سۇراستىرىپ بىلسەك, ارقانىڭ ارداگەرى اقان سەرى عاشىق بولعان اقتوقتى باقتىبايقىزىنىڭ ءىس تىككەن تىگىن ماشيناسى ەكەن. ءبىزدىڭ بىلۋىمىزدە «زينگەر» تىگىن ماشيناسىن نەمىستىڭ وسى اتتاس كومپانياسى شىعارعان. اقان سەرى مەن اقتوقتىنىڭ زامانىندا قيانداعى كوكشەگە قولعا تۇسە بەرمەيتىن زات قالاي كەلدى ەكەن؟ ول زاماننىڭ ادامدارى دا وركەنيەت كوشىنە ىلەسە بىلگەن-اۋ. ءارى وسىنداي تىگىن ماشيناسىمەن كوز جاۋىن الاتىن كوركەم دۇنيەلەر تىككەن ارۋدىڭ شەبەرلىگى قانداي بولدى ەكەن دەپ قيالعا بەرىلەسىڭ.
ەل ىشىندە ساقتالىپ قالعان ەستى ەستەلىكتەردى كوڭىل سۇزگىسىنە سالساڭىز, الاشتىڭ ارۋ قىزدارى ادەمىلىگىمەن عانا ەمەس, ىسمەرلىگىمەن دە ەرەكشەلەنەتىنىن اڭعارار ەدىڭىز. قازاقستاننىڭ حالىق جازۋشىسى ساكەن سەرى ءجۇنىسوۆتىڭ «اقان سەرى» رومانىندا دا اقتوقتى بەينەسى ءبىرشاما بەدەرلى باياندالعان. ال تىگىن ماشيناسىمەن ءىس تىككەندىگى تۋرالى بىلە بەرمەيدى ەكەنبىز. جادىگەردى زامانىندا وسى مۋزەيدە عىلىمي قىزمەتكەر بولىپ جۇمىس ىستەگەن ءانشى-كومپوزيتور, قالامى قارىمدى جۋرناليست كارىم ىلياستەگى زەرەندى اۋدانىنداعى قىزىلاعاش اۋلىندا تۇراتىن جالمۇحاننىڭ ۇرپاقتارىنان قالاپ الىپ تاپسىرىپتى. جالمۇحان ۇرپاقتارى وزدەرى ءۇشىن ايرىقشا قۇندى سانالاتىن تىگىن ماشيناسىن وپ-وڭاي بەرە قويماعانعا ۇقسايدى. اجەمىزدەن قالعان كوز دەسە كەرەك. سونىسىمەن قىمبات. بىراق سوزگە شەشەن, اداممەن ءتىل تابىسا بىلەتىن كارىم اعا ەل يگىلىگىنە جاراسىن, رۋحاني قازىناعا قوسىلعان ءبىر تامشى ولجا بولسىن دەپ اكەلگەنگە ۇقسايدى.
اقتوقتىداي ارۋ قولدانعان تىگىن ماشيناسى سول قالپى ساقتالىپتى. بۇگىندە مۋزەي تورىندە جالعىز اقتوقتىنىڭ عانا ەمەس, ىلكى زامانداعى الاشتىڭ اي نۇرلى, ارۋ سيپاتتى بار قىزىنىڭ بولمىس-ءبىتىمىن بايانداپ تۇر.
كوكشەتاۋ
