«ەلىمىزدە ون جىلدان بەرى «سەرپىن» باعدارلاماسى جۇزەگە اسىپ كەلەدى. باعدارلامانىڭ ماقساتى مامان دايارلاۋ عانا ەمەس, سونىمەن بىرگە ونىڭ استارىندا ساياسي-الەۋمەتتىك, ەكونوميكالىق ۇلكەن يدەيا جاتىر. بۇگىنگى تاڭدا «سەرپىن» باعدارلاماسىمەن ەلىمىزدە 19 جوعارى وقۋ ورنى ماماندار دايارلايدى. ەلىمىزدىڭ وڭستۇستىگى مەن باتىس وڭىرلەرىنىڭ تالاپكەرلەرىنە جىل سايىن 3-4 مىڭ گرانت ءبولىنىپ, ولارعا بار الەۋمەتتىك جاعداي جاسالعان. وسى ورايدا «سەرپىنمەن» وقۋعا تۇسكەن ستۋدەنتتەر سولتۇستىك, شىعىس ايماقتارداعى جوعارى وقۋ ورىندارىندا پەداگوگيكالىق, ينجەنەر-تەحنيكالىق, اقپاراتتىق تەحنولوگيا, اۋىل شارۋاشىلىعى ماماندىقتارى بويىنشا ءبىلىم الادى. سولتۇستىك وڭىردە «سەرپىنمەن» بىتىرگەن ماماندارعا سۇرانىس وتە جوعارى. سەبەبى ولار – بۇل ايماقتارعا قاجەت مامانداردى تولتىراتىن جۇمىس كۇشى. قازىر اكادەميك ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتىندە 2000-عا جۋىق ستۋدەنت «سەرپىن» باعدارلاماسىمەن وقيدى. ولاردىڭ جۇمىسقا ورنالاسۋ كورسەتكىشى دە 80 پايىزدان اسادى. مەملەكەتتىك قولداۋدىڭ ناتيجەسىندە وڭتۇستىك جاستارى سولتۇستىك ايماقتاردا جۇمىسقا ورنالاسىپ, سول جەردە ورنىعىپ قالۋى ەل ەكونوميكاسىنىڭ كۇشەيۋىنە وڭ سەپتىگىن تيگىزەدى. ال «سەرپىنمەن» وقۋعا تۇسۋگە قاراستىرىلعان جەڭىلدىكتىڭ ءبىرى – ول تومەنگى تەست بالىمەن گرانتقا ءتۇسۋ مۇمكىندىگى جوعارى بولۋى. سونىمەن بىرگە ستۋدەنتتەر وقيتىن ۋنيۆەرسيتەتتەردە شاكىرتاقى مەن تەگىن نەمەسە باعاسى ارزان جاتاقحانالار قاراستىرىلعان», دەدى ن.دۋلاتبەكوۆ.
سونداي-اق ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتى رەكتورىنىڭ ايتۋىنشا, «سەرپىن» باعدارلاماسى بويىنشا, اسىرەسە پەداگوگيكالىق ماماندىقتارعا سۇرانىس كوپ. بۇدان بولەك, بيىل شاكىرتاقى كولەمى دە وسكەن. باعدارلامادا قارالعان تاعى ءبىر جەڭىلدىك: بۇرىن گرانتتىڭ وتەمى رەتىندە وقۋ بىتىرگەن ستۋدەنت 3 جىل سوندا قالىپ جۇمىس ىستەسە, قازىر بۇل مەرزىم 2 جىلعا قىسقارعان. سونىمەن قاتار ءبىر عانا وبلىسپەن شەكتەلمەيدى. رەسپۋبليكانىڭ 11 ءوڭىرىنىڭ بىرىنە جولدانادى. «سەرپىننىڭ» ەندى ءبىر پايداسى – وڭتۇستىك پەن باتىس وڭىرلەرىنىڭ ستۋدەنتتەرى سولتۇستىك پەن شىعىسقا وقۋعا بارىپ, تۇبىندە سول جاقتا تۇراقتاپ قالسا, ىشكى كوشى-قون ماسەلەسى دە رەتتەلەدى.
اكادەميك ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ رەكتورى ن.دۋلاتبەكوۆ Instagram الەۋمەتتىك جەلىسى ارقىلى اتا-انالار مەن تالاپكەرلەردەن ساۋال كوپ تۇسەتىنىن ايتادى. مىنە, وڭتۇستىككە ارنايى كەلۋىنىڭ ءبىر سەبەبى وسى. رەكتور كۇن سايىن جەكە ءوزى ۋنيۆەرسيتەتتىڭ Instagram جەلىسىنىڭ پاراقشاسىندا 40-50-گە جۋىق تالاپكەرمەن تىلدەسەتىنىن جەتكىزدى. بۇل مەكتەپ تۇلەكتەرى مەن ولاردىڭ اتا-انالارىنىڭ مەملەكەتتىك «سەرپىن» باعدارلاماسىنا قىزىعۋشىلىعى جوعارى ەكەنىن ايعاقتايدى.
ال «سەرپىنمەن» بالا وقىتىپ جاتقان رەسپۋبليكاداعى 19 جوعارى وقۋ ورنىنىڭ ىشىندە اكادەميك ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ ءباسى بيىك. سەبەبى بۇگىندە ەلىمىزدە 6000-داي ستۋدەنت اتالعان باعدارلامامەن ءبىلىم السا, سونىڭ 2000-ى قاراعاندى زەرتتەۋ ۋنيۆەرسيتەتىنىڭ ۇلەسىنە تيەسىلى. ال تالاپكەرلەردىڭ دەنى 19 جوعارى وقۋ ورنىنان اكادەميك ە.ا.بوكەتوۆ ەسىمىن يەلەنگەن وقۋ ورنىن تاڭداۋى – ءبىلىم ساپاسى مىقتى بولسا كەرەك. سونداي-اق مۇندا ستۋدەنتتەرگە بارلىق الەۋمەتتىك جاعداي جاسالعان.
ال ءو.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ قۇجات قابىلداۋ بولمەسى ناعىز قاربالاس. وسىندا قۇجات وتكىزىپ جۇرگەن تالاپكەرلەردى اتا-انالارىمەن كوپ كەزدەستىردىك. سونىڭ ءبىرى – تۇركىستان وبلىسى بايدىبەك اۋدانىنىڭ ورتالىعى شايان ەلدى مەكەنىندەگى س.جاپپاروۆ اتىنداعى ورتا مەكتەپتىڭ تۇلەگى ءلايلا اسەت. ول ۇلتتىق بىرىڭعاي تەستىلەۋدەن 89 بالل جيناپ, گرانتقا ىلىگە الماعاننان كەيىن «سەرپىن» ارقىلى وقۋعا تۇسۋگە قۇجاتىن ارقالاپ وسىندا كەلگەن.
«انامنىڭ اقىلىمەن ءارى ءوزىمنىڭ قالاۋىممەن مەملەكەتتىك باعدارلامانىڭ مۇمكىندىگىن پايدالانىپ كورسەم دەيمىن. سول ماقساتپەن ءۇمىتىمدى ۇكىلەپ, قۇجاتىمدى اكەپ تاپسىردىم. وتىنىمگە ارقالىق, وسكەمەن, سەمەي, قاراعاندى, كوكشەتاۋ, پەتروپاۆل قالالارىن تاڭدادىم. قازاق ءتىلى مەن ادەبيەتى ءپانىنىڭ مۇعالىمى ماماندىعى بويىنشا ءبىلىم العىم كەلەدى. بارىنەن بۇرىن مەنى تەگىن وقۋ قىزىقتىردى. ستۋدەنتتەرگە دە جاقسى جاعداي جاسالعان دەپ ەستىدىم. سوندىقتان تۋعان جەرىمنەن جىراقتا وقۋعا بەل بايلاپ وتىرمىن. ونىڭ ۇستىنە قازاقتىڭ زيالى قاۋىمىنىڭ التىن بەسىگى بولعان ارقا مەن سەمەي ءوڭىرىنىڭ جوعارى وقۋ ورىندارىندا ءبىلىم ساپاسى مىقتى ەكەنى بەلگىلى. سوندىقتان ۇلت قايماقتارىنىڭ ءىزى قالعان جەردە ءبىلىم قۋىپ, ناعىز مامان يەسى اتانسام دەگەن نيەتىم بار», دەدى ول.
ايتا كەتەيىك, جالپى گرانت كونكۋرسىنا قۇجات قابىلداۋ ءراسىمى بيىلعى 13-20 شىلدە ارالىعىندا وتسە, اقمولا, اقتوبە, اتىراۋ, باتىس قازاقستان, قوستاناي, سولتۇستىك قازاقستان وبلىستارىنىڭ تالاپكەرلەرى ءۇشىن بۇل مەرزىم 13-24 شىلدەگە دەيىن جالعاسادى.
شىمكەنت
