«اۋىلدىق جەرلەردى تۇراقتى دامىتۋدى قامتاماسىز ەتۋ ءۇشىن ەلىمىزدىڭ وڭتۇستىك وڭىرلەرىندە شولەيتتەنۋ ءۇردىسىنىڭ الدىن الۋدا تابيعي-اۋىلشارۋاشىلىق جۇيەلەرىن ورنىقتى باسقارۋدى عىلىمي-قولدانبالى نەگىزدەۋ» باعدارلاماسىنا قاتىستى عىلىمي زەرتتەۋ جۇمىستارىنىڭ شەڭبەرىندە گەوگرافيا, جەرگە ورنالاستىرۋ جانە كاداستر, كارتوگرافيا جانە گەوينفورماتيكا, بيوالۋانتۇرلىلىك جانە بيولوگيالىق رەسۋرستار كافەدرالارىنىڭ پروفەسسور-وقىتۋشىلىق قۇرامى, سونىمەن قاتار عارىشتىق تەحنولوگيالار جانە جەردى قاشىقتىقتان زوندتاۋ ورتالىعىنىڭ قىزمەتكەرلەرى دالالىق ەكسپەديتسياعا قاتىستى.
«دالالىق القاپتاردىڭ شولەيتتەنۋىن باقىلاۋ باعدارلاماسى كليماتتىڭ وزگەرۋىمەن كۇرەسۋگە باعىتتالعان تۇراقتى دامۋدىڭ ەكوجۇيەلەردى ساقتاۋ تۇجىرىمدارىن باسشىلىققا الادى. ەكسپەديتسيا بارىسىندا اۋىل شارۋاشىلىعى جانە جايىلىمدىق جەرلەردى پايدالانۋدىڭ قازىرگى جاعدايى, شولەيتتەنۋ سالدارى, سونداي-اق اۋماقتارعا قاتىستى عىلىمي-قولدانبالى ۇسىنىستار ازىرلەندى. اۋىل شارۋاشىلىعى مەن جايىلىمدى پايدالانۋ ءۇشىن تابيعي جانە انتروپوگەندىك تابيعي-اۋىلشارۋاشىلىق جۇيەلەرىن قامتيتىن بارلىعى 100-گە جۋىق ورىنعا باقىلاۋ جاسالدى», دەيدى جوبا جەتەكشىسى, PhD ءسانىم بيسەنباەۆا.
دالالىق جۇمىستاردى جۇرگىزۋ بارىسىندا توپىراق ۇلگىلەرى جيناقتالىپ, دروندار ارقىلى تابيعي-اۋىلشارۋاشىلىق جۇيەلەرىنىڭ جانە وسىمدىك جامىلعىسىنىڭ سيپاتتاماسى جاسالعان. كەيبىر باقىلاۋ نۇكتەلەرىندە تابيعي جانە جاساندى تاۋ جىنىستارى زەرتتەلدى. سونىمەن بىرگە جەردى قاشىقتىقتان زوندتاۋ دەرەكتەرىمەن سالىستىرۋ ءۇشىن باقىلاۋ نىساندارىندا جەتەكشى فيزيكالىق-گەوگرافيالىق جانە گەومورفولوگيالىق ۇدەرىستەر تالداندى. دالالىق اۋماقتاردان جينالعان دەرەكتەر وڭدەلىپ, جينالعان مالىمەتتەردىڭ بازاسى ءتۇزىلىپ, بەينە جانە فوتوماتەريالدار قورى جيناقتالدى.
الماتى
