پاۆلودارداعى اليۋميني زاۋىتىنا جاڭا باسشى تاعايىندالدى

پاۆلودار. 21 قاڭتار. ەۋرازيالىق توپقا (ERG) كىرەتىن «قازاقستان ءاليۋمينيى» اق ديرەكتورلار كەڭەسىنىڭ شەشىمىمەن باسقارما توراعاسى – اكتسيونەرلىك قوعامنىڭ پرەزيدەنتى بولىپ ارمان بەكەت ۇلى ەسەنجولوۆ تاعايىندالدى. بۇل تۋرالى egemen.kz ءتىلشىسى حابارلادى. سونداي-اق ديرەكتورلار كەڭەسىنىڭ شەشىمىمەن كاسىپورىننىڭ جاڭا ۇيىمدىق قۇرىلىمى قابىلداندى. ال, كاسىپورىننىڭ بۇرىنعى باسشىسى الماز يبراگيموۆ «قازاقستان ەلەكتروليز زاۋىتى» اق-تا ارى قاراي  كاسىپورىن قۇرىلىمىندا جۇمىسىن جالعاستىرادى. 51 جاستاعى ارمان ەسەنجولوۆ ماسكەۋدەگى بولات جانە قورىتپا ينستيتۋتىن «قارا مەتالدار مەتاللۋرگياسى» ماماندىعى بويىنشا ءبىتىردى, م. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ىسكەر اكىمشىلىك شەبەرى بىلىكتىلىك دارەجەسىن الدى. تەحنيكالىق عىلىمداردىڭ كانديداتى جانە عىلىمي دايىندامالاردىڭ اۆتورى, پاتەنتتەرى مەن اۆتورلىق كۋالىكتەرى بار. ارمان بەكەت ۇلى ەۋرازيالىق توپ قۇرىلىمىندا 30 جىلعا تاياۋ جۇمىس اتقاردى. ول جۇمىسىن 1986 جىلى ەۋرازيالىق توپ قۇرامىنداعى ««كازحروم» تۇك» اق فيليالى – اقتوبە فەرروقورىتپا زاۋىتىندا باستادى. وسى جەردە كاسىپورىننىڭ باس ينجەنەرىنە دەيىنگى كاسىبي ءوسۋ جولى باسپالداعىنان ءوتتى. ءار جىلدارى لاۋازىمدى قىزمەتتەردى اتقاردى. 2014 جىلدىڭ قىركۇيەگىندە «قازاقستان ءاليۋمينيى» اق-نىڭ ءبىرىنشى ۆيتسە-پرەزيدەنتى بولىپ تاعايىندالعان بولاتىن. فاريدا بىقاي. دەرەك: egemen.kz. سۋرەت: fedpress.ru.