ءيا, دۇنيەنى ءدۇر سىلكىنتكەن ءىس-شارا استانا كۇنى مەن دومبىرا كۇنى قارساڭىندا ءوتتى. بىزدىڭشە, مۇنىڭ دا رامىزدىك سايكەستىگى بار.
استانا – رۋداكي جۇرتى تىلىندە «تابالدىرىق» ۇعىمىن بەرەدى. ءبارى دە تابالدىرىقتان باستالادى. كيىز ءۇي دە, ءزاۋلىم عيمارات تا, حان سارايى دا, جاھاندىق ۇيلەسىم ارحيتەكتۋراسى دا. استانا – جاڭا ۇلت دامۋىنىڭ, مەملەكەت دامۋىنىڭ تابالدىرىعى ەدى. ەلوردانىڭ ارقا توسىنە كوشۋى, ەل مەن جەر تۇتاستىعىنا اسەر ەتۋى – ەلەۋلى تاريحي فاكت. شيرەك عاسىردا سارىتاپ تسيفر توڭكەرىلىپ ءتۇسىپ, جەرگىلىكتى حالىقتىڭ 18 پايىزدان 81 پايىزعا ءوسۋى – بەلەستى قۇبىلىس. بەينەلەپ ايتساق, تاۋەلسىزدىك تۇلەتكەن قازاقستان, بۇگىنگى ادىلەتتىكتى تەمىرقازىق ەتكەن قازاقستان ءرامىزدى تابالدىرىقتان ءساتتى ءوتتى. راس, الدىمىزدا كوپ ماقسات-مىندەت تۇر. بۇيىرسا, ول دا ەڭسەرىلەدى. ەندى ەلىمىزدىڭ تابالدىرىعىنان تورىنە دەيىن, مەملەكەت باسشىسى ايتقانداي, ادالدىق سالتانات قۇرسا, ەڭبەك ادامى قادىرلەنسە, كوپ قيىندىق ارتتا قالماق.
دومبىرا – ءبىزدىڭ كوڭىل-كۇيىمىز. ول قۋانىشتى ەسەلەندىرىپ, مۇڭ-شەردى تارقاتادى. حالىققا كۇش-قايرات بەرەدى. وسى اسپاپتىڭ قوس ىشەگى – قاشان دا بىرلىك پەن بەرەكەنى, دوستىق پەن سىيلاستىقتى مەڭزەيدى. جارىقتىق قادىر مىرزا ءالىنىڭ «ەكى ىشەكتىڭ ءبىرىن قاتتى, ءبىرىن ءسال-ءپال كەم بۇرا. قازاق - ناعىز قازاق ەمەس, ناعىز قازاق - دومبىرا! بىلگىڭ كەلسە ءبىزدىڭ جايدى, سودان سۇرا تەك قانا...» دەگەن ولەڭ جولىنا ۇلتتىڭ بار بولمىسى سىيىپ كەتكەن. قايبىر جىلى ريم پاپاسى ءىى يوانن پاۆەل استاناعا ارنايى ساپارلاپ, ەۋرازيا ۋنيۆەرسيتەتى عالىمدارىمەن كەزدەسكەندە, وعان قازاقتىڭ قارا قوبىزى تارتۋ ەتىلدى. سوندا ۆويتىلا ءپىرادار: «دومبىرا مەن قوبىز اۋەنى تىم تەرەڭ ەكەن!» دەگەن-ءدى. ءدىندار ءسوزى ديپلوماتيالىق ەتيكەت ەكەنى راس, دەگەنمەن ونى تىڭ ءارى تىلسىم مۋزىكا باۋراعانىن جوققا شىعارۋعا بولماس. سوناۋ اباي قادىرلەگەن اپلاتون (پلاتون) زامانىنان مۋزىكا – «مەملەكەتتىك تاربيەنىڭ ماڭىزدى قۇرالى». مۋزىكاتانۋشىلار ء«ال-فارابي دومبىرانىڭ اتاسى – تاڭبۋرانى جەتىلدىردى» دەپ ەسەپتەيدى. عۇلاما «اسپاپتى مۋزىكا قۇلاققا جاعىمدى ەستىلىپ, جۇرەككە جىلى تيەدى» دەپ جازىپتى. بۇل پلاتوننىڭ: «مۋزىكا الەمدى شابىتتاندىرىپ, قانات بىتىرەدى, قيالىن سامعاتادى. ول – كۇللى اسەمدىك پەن بيىكتىكتىڭ ايناسى» دەگەن ويىمەن سايكەسەدى.
مۇنى تۋرا كەشەگى شانحاي ىنتىماقتاستىق ۇيىمى جيىنى قورىتىندىسىنا قاراتىپ ايتقانداي. ساياسي پاراساتتىڭ ءجونى ءبىر بولەك, مارتەبەلى قوناقتارعا ۇسىنىلعان قازاق ونەر شەبەرلەرىنىڭ كونتسەرتى جانە سول كەشتەگى قاسيەتتى دومبىرا سازى وسى اقيقاتتى دالەلدەي ءتۇستى.
بۇل – استانا مادەنيەتىنىڭ ءبىر اسقارى. مادەنيەتتى ءبىز كوبىنە ەۋروپاشا ءھام تۇرىكشە كۇلتۇر ماعىناسىندا عانا تۇسىنەمىز. بۇعان داۋلاسىپ جاتپاسپىز. الايدا شىعىسپەن تامىرلاستاعىمىزدى العا تارتىپ, مادەنيەتتى – «وركەنيەت» دەپ پارىقتاۋ دەڭگەيىنە كوتەرىلۋىمىز كەرەك. ءابۋ ناسىر ءال-فارابي وقىپ-توقىعان جۇرتتا تسيۆليزاتسيانى «مادانياتۋن» دەيدى. بۇل جۇرەگىمىزدىڭ (ياكي قالىبىمىزدىڭ) ءبىر بۇرىشىندا تۇرعانى دۇرىس. سوندا ءبىز استانا مادەنيەتىنە, وتاندىق مادەنيەتكە ۇلەس قوسۋ ارقىلى ادامزات وركەنيەتىن دامىتقان بولامىز.
الاش كوشباسشىسى ءاليحان بوكەيحان: ء«ان-ولەڭ, كۇي – ادامنىڭ انىق تiلi, شىن تiلi, كوپكە بiردەي ۇعىمدى تiل. بۇل تiل – جانعا حاس جۇرەك تiلi, سەزiم تiلi, كۇي تiلi. نەشە ءتۇرلi راحات تاتقان ادام جانى وسى تiلمەن سويلەيدi» دەپ تۇجىرىمدايدى. بولشەۆيزمنىڭ سىڭارجاق ساياسي ۇرتوقپاعى ورشىگەندە زيالىلار «القا» اتتى ۇيىم قۇرعان-دى. القا دا بىرلەسۋدى اڭعارتادى. باعدارلاماسىنىڭ كىرىسپەسى ەل تۇسىنىگىنە ساي «تابالدىرىق» دەپ اتالدى. سونىڭ ءتۇيىنى مىناۋ: «تابالدىرىقتى اتتاپ, تورگە شىق, «القاعا» كىر!».
ءدال بۇگىن قازاقستان وسى ءرامىزدى پىكىردى الەمگە قاراتىپ ايتىپ وتىرعانداي. بۇل وي –بىرلەسۋگە نۇسقاعان يشارا ءارى باردى ارتتىرۋعا, ۇيلەسىمدى نىعايتۋعا باعىتتالعان يدەيا.
