سۋرەتتى تۇسىرگەن – اۆتور
تەحنيكانىڭ ءتىلىن جاقسى مەڭگەرگەن شەبەر كاسىبىن دوڭگەلەتىپ وتىر دەگەن سوڭ, كۇرە جولدان ءۇش شاقىرىمداي جەردەگى بوزشا اۋىلىنا ارنايى بۇرىلعانبىز. دارحان شەبەر ماگنيتوفون, شاۋگىم سەكىلدى ۇساق-تۇيەك تەحنيكالاردى ارباسى اينالا قويمايتىنداي شاعىن بولمەدە وتىرىپ جوندەيدى. ال جازدىڭ كۇنى اۋلاسىنداعى گاراجدى شەبەرحاناعا اينالدىرادى.
– تەلەديدار, كولىكتىڭ ماگنيتوفونىن, «وتاۋ تۆ» سەكىلدى تۇرمىستىق تەحنيكالاردى جوندەيمىن. قىستىڭ كۇنى ۇساق زاتتاردى ۇيدەگى شاعىن شەبەرحانادا جوندەسەم, تەلەديدار سەكىلدى دۇنيەنى باسقا بولمەگە شىعارىپ الىپ, قۇراستىرامىن. جازدا جاقسى, كەڭ گاراجدا جۇمىس ىستەي بەرۋگە بولادى, – دەيدى دارحان تولەپقازى ۇلى.
ونىڭ ەڭبەكقورلىعىنا, بىلىمىنە جەرلەستەرى ريزا. الايدا جەر بەتىندەگى پەندە تاعدىردىڭ جازۋىنان قايدا قاشىپ قۇتىلادى؟ شەبەر بيىلدان باستاپ دەنساۋلىعىنا بايلانىستى ءى-توپقا وتكەن. ۇكىمەت تاراپىنان 569 مىڭ تەڭگە ءبولىنىپ, جاڭا ارباعا قول جەتكىزگەن. ايتۋىنشا, ول ارباسى ءتورت جىلدا ءبىر جاڭارتىلىپ وتىرادى. سونىمەن قاتار مەملەكەت تاراپىنان ارنايى اياقكيىم بەرىلگەن. ودان بولەك, ءدارى-دارمەك, ەم-دوم جاعىنان دا كومەك بار دەسەدى. بەلگىلى ءبىر ۋاقىتتا ساۋىقتىرۋ ساناتوريلەرىنە بارىپ تا تىنىعادى, ەمىن الىپ كەلەدى. قامقورشى بولىپ وتىرعان جولداسىنا دا ءتيىستى تولەم قاراستىرىلعان ەكەن.
دارحان تولەپقازى ۇلى وسىدان ءتورت جىل بۇرىن مەملەكەتتەن 560 مىڭ تەڭگە گرانت الىپ, كاسىبىن كەڭەيتكەن. ەلەكتر تەحنيكالارىن جوندەۋ ءۇشىن قۇرال-جابدىقتار العان, تاعىسىن تاعى. بايقاعانىمىزداي, دارحان اۆتوكولىكتەردىڭ دابىل بەلگىلەرىن دە ورناتادى. شىندىقتى ايتساق, ءبىلىمدى اۆتوەلەكتريكتەر قالالىق جەردىڭ وزىندە تاپشى. مۇنداي شەبەرلىكتى قايدان ۇيرەندىڭ دەيمىز عوي دارحانعا, سويتسەك بالا كۇنىنەن اكەسى باۋلىپتى.
– ءوزىم تەحنيكاعا كىشكەنتاي كۇنىمنەن قىزىقتىم. ماگنيتوفون سەكىلدى دۇنيەلەردى بۇزىپ, قايتا قۇراپ جۇرەتىنمىن. سول قىزىعۋشىلىعىمدى بايقاعان اكەم
12 جاسىمنان باستاپ, باعىت-باعدارىن بەرە باستادى. وقىتتى, تاربيەلەدى. سونىڭ ارقاسىندا نان تاۋىپ وتىرمىز, – دەيدى شەبەر.
دارحاننىڭ شەبەرلىگىن شىڭداۋعا تاعى ءبىر سەبەپ بولعان – اۋىلعا 4G ينتەرنەتىنىڭ تارتىلۋى ەدى. وعان دەيىن تەحنيكا جوندەۋدەگى تۇيتكىلدى سۇراقتاردىڭ جاۋابىن ءوزى ىزدەپ, شارق ۇرىپ جۇرسە, قازىر ينتەرنەت يىرىمىنەن كەز كەلگەن سۇراققا جاۋاپ تابادى. ءتىپتى ەتاپ بويىنشا كورسەتىپ تۇرىپ بەرەدى. دارحاننىڭ قولى ۇزارتقانى – سول. ايتىپ وتىرعانداي, تاپسىرىس ۇزىلمەيدى. كۇنىنە كەمى ەكى-ءۇش ەلەكتر تەحنيكاسىن جوندەپ جىبەرەدى. وسىلايشا, وتباسىن اسىراپ, قاراپايىم كۇن كەشىپ جاتىر. كاسىپ مۇنىمەن توقتامايدى دەيدى. اكىمدىك تاراپىنان تاعى قولداۋ بولسا, شەبەرحاناسىن اۋدان ورتالىعى اقجاردان اشۋدى كوزدەپ وتىر. ول دەگەنىمىز, جالپى اۋدان تۇرعىندارى ءۇشىن قولايلى بولماق.
شىعىس قازاقستان وبلىسى,
تارباعاتاي اۋدانى,
بوزشا اۋىلى
