جارتى عاسىردان اسا تاريحى بار ءانسامبلدى قاراعاندى وبلىسى مەن قارقارالى اۋدانىنىڭ باسشىلىعى قولداپ, ونەر بايقاۋىنا ارنايى شاقىرتۋمەن اتتانعان ەدى.
كەزىندە ارنايى شاقىرتۋلارمەن جارتى الەمدى شارلاعان, قازاق ونەرىن تالاي ەلگە تانىستىرعان ونەر ۇجىمى كەيىنگى جيىرما جىلدىڭ ىشىندە الىس ساپارلاردان شەكتەلىپ قالعانداي ەدى. مىنە, ۇزاق كۇتكەن ساپاردان ولجالى ورالىپ, جەرلەستەرىن شاتتىققا بولەپ جاتىر.
جارتى عاسىر ىشىندە ونەر ۇجىمىنىڭ قۇرامى ءاردايىم تولىسىپ, جاڭارىپ وتىردى. بۇل جولى تانىمال ونەر مايتالمانى تەمىربەك سىزدىقوۆ دايارلاعان, وتىز بەس ادامنان قۇرالعان ءان-بي ءانسامبلى ەۋروپا تورىنە مىقتى ازىرلىكپەن بارىپتى. رەپەرتۋارى باي انسامبل پولياك ەلىندە لايىقتى ونەر كورسەتىپ, قازاقتىڭ ءانى مەن بيىنە الەم حالقىن تامساندىرىپ قايتقانى ايعاق وعان.
دۇنيەنىڭ ءار تۇپكىرىنەن جينالعان ونەر ۇجىمدارى الدىمەن بىرنەشە توپقا ءبولىنىپ, پولشانىڭ لەگنيتسا, لوسيتسە, شپروتاۆا, پولكوۆيتسە, حوينۋۆ, ۆەرچيتسە, ۆولۋۆ, پوليانيتسا-زدرۋي, رۋدنو, زامەنيتسە ەلدى مەكەندەرىندە كونتسەرت قويدى. «سالتانات» ءان-بي ءانسامبلى فەستيۆال باعدارلاماسى بويىنشا لەگنيتسا قالاسىندا ونەر كورسەتتى. فەستيۆالدىڭ تاعى ءبىر ەرەكشەلىگى – وعان قاتىسقان ونەرپازدار ساحنادا عانا ەمەس, ءار قالانىڭ ورتالىق كوشەلەرىندە بولاتىن حالىقتىق شەرۋلەرگە دە قاتىسادى. ءوز ەلدەرىنىڭ ونەرىن پاش ەتەدى. فەستيۆالدا ءار مەملەكەتتىڭ وكىلدەرى ءوز حالقىنىڭ ساحنالىق ونەرىمەن قاتار سالت-داستۇرلەرىن, ۇلتتىق قولونەر جانە تاعام ونىمدەرىمەن دە تانىستىرادى.
ۇيىمداستىرۋشىلاردىڭ مۇنداعى ماقساتى – دۇنيە جۇزىنە الەم حالىقتارىنىڭ ۇلتتىق داستۇرلەرى مەن ونەرىن دارىپتەۋ. سول ارقىلى بەيبىتشىلىكتى, بىرلىكتى ناسيحات ەتۋ. فەستيۆال شىرايىن گالا-كونتسەرت, باسقا دا مەرەكەلىك كەشتەر اشا تۇسكەن.
ون كۇنگە سوزىلاتىن ونەر جارمەڭكەسىنىڭ اياسىندا جەرلەستەرىمىز لەگنيتسا قالاسى باسشىلىعىنىڭ قۇرمەتتى قابىلداۋىندا دا بولادى.
مۇنىمەن قوسا, وسى ءبىر ونەر دوداسى «Świat Pod Kyczerą» حالىقارالىق فولكلور فەستيۆالىنىڭ الەۋمەتتىك جەلىدەگى پاراقشالارى مەن ارنالارى ارقىلى تىكەلەي ەفيردەن كورسەتىلىپ وتىردى.
ەۋروپا تورىندە ۇزدىك ونەر كورسەتىپ, ەلگە ولجالى كەلگەن «سالتانات» حالىقتىق ءان-بي ءانسامبلى ۇجىمىن جەرلەستەرى ءسان-سالتاناتپەن قارسى الدى.
قاراعاندى وبلىسى,
قارقارالى اۋدانى
