اۋدان اكىمى قانات ءازمۇحانوۆتىڭ ايتۋىنشا, سۋ تاسقىنىنا قارسى تايتالاس ميالى اۋىلىندا 31 ناۋرىزدا باستالعان. ويىل وزەنىنىڭ سۋى بۇرىن-سوڭدى بولماعان قارقىنمەن ارناسىنان اسىپ, اۋدان ورتالىعىنا قاۋىپ توندىرگەن. اۋىل تۇرعىندارى جۇدىرىقتاي جۇمىلىپ, بوگەت تۇرعىزىپ جۇرگەندە تاسقىن سۋ «ميالى-ساعىز» تاسجولىن شايىپ كەتكەن.
«مۇقىر اۋىلىنان جينالعان قاپشىقتار جەتكىزىلىپ, اتىراۋلىق, ماقاتتىق, كورشىلەس اۋىلدارداعى جانە «تەڭىز» كەنىشىندە جۇمىس ىستەپ جۇرگەن ەرىكتىلەر كومەككە كەلدى. ناعىز قىسىلتاياڭ شاقتا وبلىستىق توتەنشە جاعداي دەپارتامەنتىنەن 3 اۆتوكولىكپەن 80 قۇتقارۋشى دەر كەزىندە جەتكىزىلدى. اۋدانداعى مەكەمەلەردىڭ 275 قىزمەتكەرى, 48 پوليتسەي, توتەنشە جاعدايلار سالاسىنىڭ 110 قىزمەتكەرىنىڭ,
20-دان اسا ارنايى تەحنيكانىڭ كومەگىمەن اۋىلدى تاسقىن سۋدان قورعاپ قالدىق», دەيدى ق.ءازمۇحانوۆ.
اكىمنىڭ دەرەگىنە سۇيەنسەك, ويىل وزەنىنىڭ ارناسىنان اسقان تاسقىن سۋ 10 كۇن بويى اۋداننىڭ ەلدى مەكەندەرىنە قاۋىپ ءتوندىرىپ تۇرعان.
تۇرعىندار وسىنشا كۇن ۇرەيلەنىپ ءجۇردى. وسى كەزەڭدە انالار مەن بالالار, ەگدە جاستاعى 570 تۇرعىن اتىراۋ قالاسىنا, 819 تۇرعىن ەۆاكۋاتسيالىق پۋنكتتەرگە جەتكىزىلگەن. اۋدان رەزەرۆىندەگى تەحنيكالارعا قوسىمشا وبلىستىق شتابتان, توتەنشە جاعدايلار دەپارتامەنتىنەن, سونىمەن قاتار ەلىمىزدىڭ تۇكپىر-تۇكپىرىنەن ەرىكتىلەردىڭ دەمەۋشىلىگىمەن قاجەتتى قۇرال-جابدىقتار اكەلىنگەن. قاپشىقتارعا قۇم تولتىرىلىپ, بۇرىنعى 45 شاقىرىمعا قوسىمشا 28 شاقىرىم بوگەت قوسا سوعىلدى. قىزىلقوعا اۋدانىنان تاسقىن سۋمەن كۇرەسكە قۇقىق قورعاۋ جانە توتەنشە جاعدايلار سالاسىنىڭ قىزمەتكەرلەرى مەن اسكەريلەردەن 3 مىڭنان اسا ەرىكتى جۇمىلدى. ارنايى 89 تەحنيكا تارتىلدى.
«اپات ايتىپ كەلمەيدى» دەگەندەي, تاسقىن سۋدىڭ سالدارىنان شىعىنعا باتقاندار بار. قىزىلقوعا اۋداندىق اكىمدىگىنىڭ مالىمەتىنە سۇيەنسەك, تابيعي سيپاتتاعى توتەنشە جاعدايدان زارداپ شەككەندەرگە كەلتىرىلگەن زياندى باعالاۋ جانە وتەۋ جونىندەگى كوميسسياعا مال شىعىنىنا قاتىستى 70 ءوتىنىش ءتۇسىپتى. كوميسسيانىڭ قورىتىندىسىنا سايكەس 58 شارۋا قوجالىعى مەن جەكە تۇرعىنداردىڭ ولگەن 191 مالى ءۇشىن بيۋدجەتتەن جانە وزگە كوزدەردەن 61 ملن 772 مىڭ 062 تەڭگە وتەماقى تولەندى.
سونداي-اق ارنايى قۇرىلعان كوميسسياعا سۋ تاسقىنىنان بۇلىنگەن 31 ءۇيدىڭ يەسى ءوتىنىش بەرگەن. ونىڭ ىشىندە 7 تۇرعىن ءۇيدىڭ قۇجاتى بولماعان. سول سەبەپتەن بۇل ۇيلەردىڭ يەلەرىنىڭ ءوتىنىشى كەرى قايتارىلدى. ال 24 ءوتىنىش قاناعاتتاندىرىلىپ وتىر.
اۋدان اكىمى ق.ءازمۇحانوۆ تاسقىننان زارداپ شەككەن تۇرعىنداردىڭ وتىنىشىنە وراي شىعىندى باعالاۋدى ءوز باقىلاۋىنا الدى. شىعىندى ەسەپتەۋ ءۇشىن تەحنيكالىق باعالاۋشىلار شاقىرىلدى. «باعالاۋشىلاردىڭ تەحنيكالىق قورىتىندىسىنا سايكەس 6 تۇرعىن ۇيگە جوندەۋ جۇمىستارىن جۇرگىزۋ قاجەتتىگى انىقتالدى. ال 18 تۇرعىن ءۇي اپاتتى دەپ تانىلدى. اۋدان اكىمى ب ۇلىنگەن تۇرعىن ۇيلەرگە تەحنيكالىق باعالاۋ جۇرگىزگەن مامانداردىڭ قورىتىندى حاتتامالارىن تۇرعىندارعا تانىستىردى. ءتورت تۇرعىن ءۇي سالىپ بەرۋدى سۇرادى. باعالاۋ ناتيجەسىمەن 20 تۇرعىنعا بۇلىنگەن ءۇيى ءۇشىن وتەماقىعا قارجى ءبولىنىپ, تولىق وتەلدى», دەپ مالىمدەدى اۋداندىق اكىمدىكتەن.
قازىر قىزىلقوعا اۋدانىنداعى قونىستانۋ اۋىلىندا 3 تۇرعىن ءۇيدىڭ قۇرىلىسى ءجۇرىپ جاتىر. ال ميالى اۋىلىندا 1 تۇرعىن ءۇيدىڭ قۇرىلىسىن جۇرگىزۋ باستالدى.
اتىراۋ وبلىسى
