شىلدەنىڭ 16-سى كۇنى كەگەن اۋدانىنىڭ اقساي اۋىلىنىڭ ماڭىنداعى تاۋلى ايماقتا جاۋىن-شاشىننىڭ مول تۇسۋىنەن جازىقتى تۇگەل سۋ باستى. اعىنى كۇشتى سۋدان جول بويىنداعى 2 جۇك كولىگى جول جيەگىنە شىعىپ كەتكەن. توتەنشە وقيعا ورنىنا كەگەن, ەڭبەكشىقازاق جانە ۇيعىر اۋداندارىنان ارنايى تەحنيكالار تارتىلىپ, جولدىڭ لاي سۋ باسقان تۇستارىن تازارتىپ, كولىك قوزعالىسىن قالىپقا كەلتىرۋ جۇمىستارىن جۇرگىزدى.
وقيعا ورنىنا تجد, پد, اكىمدىك وكىلدەرى مەن «قازاۆتوجول» مەكەمەسىنەن 17 قىزمەتكەر جەدەل تۇردە جۇمىلدىرىلدى. ءتۇس اۋا تولاسسىز جاۋعان جاڭبىر توقتاپ, سۋ دەڭگەيى تومەندەدى.
سونداي-اق وسى كۇنى جامبىل اۋدانىنىڭ بەرىكتاس اۋىلىندا دا تولاسسىز جاۋعان جاڭبىر سالدارىنان كولبەۋ سۋ اعىنى پايدا بولىپ, 15 اۋلا اۋماعى مەن 3 تۇرعىن ءۇيدى سۋ باستى. وسىعان بايلانىستى تجد بولىمشەلەرى مەن جەرگىلىكتى اتقارۋشى ورگاندار ينەرتتى ماتەريالدار سالىنعان 2 مىڭ قاپشىق دايىندادى. سونىمەن قاتار سۋ باسقان اۋماقتان سۋدى سورۋ جانە لايدان تازارتۋ جۇمىستارىن جۇرگىزىپ, ورىن العان وقيعاعا مونيتورينگ جاسالعانى تۋرالى تجد-ءنىڭ ءباسپاسوز قىزمەتى حاباردار ەتتى.
بۇل جۇمىستارعا تجد, جەرگىلىكتى اتقارۋشى ورگانداردىڭ, تجم 28237 اسكەري ءبولىمىنىڭ جەكە قۇرامىنان 100-دەن استام ادام, 11 موتوپومپا مەن 16 بىرلىك تەحنيكا جۇمىلدىرىلعان.
الماتى وبلىستىق تجد تۇرعىندارعا جاۋىن-شاشىن مول ءتۇسىپ جاتقان تاۋلى وڭىرلەردە ساقتىق شارالارىن ساقتاۋدى جانە اۋا رايى بولجامىنا نازار اۋدارۋدى ەسكەرتەدى.
الماتى وبلىسى
