ەلىمىزدە تىركەلگەن قىلمىستار سانى 5,2 پايىزعا كەمىگەن

استانا. 21 قاڭتار. ەلىمىزدە وتكەن جىلى 2013 جىلدىڭ وسىنداي كەزەڭىمەن سالىستىرعاندا تىركەلگەن قىلمىستار دەڭگەيى 5,2 پايىزعا (359 844-تەن 341 291-گە) ازايدى. بۇل تۋرالى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءباسپاسوز قىزمەتى حابارلادى. قىلمىستىڭ بارلىق تۇرلەرى بويىنشا تومەندەۋ بايقالدى, ونىڭ ىشىندە اسا اۋىر قىلمىستار – 18,2 پايىزعا (2629-دان 2150-گە), اۋىر قىلمىستار – 17,4 پايىزعا (33 836-دان 27 941-گە), اۋىرلىعى ورتاشا قىلمىستار – 2,8 پايىزعا (279 389-دان 271 592-گە), اۋىر ەمەس قىلمىستار 10 پايىزعا (43 990-نان 39 608-گە) ازايعان. مەملەكەتتىك ورگانداردىڭ قىلمىستىڭ پروفيلاكتيكاسى بويىنشا ءىس-ارەكەتتەرىن ۇيلەستىرۋ ولاردىڭ نەگىزگى قۇرىلىمىن قۇرايتىن قىلمىستاردىڭ تومەندەۋىنە مۇمكىندىك بەردى. ماسەلەن, وتكەن جىلى ۇرلىق جاساۋ –1,5 پايىزعا, ونىڭ ىشىندە ۇيگە ۇرلىققا ءتۇسۋ – 2,9 پايىز, بۇزاقىلىق –15 پايىزعا, ال توناۋ 24 پايىزعا ازايعان, قىلمىستىڭ بۇل تۇرلەرى ەلىمىزدە جاسالعان بارلىق قىلمىستاردىڭ 72 پايىزىن قۇرايدى. سونداي-اق, الكوگولدىك ىشىمدىككە جانە ەسىرتكىگە ماس بولۋ جاعدايىندا جاسالعان قىلمىستار – 4,3 پايىزعا, كامەلەتكە تولماعاندار جاساعان قىلمىستار –16,9 پايىزعا ازايسا, كوشەدە جاسالعان قىلمىستار – 10,5 پايىزعا, ال قايتالاما قىلمىستار – 7,2 پايىزعا تومەندەگەن. سول سياقتى, الەم بويىنشا ناقتى كريمينوگەندى جاعدايعا باعا بەرەتىن ينديكاتور بولىپ سانالاتىن قىلمىستاردىڭ دا تومەندەگەنى بايقالادى. ماسەلەن, كىسى ءولتىرۋ سانى 19,3 پايىزعا, قاراقشىلىق 29,7 پايىزعا كەمىسە, بوپسالاۋ 19,2 پايىز ازايعان. قوعامداعى ناقتى قىلمىستىلىق احۋالىن كورسەتەتىن ءدال وسى قىلمىستار. استانا, الماتى قالالارى جانە سولتۇستىك قازاقستان مەن وڭتۇستىك قازاقستان وبلىستارىن قوسپاعاندا, قىلمىستىڭ ازايۋى ەلىمىزدىڭ بارلىق وڭىرلەرىندە بايقالادى. جولدىباي بازار. دەرەك: قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءباسپاسوز قىزمەتى. سۋرەت: prokuror.gov.kz.