فوتو: سەنات
دەپۋتات استراحان اۋدانىنداعى ستارىي كولۋتون اۋلىندا اۋىل تۇرعىندارىمەن كەزدەسىپ, سۋعا شايىلىپ كەتكەن كىرەبەرىس جولدى جوندەۋ, دارىگەرلىك-امبۋلاتوريالىق پۋنكت سالۋ ماسەلەلەرىن تالقىلادى. تاسقىن كەزىندە اۋىلدا 89 ءۇي سۋ استىندا قالعان بولاتىن. كوميسسيا مۇشەلەرى 28 ءۇي اپات جاعدايىندا ەكەنىن بەلگىلەدى. دەپۋتات وسى ماسەلە بويىنشا بارلىق قاجەتتى سمەتالىق قۇجاتتار بار ەكەنىن, ال جوبالار قارجىلاندىرۋدىڭ باستالۋىن كۇتىپ وتىرعانىن اتاپ ءوتتى.
«سەناتورلار وڭىرلەردە جايلى ءومىردى قالىپتاستىرۋ جونىندەگى اۋقىمدى دا كەشەندى مىندەتتەردى اتقارۋعا جۇمىلىپ وتىر. ازاماتتاردىڭ بىزگە كەلىپ تۇسكەن وتىنىشتەرىنىڭ كوپشىلىگى تۇرعىن ءۇي, جول, جىلۋ, سۋمەن جابدىقتاۋ ماسەلەلەرىنە قاتىستى. بۇل ماسەلەلەر – ماڭىزدى جانە ءوڭىردى دامىتۋ نەگىزىنىڭ ءبىرى. ءبىز جىل بويى وسى ماسەلەلەر بويىنشا جەرگىلىكتى اتقارۋشى جانە وكىلدى ورگاندارمەن, ونىڭ ىشىندە وسى اۋدان اكىمدىگىمەن دە تىعىز جۇمىس ىستەدىك», دەدى ت.ءجۇنىسوۆ.
دەپۋتات بۇلاندى اۋدانىنداعى كاپيتونوۆكا, يۆانكوۆكا اۋىلدارىندا تاسقىننان زارداپ شەككەن ازاماتتارعا ارناپ سالىنىپ جاتقان ۇيلەر قۇرىلىسىمەن تانىستى. ودان كەيىن ۆوزنەسەنكا اۋلىنداعى شارۋا قوجالىعىنىڭ القاپتارىن ارالادى, اۋىلدىڭ ورتا مەكتەبىندە جۇرگىزىلىپ جاتقان جوندەۋ جۇمىستارىن كورىپ شىقتى. وسى ءبىلىم بەرۋ مەكەمەسىندە ول اۋدان مۇعالىمدەرىمەن كەزدەسىپ, ءبىلىم سالاسىنداعى وزەكتى ماسەلەلەردى تالقىلادى.
«حالىقپەن مۇنداي كەزدەسۋلەردىڭ ماڭىزى زور. مەملەكەتتىك قولداۋ ىسىندە قيىندىققا كەز بولعان نەمەسە سەناتتىڭ ارالاسۋىن قاجەت ەتەتىن پروبلەماعا تاپ بولعاندا وڭىرلەردىڭ مۇددەسىن بىلدىرەتىن پالاتا رەتىندە ازاماتتارمەن تىكەلەي كەرى بايلانىس جاساۋعا مۇمكىندىك بەرەدى», دەپ اتاپ ءوتتى سەناتور.
