1987 جىلى تاريحي-ەتنوگرافيالىق مۋزەي بولىپ قۇرىلىپ, ودان كەيىنگى جىلدارى رايىمبەك اۋداندىق تاريحي-ولكەتانۋ مۋزەيى دەپ اتالسا, ەكى اۋداننىڭ بولىنۋىنە بايلانىستى 2018 جىلدان باستاپ كەگەن اۋداندىق تاريحي-ولكەتانۋ مۋزەيى اتالادى. مۋزەي قوناقتارى تاۋلى ءوڭىردىڭ تاريحىمەن قاتار, ونىڭ قالىپتاسۋىنا ۇلەس قوسقان قايراتكەرلەردىڭ ءومىر-دەرەگىنە قانىعادى.
مۋزەيدىڭ ەرەكشە جانە قۇندى ەكسپوناتتارىنىڭ تىزىمىندە كورنەكتى جازۋشى, قازاق ادەبيەتىنىڭ كلاسسيگى بەردىبەك سوقپاقباەۆتىڭ جەكە زاتتارى ساقتاۋلى تۇر.
«نارىنقول تۋىپ-وسكەن اۋدانىم-اي,
كوركەم جەر بولماس سەنىڭ اۋماعىڭداي.
كەتەردە سەنەن ۇزاپ كوزىم قيماي,
قىزىل ءتىل ولەڭدەتىپ زاۋلادىم-اي», – دەپ جازۋشىنىڭ ءوزى جىرلاعانداي, بەردىبەك سوقپاقباەۆ 1924 جىلى وسى وڭىردە دۇنيەگە كەلگەن.
«ەكسپوزيتسيا زالىنا جازۋشىنىڭ ومىرىنە قاتىستى فوتوسۋرەتتەرمەن قاتار, جەكە زاتتارى قويىلعان. ولاردى 2014 جىلى قارىنداسى نەسىپقان سوقپاقباەۆا مۋزەي قورىنا تابىستاعان. اتاپ ايتساق, بالالار ادەبيەتىنىڭ كلاسسيگى ب.سوقپاقباەۆتىڭ ءوزى كيگەن كوستيۋمى مەن جەمپىرى, كوزىلدىرىگى, قالامسابى مەن قولجاتتىقتىرعىشى, ساعاتى دا وسى مۋزەيدە ساقتاۋلى», دەيدى مۋزەيدىڭ ەكسكۋرسيا جەتەكشىسى اياۋلىم اقىمجان.
الماتى وبلىسى
