اتىراۋداعى كىتاپحاناعا سالىق زيمانوۆ تۋرالى كىتاپتار تابىستالدى

اتىراۋ. 21 قاڭتار. اتىراۋ وبلىستىق ع.سلانوۆ اتىنداعى عىلىمي امبەباپ كىتاپحانادا قوعام قايراتكەرى, كورنەكتى عالىم سالىق زيمانوۆ تۋرالى جارىققا شىققان قوس كىتاپ  تابىستالدى. بۇل تۋرالى egemen.kz ءتىلشىسى حابارلادى. ەكىنشى دۇنيەجۇزىلىك سوعىستان امان ورالىپ, وبلىستىق, كەيىننەن رەسپۋبليكالىق پروكۋراتۋرادا جەمىستى ەڭبەك ەتكەن سالىق زيمانوۆ وسى سالادا دوكتورلىق ديسسەرتاتسيا قورعاعان. زاڭ عىلىمىنىڭ دامۋىنا لايىقتى ۇلەسىن قوسقان زاڭعار زاڭگەر شاكىرت تاربيەلەدى, تاۋەلسىز قازاقستاننىڭ مەملەكەتتىلىگىن قالىپتاستىرۋعا دا ەرىنبەي ەڭبەك ەتتى. زاڭعار زاڭگەردىڭ عالىمدىق, ازاماتتىق ءومىر جولى بارشانى قىزىقتىرادى. ونىڭ ساليقالى وي-تولعامدارى, تۇلعا رەتىندەگى قالىپتاسۋ كەزەڭى «سالىك زيمانوۆ. ماتەريالى ي بيبليوگرافي» جانە «عىلىمداعى عاسىر ابىزى, اكادەميك سالىق زيمانوۆ» اتتى زەرتتەۋ كىتاپتارىنا ارقاۋ بولعان. بۇل كىتاپتاردا زاڭعار زاڭگەردىڭ ەلباسى نۇرسۇلتان نازارباەۆقا ارناپ جازعان حاتتارى, ۇسىنىس-پىكىرلەرى توپتاستىرىلعان. سونىمەن بىرگە, «سالىق زيمانوۆ ومىرىنەن ومىرىنەن ءبىر كۇن» دەگەن بولىمدە ونىڭ ەگەمەن ەل دەكلاراتسياسى قاتىستى اڭگىمەلەرى, قازاق ءتىلىنىڭ بۇگىنگى قولدانىسى مەن بولاشاعى حاقىنداعى ويلارى وقىرمان قىزىعۋشىلىعىن تۋدىرادى. وسى كىتاپتاردىڭ جارىق كورۋىنە ىقپال ەتكەن سەناتور سارسەنباي ەڭسەگەنوۆ «سالىق اعامىزدىڭ: «ەلباسى مەنىڭ ءسوزىمدى قۋاتتاپ, ورنىنان ون ءبىر رەت كوتەرىلدى» دەگەن ءسوزىن تەبىرەنىسپەن وقىدىم» دەگەن پىكىرىمەن ءبولىستى. ايتقانداي, قوس كىتاپتىڭ اۆتورى – تاريح عىلىمدارىنىڭ دوكتورى, پروفەسسور ءىلياس قوزىباەۆ. تاريحشى عالىمنىڭ اكادەميك تۋرالى زەرتتەۋ كىتاپتارىن پارلامەنت سەناتىنىڭ دەپۋتاتى سارسەنباي ەڭسەگەنوۆ ع.سلانوۆ اتىنداعى وبلىستىق عىلىمي امبەباپ كىتاپحاناعا تاپسىردى. سونىمەن بىرگە, سالىق زيمانوۆ ءبىلىم العان جامبىل اتىنداعى №21 ورتا مەكتەپتىڭ كىتاپحاناسىنا دا وسىنداي كىتاپتار تارتۋ ەتىلدى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.