قاراعاندىدا فەرروقورىتپا زاۋىتىنىڭ 8 جۇمىسشىسىن جالىن شارپىپ, اۋىر حالدە اۋرۋحاناعا ءتۇستى. باسىم كوپشىلىگىنىڭ جاعدايى تىم اۋىر. قازىر زاۋىتتا جۇمىس ۋاقىتشا توقتاتىلدى.
اپات كەشە تاڭعى 04:00-ءدىڭ شاماسىندا ورىن الدى. پەشتەن جالىن اتقىلاعان ساتتە جۇمىسشىلار قاشىپ ۇلگەرمەگەن. 8 ادام ءتۇرلى دەنە جاراقاتىن العان. بارلىعى جەدەل اۋرۋحاناعا جەتكىزىلدى
قازىرگى تاڭدا 8 جۇمىسكەردىڭ 6-ۋى اسا اۋىر حالدە جان ساقتاۋ بولىمىندە جاتىر. اتا-انالارى جاندارىن شۇبەرەككە ءتۇيىپ, اۋرۋحانانى اينالشىقتاپ ءجۇر. ال, دارىگەرلەردىڭ ايتۋىنشا, ءتيىستى كومەكتىڭ بارلىعى كورسەتىلگەن, ءتىپتى استانادان بىلىكتى ماماندار كەلگەن.
- بۇكىل ناۋقاسقا كەرەك كومەك بارلىعى جاسالدى. زەرتتەۋدىڭ ءبارى, كەرەك مامانداردىڭ ءبارى قاراپ شىقتى. استانادان عىلىمي زەرتتەۋ ينستيتۋتىنان باس تراۆماتولوگ كەلىپ, ناۋقاستاردى قاراپ, ەمدەۋ شارالارىنا قاجەتتى وزگەرىستەر ەنگىزدى, - دەدى ح.ج. ماقاجانوۆ اتىنداعى كوپسالالى اۋرۋحانانىڭ تراۆماتولوگيالىق ورتالىعىنىڭ باسشىسى بەرىك تولەۋباەۆ.
وقيعانىڭ ءمان-جايى انىقتالىپ جاتىر. پوليتسيا قىلمىستىق ءىس قوزعاپ, تەرگەۋدى باستاپ كەتتى.
ال, جۇمىس بەرۋشى YDD Corporation №1 پەشتەن كەنەتتەن جالىن شىققانىن ايتىپ, الەۋمەتتىك جەلىدە جازباشا مالىمدەمە جاسادى.
- 2024 جىلدىڭ 20 شىلدەسىندە تاڭعى ساعات 04:10 YDD Corporation فەرروقورىتپا زاۋىتىندا شتاتتان تىس جاعداي بولدى. № 1 پەشتەن كەنەتتەن جالىن شىعىپ, ناتيجەسىندە كاسىپورىننىڭ 8 جۇمىسشىسى ءارتۇرلى دارەجەدە جاراقات الدى. قازىرگى ۋاقىتتا زارداپ شەككەن جۇمىسكەرلەردىڭ بارلىعى اۋرۋحاناعا جەتكىزىلىپ, ولارعا شۇعىل مەديتسينالىق كومەك كورسەتىلىپ جاتىر. كومپانيا زارداپ شەككەندەرگە جان-جاقتى كومەك كورسەتۋدە جانە اۋرۋحانانىڭ مەديتسينالىق قىزمەتكەرلەرىمەن ۇنەمى بايلانىستا, - دەلىنگەن "YDD Corporation" ءباسپاسوز قىزمەتىنىڭ حابارلاماسىندا.
ەڭبەك ينسپەكتسياسى دا ىسكە كىرىستى. ارنايى كوميسسيا قۇرىپ, تەكسەرۋدى باستاپ كەتتى.
