جامبىل وبلىسىندا ان-2 ۇشاعى اپاتقا ۇشىرادى

استانا. 21 قاڭتار. جامبىل وبلىسىنداعى «شاتىركول كەن ورنى ماڭىندا «بالقاش-شاتىركول» باعىتى بويىنشا ۇشىپ بارا جاتقان ان-2 ۇشاعى قۇلاپ, 6 ادام قازا تاپتى. بۇل تۋرالى توتەنشە جاعدايلار كوميتەتىنىڭ ءباسپاسوز قىزمەتى حابارلادى. ۇشاق قۇلاعان اۋدانعا «قازاقمىس» كورپوراتسياسى» جشس «شاتىركول» كەن ورنى قاۋىپسىزدىك قىزمەتىنىڭ قىزمەتكەرلەرى, قاراعاندى جانە جامبىل وبلىستارى توتەنشە جاعدايلار دەپارتامەنتتەرىنىڭ قۇتقارۋ بولىمشەلەرى جانە جامبىل وبلىستىق ىشكى ىستەر دەپارتامەنتىنىڭ جەدەل-تەرگەۋ توبى باردى. «قازاقمىس» كورپوراتسياسى» جشس «شاتىركول» كەن ورنىنىڭ كۇشىمەن جۇرگىزىلگەن ىزدەستىرۋ-قۇتقارۋ جۇمىستارىنىڭ ناتيجەسىندە قۇلاعان ۇشاق كەن ورنىنان 20 شاقىرىم جەردەن تابىلدى. ۇشاقتىڭ قۇلاۋىنان ەكيپاجدىڭ 3 مۇشەسى, سونداي-اق 3 جولاۋشى قازا بولدى. ال ۇشاق قۇلاعان ورىندا ءتىرى قالعان ءبىر ايەل اۋرۋحاناعا جەتكىزىلدى. قازىرگى تاڭدا توتەنشە جاعدايلار كوميتەتى اپاتتىڭ سەبەبىنە قاتىستى بولجامدى اقپارات جاريالادى. حابارلامادا كورسەتىلگەندەي, ۇستىمىزدەگى جىلدىڭ 20 قاڭتارىندا ساعات 15.40-تا, الدىن الا جاسالعان بولجام بويىنشا ۇشاق قونۋعا تاياعاندا قالىڭ تۇمان سالدارىنان جەرگە سوعىلعان. اپاتقا قاتىستى زاڭدا كورسەتىلگەن تارتىپكە سايكەس, تەرگەۋ امالدارىن جامبىل وبلىسى ىشكى ىستەر دەپارتامەنتىنىڭ جەدەل-تەرگەۋ توبى جۇرگىزىپ جاتىر. جولدىباي بازار. دەرەك: توتەنشە جاعدايلار كوميتەتىنىڭ ءباسپاسوز قىزمەتى. سۋرەت: kaz.gazeta.kz.