ەكى ەل اراسىنداعى ىقپالداستىق كەلىسىمىنە قول قويۋ ءراسىمى قىتاي حالىق رەسپۋبليكاسىنىڭ پرەزيدەنتى سي ءتسزينپيننىڭ قازاقستانعا رەسمي ساپارى اياسىنداعى نەگىزگى وقيعالاردىڭ ءبىرى بولدى. كەلىسىم ەكى ەل اراسىنداعى عىلىمي بايلانىستى نىعايتۋعا جانە بىرلەسكەن زەرتتەۋلەر جۇرگىزۋگە باعىتتالىپ وتىر.
سالتاناتتى ءىس-شاراعا شەنچجەن ۋنيۆەرسيتەتى مەديتسينا فاكۋلتەتىنىڭ اتقارۋشى دەكانى پروفەسسور سينچجي (كساۆەر) سيۋي, پرەزيدەنت جانىنداعى ۇعا پرەزيدەنتىنىڭ مىندەتىن اتقارۋشى لياززات ەراليەۆا, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ باسقارما توراعاسى-رەكتور مارات شورانوۆ, قحر الماتىداعى باس كونسۋلى تسزيان ۆەي, سونداي-اق ء«ومىر جانە دەنساۋلىق تۋرالى عىلىمدار» سالاسىنداعى جەتەكشى عالىمدار قاتىستى.
الماتى قالاسىنداعى قحر باس كونسۋلى تسزيان ۆەي قۇتتىقتاۋ ءسوز سويلەپ, مەملەكەتارالىق ىنتىماقتاستىق ماسەلەسىنە توقتالىپ وتسە, ۇعا پرەزيدەنتىنىڭ مىندەتىن اتقارۋشى لياززات ەراليەۆا اكادەميانىڭ قىزمەتى, جاڭا قۇرىلىپ جاتقان زەرتحانا تۋرالى اقپارات بەردى. شەنچجەن ۋنيۆەرسيتەتى عىلىمي قىزمەتىنىڭ ناتيجەلەرىنە پروفەسسور سينچجي (كساۆەر) سيۋي توقتالىپ, حالىقارالىق جوبالاردىڭ ماڭىزى تۋرالى ايتتى. 1983 جىلى ىرگەتاسى قالانعان شەنچجەن ۋنيۆەرسيتەتى بيومەديتسينالىق ينجەنەريا جانە بيولوگيا بويىنشا PhD ماماندارىن دايارلايدى. USNews الەمدىك رەيتينگىندە وزىندىك ورنى بار وقۋ ورنىندا بۇگىندە 250-دەن استام حالىقارالىق وقىتۋشى جۇمىس ىستەيدى.
شەنچجەن – الماتى مەديتسينا عىلىمدارىنىڭ الدىڭعى قاتارلى زەرتحاناسىنىڭ ءبىر فيليالى الماتى قالاسىنداعى ۇلتتىق عىلىم اكادەمياسىندا, ال ەكىنشىسى شەنچجەن ۋنيۆەرسيتەتىندە ورنالاسادى. بىرلەسكەن ىنتىماقتاستىق اياسىندا تابيعي ونىمدەردەن دارىلىك پرەپاراتتار ازىرلەۋدى, گەنوم زەرتتەۋلەرىن, ينفەكتسيالىق يممۋنيتەت پەن قابىنۋدى, سونداي-اق مەديتسينالىق جابدىقتاردى ازىرلەۋ جوسپارلانىپ وتىر. العاشقى زەرتتەۋلەر «فيتوشيكىزات نەگىزىندە جاڭا دارىلىك كانديداتتاردىڭ كوپماقساتتى ازىرلەمەسى» جوباسىمەن باستالماقشى.
سالتاناتتى راسىمدە, سونىمەن بىرگە ۇلتتىق عىلىم اكادەمياسى, شەنچجەن ۋنيۆەرسيتەتى جانە س.اسفەندياروۆ اتىنداعى قازۇمۋ اراسىنداعى ۇشجاقتى مەموراندۋمعا قول قويىلدى. مەموراندۋم اكادەميالىق جانە مەديتسينالىق مەكەمەلەر اراسىنداعى بايلانىستى نىعايتۋعا, بىرلەسكەن عىلىمي زەرتتەۋلەر جۇرگىزۋگە, ءبىلىم مەن تاجىريبە الماسۋعا, سونداي-اق ءبىلىم بەرۋ باعدارلامالارىن, جوبالارىن ىسكە اسىراتىن تىڭ باستامالارعا سەرپىن بەرەدى.
الماتى
