قوستانايدان الماتىعا فيرمالىق پويىز قاتىنايدى

قوستاناي. 21قاڭتار. كەشە ءبىرىنشى رەت №43/44 قوستاناي-الماتى جولاۋشىلار پويىزى فيرمالىق دارەجەسىن الىپ, «توبىل» اتاۋىمەن اتتانىپ كەتتى. بۇل تۋرالى egemen.kz ءتىلشىسى حابارلادى. «توبىل» – بەسىنشى وتاندىق فيرمالىق پويىز (وسىعان دەيىن «بايتەرەك», «وتىرار», «ماڭعىستاۋ», «كاسپي» ىسكە قوسىلدى) بولىپ سانالادى. اتىنا زاتى ساي ول فيرمالىق پويىزدىڭ بارلىق تالاپتارى مەن ستاندارتتارىنا ساي ۆاگونداردان جاساقتالعان. ۆاگوندار قىسقى-جازعى ماۋسىمداردا وڭتايلى تەمپەراتۋرانى قامتاماسىز ەتەتىن اۋا باپتاۋ جانە جىلىتۋ جۇيەلەرىمەن جابدىقتالعان. سونىمەن قاتار, ولار ۆاگون ىشىندەگى تەمپەراتۋرا, ناقتى ۋاقىت تۋرالى اقپارات بەرەتىن جارىق ديودتى تاقتالارمەن قامتاماسىز ەتىلگەن. ستاندارتتى قىزمەتتەردەن بولەك كۋپەلىك ۆاگونداردا قوسىمشا سانيتارلىق-گيگيەنالىق جاعداي تولىق جاسالعان. كۋپەلىك جانە پلاتسكارتتىق ۆاگون جولاۋشىلارىنا كوفە, شاي, قانت, قاسىقتار, ءبىر رەت پايدالاناتىن ستاقاندارى بار شاي توپتامالارى ۇسنىلادى, مۇنداي قولايلى جاعداي بالالارعا ارنالادى. ۆاگوندار جاڭا توسەك-ورىن جابدىقتارى, ستولدارعا ارنالعان جايمالار, كيىمگە ارنالعان ىلگىشتەر سىندى جوعارى ساپالى كەرەك-جاراقتارمەن قامتاماسىز ەتىلگەن, ۆاگون ىشىندە كىلەم توسەلگەن. سونىمەن قاتار, جولاۋشىلار مۇزداتقىش, قىسقا تولقىندى پەشتەر مەن سەيف قىزمەتىن پايدالانا الادى. فيرمالىق پويىزدىڭ قىزمەت تىزىمىندە جاڭا ءباسپاسوز ونىمدەرى, سۋى بار ديسپەنسەرلەر, ۆاگون-مەيرامحانانىڭ توىققاندى اس ءمازىرى, جولاۋشىلاردى ەلەكتروندىق بيلەتپەن پويىزعا وتىرعىزۋ (جولاۋشىنى وتىرعىزۋدى اۆتوماتتاندىرىلعان باقىلاۋ) بار. پويىز ءىرى ستانتسيالاردان اتتانعان كەزدە مونيتورلار ارقىلى جولدا ءجۇرۋ ەرەجەلەرى مەن وزگە دە قاجەتتى اقپاراتتار جاريالانادى. پويىز قۇرامىندا مۇمكىندىگى شەكتەۋلى ازاماتتارعا ارنالعان جانە كەز كەلگەن بيىكتىكتەگى پلاتفورمادان ۆاگون ىشىنە كىرۋگە مۇمكىندىك بەرەتىن ارنايى كوتەرگىش قۇرىلعىسىمەن جابدىقتالعان ۆاگون بار. وسى ساناتتاعى ازاماتتاردىڭ كەڭەيتىلگەن كۋپەسىندە مۇگەدەكتەر ارباسىنا ورىن, كۋپە ىشىندە ءجۇرىپ-تۇرۋعا مۇمكىندىك بەرەتىن جاقتاۋلار مەن اقپاراتتىق تاقتا ورناتىلعان. قوستانايدان شىققان جولاۋشى وسىنداي قولايلى پويىزبەن الماتىعا شارشاماي جەتەدى. ءنازيرا جارىمبەتوۆا. دەرەك, سۋرەت: egemen.kz.