زەرەندى اۋدانىندا 19 مىڭ شارشى مەتردەن اسا تۇرعىن ءۇي پايدالانۋعا بەرىلدى. ىلكىمدى اتقارىلعان ءىس اۋداندا پاتەر كەزەگىندە تۇرعانداردىڭ سانىن مەيلىنشە قىسقارتۋعا سەپتىگىن تيگىزىپ جاتىر. الەۋمەتتىك جاعىنان از قامتىلعان ادامدار دا جاقسىلىققا كەنەلىپ, شات-شادىمان بولىپ قالدى. جارقىراعان جاڭا ۇيلەردىڭ كىلتىن وبلىس اكىمى مارات احمەتجانوۆ تابىس ەتتى.
– ەل پرەزيدەنتى قاسىم-جومارت توقاەۆ ءبىرىنشى كەزەكتە ادامداردىڭ ءومىر ءسۇرۋ ساپاسىن جاقسارتۋعا باعىتتالعان الەۋمەتتىك جوبالاردى جۇزەگە اسىرۋعا ەرەكشە نازار اۋدارىپ وتىر. بۇل اراداعى ەڭ باستى ماسەلە – تۇرعىن ۇيمەن قامتاماسىز ەتۋ. ءۇيى جوقتىڭ كۇيى بولمايتىنى بەلگىلى. بۇل تاراپتاعى ماسەلەلەردى شەشۋ ءۇشىن مەملەكەتتىك باعدارلامالار قابىلدانىپ وتىر. جاڭا جۇمىس ورىندارى اشىلىپ جاتىر. جەرلەستەرىمىز تۇراتىن زامان تالابىنا ساي جاقسى ۇيلەر سالىنىپ جاتىر. ەڭ باستىسى, حالىقتىڭ ءال-اۋقاتىن جاقسارتۋ, – دەدى وبلىس اكىمى.
كوپبالالى انالاردىڭ ءبىرى گۇلزادا اقپاەۆا جارىمەن بىرگە بەس بالا تاربيەلەپ وتىر. ارينە, جەكە ءۇي سالىپ الۋعا مۇمكىندىكتەرى بولماعان. 2012 جىلدان بەرى ءۇي كەزەگىندە تۇردى. ەندى, مىنە, مەملەكەتتىڭ قامقورلىعىنىڭ ارقاسىندا وزىمىزدىكى دەگەن ساۋلەتتى دە كەڭ پاتەر بەرىلىپ وتىر. قولىنا باسپانا كىلتىن ۇستاعان انانىڭ جان دۇنيەسى قامقورلىق شۋاعىمەن نۇرلانىپ, كوڭىلى دە بوساپ كەتتى. اسىرەسە بالالاردىڭ قۋانىشىندا شەك جوق. وسى ارادا بالا قۋانتۋدىڭ ءوزى باقىتتى ءسات-اۋ دەگەن وي كەلدى. جاڭا پاتەرلەر ءبىلىم وشاعىنا تاياقتاستام جەردە. جاقىن ارادا تۇرمىسقا قاجەتتى نىسانداردىڭ ءبارى بار.
انالار وسىنداي شۋاققا بولەگەن مەملەكەت باسشىسىنا اق العىسىن جاۋدىرىپ جاتىر. انا العىسىن العان ادامنىڭ الدىنان باقىت قاقپاسى اشىلارى ءسوزسىز.
اقمولا وبلىسى,
زەرەندى اۋدانى
