2019 جىلدان باستاپ ارنايى ءبىلىم بەرۋ ۇيىمدارىنىڭ جەلىسى 83 بىرلىككە, ال ەرەكشە ءبىلىم بەرۋ قاجەتتىلىگى بار بالالاردى قامتۋ 20%-عا ۇلعايدى. بۇگىندە بالالاردىڭ 76%-ى ارنايى پسيحولوگيالىق-پەداگوگيكالىق قولداۋمەن قامتىلعان. بۇل تۋرالى بۇۇ-نىڭ جەنەۆاداعى مۇگەدەكتەردىڭ قۇقىقتارى تۋرالى كونۆەنتسيادا وقۋ-اعارتۋ ۆيتسە-ءمينيسترى ەدىل وسپان مالىمدەدى.
«ينكليۋزيۆتى ءبىلىم بەرۋدى دامىتۋ جونىندە ستراتەگيالار مەن باعدارلامالار ازىرلەندى. الداعى ۋاقىتتا پەداگوگتەرگە وقىتۋ سەمينارلارى مەن ترەنينگتەر ۇيىمداستىرىلىپ, مەكتەپتەر مەن وقۋ ورىندارىنىڭ باستامالارى قولداۋ تابادى. ارنايى ءبىلىم بەرۋ ۇيىمدارىنىڭ جەلىسى 68-گە ۇلعايدى. مەكتەپتەر بازاسىندا ينكليۋزيانى قولداۋدىڭ 708 كابينەتى, 22 رەسۋرستىق كونسۋلتاتيۆتىك ورتالىق اشىلدى. وقۋ مەكەمەلەرىنە 2,5 مىڭعا جۋىق پەداگوگ-اسسيستەنت, 9,7 مىڭ ارنايى پەداگوگ, 12 مىڭنان اسا پەداگوگ-پسيحولوگ جانە الەۋمەتتىك پەداگوگتەر جۇمىسقا قابىلداندى. 600-دەن اسا ارنايى وقۋ باعدارلامالارى ازىرلەندى. كەدەرگىسىز جانە ينكليۋزيۆتى ورتانى قالىپتاستىرۋ ءۇشىن وقۋ ورىندارىندا ينكليۋزيۆتى ءبىلىم بەرۋدىڭ ۇزدىكسىز جۇيەسىنىڭ ۇلتتىق مودەلى ەنگىزىلەدى», دەدى ول.
قازىر ەلىمىزدە ارنايى ءبىلىم بەرۋ ۇيىمدارىنىڭ جەلىسى قۇرىلعان. اتاپ ايتقاندا, 44 ارنايى بالاباقشا, 99 ارنايى مەكتەپ, 10 اۋتيزم ورتالىعى, 13 وڭالتۋ ورتالىعى بار. ال قالعان بالالار ينكليۋزيا جاعدايىندا جالپى ءبىلىم بەرەتىن مەكتەپتەردە وقيدى. بىلتىر قاراشادا وقۋ-اعارتۋ مينيسترلىگىنىڭ جانىنان ءبىلىم بەرۋدىڭ بارلىق دەڭگەيىن قامتۋ ماقساتىندا ينكليۋزيۆتى جانە ارنايى ءبىلىم بەرۋ دەپارتامەنتى قۇرىلدى. اتالعان دەپارتامەنتتىڭ ديرەكتورى لاۋرا بوتاباەۆا بالالارعا كەدەرگىسىز ورتا قۇرۋ بولاشاققا سالىنعان ينۆەستيتسيا ەكەنىن ايتادى.
«وقۋ-اعارتۋ مينيسترلىگى «دارا» قورىمەن بىرلەسىپ, نولدەن ءۇش جاسقا دەيىنگى بالالارعا ارنالعان «ەرتە قولداۋ» جوباسىن قولعا الدى. قازىر ەلىمىزدە ەرەكشە ءبىلىم بەرۋدى قاجەت ەتەتىن 200 مىڭنان اسا بالا بار. 500-گە جۋىق ءبىلىم بەرۋ ۇيىمى ەرەكشە ءبىلىم بەرۋدى قاجەت ەتەتىن بالالارعا ارنايى ءبىلىم بەرۋ قىزمەتىن كورسەتىپ كەلەدى. سونداي-اق 1 051 مەكتەپتە ينكليۋزيۆتى ءبىلىم بەرۋدى قولداۋ كابينەتتەرى جۇمىس ىستەپ تۇر», دەيدى ل.بوتاباەۆا.
