەرىستەردىڭ تۇتاس كورىنىسىن كورۋگە مۇمكىندىك بەرەدى. ينفلياتسيالىق تاۋەكەلدەردىڭ قالاي قالىپتاساتىنىن, پايىزدىق مولشەرلەمەلەر مەن ۆاليۋتا باعامىنا قانداي فاكتورلاردىڭ اسەر ەتەتىنىن, بيۋدجەت ساياساتىنىڭ, نەسيەلەۋدىڭ, ينۆەستيتسيالار مەن ەكونوميكالىق ءوسىمنىڭ ءوزارا بايلانىسىن تۇسىنۋگە جول اشادى. بيىل باعدارلاما ەكونوميكالىق تالداۋدا جاساندى ينتەللەكتىنى پايدالانۋ ماسەلەلەرىمەن دە تولىقتىرىلدى. مۇنداي فورمات شەشىم قابىلداۋ نەگىزدەرىنىڭ قالاي قالىپتاساتىنىن تەرەڭىرەك تۇسىنۋگە سەپتىگىن تيگىزەدى», دەدى م.اشىمباەۆ.
سونداي-اق سەنات توراعاسى سەميناردى ۇيىمداستىرعان ۇلتتىق بانك ۇجىمىنا جانە ۋاقىت ءبولىپ, بىلىمىمەن ەرىكتى تۇردە بولىسۋگە نيەت تانىتقان دارىسكەرلەرگە العىس ءبىلدىردى.
الداعى ءتورت اپتا ىشىندە قاتىسۋشىلار ماكروەكونوميكانىڭ نەگىزدەرىن, ونىڭ ماڭىزدى كورسەتكىشتەرىن, ەكونوميكالىق مودەلدەردى, تولەم بالانسىن, ينفلياتسيالىق تارگەتتەۋ تەتىكتەرىن, اقشا-كرەديت جانە فيسكالدىق ساياساتتىڭ ءوزارا بايلانىسىن جان-جاقتى زەردەلەيدى. باعدارلامانىڭ باستى ماقساتى – ءتۇرلى سالاداعى ساراپشىلارعا ارنالعان بولجامدىق مودەلدەۋ كەزەڭى ارقىلى اقشا-كرەديت ساياساتى بويىنشا شەشىم قابىلداۋ ۇدەرىسىنە تەرەڭىرەك ءمان بەرۋ.
جالپى, بيىلعى سەمينارعا قاتىسۋشىلار سانى بىلتىرعىدان ەكى ەسە كوپ. وسى ورايدا بۇعان دەيىن سەنات پرەزيدەنت اكىمشىلىگىنىڭ كولىك جانە لوگيستيكا بولىمىمەن بىرلەسىپ, كولىك-لوگيستيكالىق الەۋەتتى دامىتۋعا ارنالعان وقىتۋ كۋرسىن ۇيىمداستىرعانىن ايتا كەتكەن ابزال. سونىمەن قاتار سەنات Big Data مەن جاساندى ينتەللەكتىنى تالدامالىق جۇمىستا قولدانۋعا ارنالعان بىرقاتار سەمينار وتكىزدى. اتالعان ءىس-شارالار جاساندى ينتەللەكت جانە تسيفرلىق دامۋ مينيسترلىگىنىڭ, سونداي-اق باسقا دا مۇددەلى تاراپتاردىڭ قاتىسۋىمەن ۇيىمداستىرىلدى. بۇل باستامالار ساراپشىلار مەن سالالىق مامانداردىڭ تالداۋ قابىلەتتەرىن شىڭداپ, ءبىلىمىن جەتىلدىرۋدى كوزدەيدى.
