فوتو: اقمولا وبلىسى تجد
قۇتقارۋشىلار ورماندا ادامنىڭ بەينەسى قاشالعان ەرەكشە تاس تاپقان. ولار بىردەن تابىلعان زات تۋرالى اقمولا وبلىسىنىڭ توتەنشە جاعدايلار دەپارتامەنتى مەن تاريحي-ولكەتانۋ مۇراجايىنا حابارلاعان. بۇدان سوڭ بۇل ارتەفاكتىگە استانالىق عالىمداردان بولەك شەتەلدىك عالىمداردىڭ دا قىزىعۋشىلىق تۋدىرعانى بەلگىلى بولدى.
ازىرگە ەجەلگى ءمۇسىنشىنىڭ جۇمىسى قاي داۋىرگە جاتاتىنى بەلگىسىز. عالىمدار ءتۇرلى پىكىر ايتىپ جاتىر. بىرەۋلەر بۇل تاستى قولا داۋىرىنە, ەندى بىرەۋلەر ونى كەيىنگى تۇركى داۋىرىنە جاتقىزادى. كەي عالىمداردىڭ ايتۋىنشا, بۇل تاستىڭ سىبىردەن تابىلعان ولجالارمەن ۇقساستىقتارى بار.
اقمولا وبلىسىندا تابىلعان بۇل كونە ارتەفاكت تاريحي قۇندى دۇنيە دەپ باعالانىپ, مەملەكەتتىك قورعاۋعا الىندى.
