اتىراۋ وبلىستىق دزيۋدو فەدەراتسياسىنىڭ ۆيتسە-پرەزيدەنتى, بەلگىلى باپكەر بيمىرزا تايجانوۆتىڭ ايتۋىنشا, ەلىمىزدىڭ ءار وڭىرىندە حالىقارالىق سايىستاردا ەل نامىسىن قورعاپ جۇرگەن ساڭلاق دزيۋدوشىلار از ەمەس. سونىڭ قاتارىندا ءابيبا ابۋجاقىنوۆانىڭ ەسىمى الدىمەن اتالادى. ويتكەنى قازاق جەرىنەن تىسقارى ەلدە ومىرگە كەلگەنىمەن, جۇرەگى قازاق دەپ سوعاتىن ۇلتجاندىلىعى مەنمۇندالاپ تۇرادى. اتا-اناسىمەن ەلگە قونىس اۋدارعاننان بەرى سپورتتاعى باعى جاندى دەۋگە بولادى. ونى كەيىنگى 4-5 جىلدان بەرى اتىراۋلىق باپكەر مەيرامبەك ەسماعامبەتوۆ جاتتىقتىرىپ كەلەدى.
ء«ار سپورتشىنىڭ ارمانى – وليمپيادا چەمپيونى اتانۋ. ال ءابيبا ابۋجاقىنوۆانىڭ وليمپياداعا دەيىنگى جۇلدەسى جەتەرلىك. ول – دزيۋدودان ەل چەمپيونى. 2021 جىلى بىشكەكتە, 2022 جىلى استانادا وتكەن ازيا چەمپيوناتىندا كۇمىس جۇلدەنى يەلەندى. بۇدان ەكى جىل بۇرىن تاشكەنتتەگى الەم چەمپيوناتىندا قولا جۇلدەگە يە بولدى. ال 2023 جىلى پورتۋگاليادا جالاۋى جەلبىرەگەن گران-پري سەرياسىنداعى تۋرنيردە جەڭىمپاز اتانعان ەدى. مىنە, دزيۋدوشى ارۋ پاريج وليمپياداسىنا وسىنداي جەتىستىكتەرىمەن بارىپ وتىر. جوعارىدا ايتقان دودالاردا باق سىناپ, جۇلدە الۋدىڭ ءوزى ءابيبانىڭ دايىندىعى مىقتى ەكەنىن كورسەتەدى», دەيدى ب.تايجانوۆ.
پاريج وليمپياداسىندا العاشقىلاردىڭ قاتارىندا باق سىنايتىن ءابيبا ابۋجاقىنوۆا 48 كگ سالماقتا كۇرەسەدى. بۇل – دزيۋدوداعى ەڭ جەڭىل سالماق.
«سپورتتىڭ قاي تۇرىندە دە جەڭىل سالماقتا قارسىلاستار از بولمايدى. ال ءابيبانىڭ سالماعىنداعى قارسىلاستارى وسال ەمەس. ونىڭ ۇستىنە وليمپياداعا كىلەڭ مىقتىلار ىرىكتەلەدى عوي. بىراق ءبىزدىڭ بالۋانىمىز قارسىلاستارىنىڭ ايلا-ءتاسىلىن, دايىندىق دەڭگەيىن بىلەدى. جاتتىقتىرۋشىسى م.ەسماعامبەتوۆپەن بىرگە بۇرىننان كۇرەسىپ جۇرگەن برازيليا, قىتاي, جاپونيا ەلدەرىندەگى قارسىلاستارىنىڭ وسال تۇسىن تابۋ جولىن زەرتتەدى. ماسەلەن, بىشكەكتەگى ازيا چەمپيوناتىنىڭ اقتىق سىنىندا قىتايلىق لي ياناننان ۇتىلعان ەدى. استانادا وتكەن وسىنداي چەمپيوناتتا جاپون بالۋانى ۆاكانا كوگاعا ەسە جىبەرىپ الدى. جاپون سپورتشىسى سولاقاي بالۋانمەن كۇرەسسە, ابدىراپ قالاتىنىن ەسكەرەدى دەپ ويلايمىن. ويتكەنى ءابيبا ءوزى دە سولاقاي», دەدى بەلگىلى باپكەر.
ال ەسميگۋل كۋيۋلوۆا تورتجىلدىق دودادا 63 كيلودا سىنعا تۇسكەلى وتىر. ونىڭ دايىندىعى قالاي؟
«ەسميگۋل دە – تالابى تاۋداي, ىزدەنەتىن دزيۋدوشىمىز. ونىڭ ەسىمى تەك ەلىمىزگە عانا ەمەس, الىس-جاقىن ەلدەرگە دە تانىمال. بىلتىر ازيا ويىندارىنىڭ, بيىل ازيا چەمپيوناتىنىڭ قولا جۇلدەگەرى اتاندى. راس, ابيباعا قاراعاندا حالىقارالىق دودادان العان جۇلدەسى از بولۋى مۇمكىن. الايدا شەبەرلىگى شىڭدالىپ كەلەدى. وسى كەزگە دەيىن 63 كەلىدە باق سىنايتىن ەسميگۋل كوماندالىق سايىستىڭ ليتسەنزياسىنا يە بولعان ەدى. جاقىندا ونىڭ ۇپايلارى قايتا ەسەپتەلىپ, جەكەلەي سىندا كۇرەسۋگە رۇقسات بەرىلدى. دەمەك ونىڭ دا وليمپيادادان جۇلدە الاتىن مۇمكىندىگى بار. تەك اپتىقپاي, اسىقپاي, سابىرمەن كۇرەسسە عانا جۇلدەگە قول جەتكىزەرىنە سەنەمىن», دەدى ب.تايجانوۆ.
ەل ءۇمىت ارتىپ وتىرعان دزيۋدوشىلارعا جەرگىلىكتى جەردە بارىنشا قولداۋ كورسەتىلىپ وتىر. جاقىندا وليمپياداعا اتتانار الدىندا ەكى سپورتشىنى اتىراۋ وبلىسىنىڭ اكىمى سەرىك شاپكەنوۆ ارنايى قابىلداپ, ءساتتى ساپار تىلەدى.
«الدا ۇلكەن دودا تۇر. وتكەن جىلى ازيا ويىندارىنان جۇلدەمەن ورالعان كەزدە پاريج وليمپياداسىنا قاتىسۋ ماسەلەسىن قوزعاپ, الاڭسىز دايىندالۋ ءۇشىن بارلىق جاعدايدى جاساۋعا ۋادە بەرگەن ەدىم. ەندى سىزدەر وبلىستىڭ عانا ەمەس, ەلىمىزدىڭ نامىسىن قورعايسىزدار. ءتورت جىلدا ءبىر رەت وتەتىن دودادا ساتتىلىك سەرىك بولىپ, باقتارىڭىز جانسىن. جاھاننىڭ ەڭ مىقتىلارىمەن سىنعا ءتۇسۋ – ەرلىككە پارا-پار ءىس. سپورتشىنىڭ ءبارى چەمپيون بولۋدى قالايدى. سوندىقتان وليمپيادادا ەلىمىزدىڭ اتىن اسقاقتاتىڭىزدار, ءبىز سىزدەرگە سەنەمىز», دەدى س.شاپكەنوۆ.
ال وبلىستىق دزيۋدو فەدەراتسياسىنىڭ تاراپىنان ۇدايى قارجىلاي قولداۋ كورسەتۋدەن قالىس قالمادى. ويتكەنى قاي جارىسقا قاتىسسا دا, الدىمەن سپورتشىلاردىڭ دايىندىعىنا كوڭىل بولىنەدى.
ء«تورت جىلدا ءبىر وتەتىن وليمپيادانىڭ ءجونى بولەك. سول سەبەپتەن ءابيبا مەن ەسميگۋلدىڭ حالىقارالىق رەيتينگتە ۇپاي بەرىلەتىن جارىستارعا بارۋىنا بارىنشا قولداۋ كورسەتۋگە ءمان بەرىلدى. قازىر ءابيبا رەيتينگتە الدىڭعى ورىندا تۇر. ەسميگۋلدىڭ دە رەيتينگى كوتەرىلدى. قازاق ەلى وليمپياداعا قاتىسۋعا اتتانعان سپورتشىلاردىڭ جەڭىسپەن ورالۋىنا ءۇمىت ارتىپ, ەڭ جاقسى تىلەگىن ارناپ وتىر. «جاقسى ءسوز – جارىم ىرىس» دەگەندەي, ەلدىڭ ءۇمىتى اقتالىپ, سپورتشىلارىمىزدىڭ جۇلدەسى كوبەيىپ, ەلىمىزدىڭ ابىرويى اسقاقتاعانىنا كۋا بولايىق», دەدى ب.تايجانوۆ.
اتىراۋ وبلىسى
