Street art – قالالىق كەسكىندەمە ونەرىنىڭ ءبىر ءتۇرى. العاشقى قابىرعا سۋرەتىنىڭ قاشان پايدا بولعانىن ءدوپ باسىپ ايتا الماسپىز. الايدا بۇل ونەر ءتۇرىنىڭ تاريحى تىم ارىدا جاتقانى – اقيقات. تاسقا قاشالعان تاڭبالار, ودان كەيىن رەنەسسانس داۋىرىندەگى ءدىني فرەسكالار, امەريكا كوشەلەرىندەگى جاسوسپىرىمدەر جازبالارى – مۇنىڭ بارلىعى بۇگىنگى street art ونەرىنىڭ ارعى ارنالارى.
وسى ورايدا پرەزيدەنت ورتالىعى ديرەكتورىنىڭ ورىنباسارى بوتاكوز قايىپوۆا گراففيتي سۋرەتشىلەرىنىڭ جۇمىستارى زاماناۋي ونەردىڭ دەربەس جانرى, قالالىق مادەنيەتتىڭ اجىراماس بولىگى ەكەنىن اتاپ ءوتتى.
ال سۋرەتشى ءارى ءمۇسىنشى سىرىم مۇسىرەپوۆ «Astana Graffiti» فەستيۆالى street art ونەرىنىڭ ىلگەرىلەۋىنە, ونىڭ قوعام ىشىندە قولداۋ تابۋىنا ىقپال ەتەتىنىن جەتكىزدى.
ءىس-شاراعا قاتىسۋشى, گراففيتي سۋرەتشى ۋليانا ەۆدوكيموۆانىڭ ايتۋىنشا, بۇل ونەردىڭ ىلكى باستاۋى قىلمىس الەمىمەن بايلانىستى بولعان. بىراق قازىرگى تاڭدا بۇل – جاستاردىڭ كلاسسيكالىق كەسكىندەمەنىڭ شەكاراسىنان شىعىپ, ەركىن شىعارماشىلىقپەن اينالىساتىن كەڭىستىك.
«Street art – كوشە قابىرعالارىندا بەينەلەنگەن جانىڭنىڭ ايناسى ياكي ساناڭنىڭ ساۋلەسى. بۇل كوپشىلىككە ۇنايدى. حالىق سۇلۋلىقتى قالايدى. سول سەبەپتى ونى ساۋلەتتى استانامىزعا سىيلاعىم كەلەدى. وتكىزىلىپ جاتقان فەستيۆالدىڭ ەڭ ۇناعان جەرى مۇندا ونەرگە تالابى بار كەز كەلگەن سۋرەتشى تۋىندىسىن ەل نازارىنا ۇسىنا الادى. بۇل تۋىندىگەرگە ۇلكەن شابىت, الداعى جۇمىسىنا قۋات سىيلايدى», دەيدى ول.
10 تامىزعا دەيىن جالعاساتىن بۇل فەستيۆالدا تانىمال سۋرەتشىلەردىڭ شەبەرلىك دارىستەرى ءوتىپ, ارنايى كونتسەرتتىك باعدارلاما ۇسىنىلاتىن بولادى.
