فوتو: kursiv.media
ەنەرگەتيكا ءمينيسترى بۇگىندە قازاقستاندا تاۋارلىق گازدىڭ ورتاشا قۇنى مىڭ تەكشە مەترىنە 33 169 تەڭگەنى قۇرايتىنىن ەسكە سالدى. بۇل رەتتە تاۋارلىق گازدىڭ بەكىتىلگەن كوتەرمە باعاسى 23 646 تەڭگەنى قۇرايدى.
«گاز سالاسىنا ينۆەستيتسيا تارتۋ جانە تاۋارلىق گازدىڭ وزىندىك قۇنىنا قول جەتكىزۋ ماقساتىندا تۇرعىندار ءۇشىن باعانىڭ كۇرت وسۋىنە جول بەرمەۋدى ەسكەرە وتىرىپ, گاز باعاسىن كەزەڭ-كەزەڭمەن كوتەرۋ قاجەت», دەدى الماسادام ساتقاليەۆ.
مينيستر قازاقستان 2024 جىلدىڭ 1 شىلدەسىنەن باستاپ ىشكى نارىقتا تاۋارلىق گازدى كوتەرمە ساتۋدىڭ شەكتى باعاسىن ورتاشا ەسەپپەن 14,6 پايىزعا وسىممەن قايتا قاراعانىن ەسكە سالدى.
«تۇتاستاي العاندا, ءۇش جىل ىشىندە ىشكى نارىقتا گازدى شىعىنسىز ساتۋعا قول جەتكىزۋ جوسپارلانىپ وتىر. بۇل ەلدىڭ گازعا دەگەن ءوسىپ كەلە جاتقان قاجەتتىلىگىن وتەۋگە جانە ەلىمىز ءۇشىن ماڭىزدى ينۆەستيتسيالىق جوبالاردى جۇزەگە اسىرۋعا مۇمكىندىك بەرەدى», دەپ قوسا كەتتى ەنەرگەتيكا ءمينيسترى.
ايتا كەتەيىك, 1 شىلدەدەن باستاپ قازاقستاندا سۇيىتىلعان مۇناي گازىنىڭ باعاسى تۇزەتىلگەن ەدى. ەنەرگەتيكا مينيسترلىگى تمد ەلدەرى بويىنشا قازاقستاندا ەڭ تومەن باعالاردىڭ ءبىرى – 54 تەڭگەدەن 86 تەڭگەگە دەيىن, رەسەيدە ءبىر ليتر گازدىڭ باعاسى - 132 تەڭگە, ازەربايجاندا – 171 تەڭگە, تاجىكستاندا – 273 تەڭگە ەكەنىن اتاپ ءوتتى.
