«Fruitart» زاۋىتى – «Kazakh Invest» ۇلتتىق كومپانياسىنىڭ جوباسى, جىلىنا 15 000 توننا ءونىم وندىرەدى. كاسىپورىن ءونىمى كورپوراتيۆتىك كليەنتتەرگە جانە بولشەك ساۋدا جەلىلەرىنە, سونىڭ ىشىندە ەۋروپا وداعى, اقش, جاپونيا, وڭتۇستىك كورەيا سىندى دامىعان ەلدەر نارىعىنا مۇزداتىلعان كەپتىرىلگەن جەمىستەر مەن جيدەكتەر جەتكىزىلەدى. سونداي-اق قىتاي مەن رەسەي نارىعىنا ەكسپورتتالادى. وندا 350 ادام جۇمىس ىستەيدى.
دەپۋتاتتار مەملەكەت باسشىسىنىڭ رەفورمالارىن جۇزەگە اسىرۋ اياسىندا وزدەرىنىڭ زاڭنامالىق جۇمىستارى مەن كاسىپكەرلىكتى دامىتۋدى مەملەكەتتىك قولداۋ شارالارى تۋرالى حاباردار ەتتى.
«مەملەكەت باسشىسى قاسىم-جومارت توقاەۆ اۋىل شارۋاشىلىعى ونىمدەرىن وڭدەيتىن وتاندىق زاماناۋي كاسىپورىندار سالۋ جايىندا ۇكىمەتكە تاپسىرما بەرگەن ەدى. مىنا «FRUITART» زاۋىتى – سونىڭ ءبىرىنشى كورىنىسى, العاشقى زاماناۋي كاسىپورىن. ونىڭ جۇمىسىمەن تانىسۋ ءۇشىن ارنايى كەلدىك», دەدى ماجىلىستەگى «اۋىل» پارتياسى فراكتسياسىنىڭ جەتەكشىسى سەرىك ەگىزباەۆ.
دەپۋتاتتار كاسىپورىننىڭ جۇمىسىمەن تانىسقاننان كەيىن, ەڭبەك ۇجىمىمەن كەزدەسىپ, كوپتەگەن وزەكتى ماسەلەنى تالقىلادى. زاۋىت باسشىلىعى دەپۋتاتتارعا جەتىستىكتەرىمەن قاتار كۇرمەۋلى ماسەلەلەرى جايىندا دا ايتىپ, كومەك سۇرادى. كاسىپورىن جەتەكشىلەرىنىڭ ايتۋىنشا, زاۋىت جوبا بويىنشا العان قارىزىن تولىق يگەرگەن. الايدا كومپانيا بارلىق ينۆەستيتسيالىق كرەديت سىياقىسىنىڭ تولىق مولشەرلەمەسىن ءوز ەسەبىنەن قارجىلاندىرۋعا ءماجبۇر بولىپ وتىر. سەرىكتەستىك وكىلدەرى «الماتى قالاسىنىڭ كاسىپكەرلىك جانە ينۆەستيتسيالار باسقارماسى» كمم سۋبسيديالار بويىنشا بەرەشەگى قازىر 3,8 ملرد تەڭگە ەكەنىن ايتتى. جىل سوڭىنا دەيىن بۇل قارىز 5,4 ملرد تەڭگەگە جەتەدى. كاسىپورىن باسشىلىعى دەپۋتاتتاردان ينۆەستيتسيالىق سۋبسيديا الۋعا جانە مولشەرلەمەنى جىلدىق 6 پايىزعا دەيىن تومەندەتۋگە كومەكتەسۋدى سۇرادى.
دەپۋتاتتار كاسىپورىن وكىلدەرىنىڭ ماسەلەلەرىن تىڭداعان سوڭ, نازارعا الاتىنىن ايتتى.
