فوتو: اقوردا
«قاراعاندى فەرروقورىتپا زاۋىتىنداعى قايعىلى وقيعا سالدارىنان ادامداردىڭ قايتىس بولعانى تۋرالى سۋىت حاباردى تەرەڭ كۇيزەلىسپەن قابىلدادىم. قازا تاپقانداردىڭ وتباسىلارى مەن جاقىندارىنا ورنى تولماس قايعىلارىنا ورتاقتاسىپ, كوڭىل ايتامىن. وقيعانىڭ سەبەبىن انىقتاۋ مەنىڭ جەكە باقىلاۋىمدا. قازا تاپقانداردىڭ وتباسىنا بارلىق قاجەتتى قولداۋ كورسەتىلەدى», دەدى ولجاس بەكتەنوۆ.
بەكتەنوۆتىڭ ايتۋىنشا, قاراعاندى فەرروقورىتپا زاۋىتىندا بولعان اپاتتىڭ سەبەپتەرىن انىقتاۋ ماقساتىندا ارنايى كوميسسيا قۇرىلىپ, جۇمىس ىستەپ جاتىر.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بالالارى بار قازا تاپقانداردىڭ وتباسىنا اسىراۋشىسىنان ايىرىلۋ جاعدايىنا بايلانىستى رەسپۋبليكالىق بيۋدجەتتەن جاردەماقى جانە ماسق-تان الەۋمەتتىك تولەمدەر تاعايىندالادى. سونداي-اق قازا تاپقانداردىڭ وتباسى ساقتاندىرۋ ۇيىمىنان تولەمدەر جانە بجزق-دان جەرلەۋگە بىرجولعى تولەم الادى.
سونىمەن قاتار جۇمىس بەرۋشى كومپانيا جەرلەۋ ءراسىمىنىڭ بارلىق شىعىنىن, سونداي-اق كەلەسى مىندەتتەمەلەردى:
- قازا تاپقان قىزمەتكەرلەردىڭ وتباسىنا 10 جىلدىق جالاقى مولشەرىندە بىرجولعى تولەم بەرۋدى;
- قازا تاپقاندار مەن زارداپ شەككەندەردىڭ وتباسىلارىنىڭ تۇرعىن ءۇي جاعدايىن جاقسارتۋعا كومەكتەسۋدى;
- قازا تاپقان قىزمەتكەرلەردىڭ وتباسى مۇشەلەرىنىڭ بارلىق نەسيەسىن تولىق وتەۋدى ءوز موينىنا الدى.
ايتا كەتەيىك, قاراعاندى فەرروقورىتپا زاۋىتىنداعى اپات سالدارىنان كوز جۇمعاندار سانى ءتورت ادامعا جەتتى.
ەسكە سالايىق, 20 شىلدەدە № 1 زاۋىت پەشىندە كەنەتتەن جالىن شىعىپ, سالدارىنان كاسىپورىننىڭ 8 قىزمەتكەرى زارداپ شەككەن ەدى.
