اقتوبە ماڭىنداعى ساياجاي تۇرعىندارى تابيعي اپاتتىڭ سالدارىنان بىرنەشە ساعاتتىڭ ىشىندە ءۇي-كۇيسىز قالدى. ولار تەك قۇجاتتارىن الىپ ۇلگەرگەن. قازىر زارداپ شەككەن تۇرعىندار ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ جاتاقحاناسىنداعى ەۆاكۋاتسيالىق پۋنكتتە تۇرىپ جاتىر.
– ءساۋىر ايىندا ءۇيىمىز سۋعا كەتكەننەن بەرى ءبىز ەۆاكۋاتسيا ورتالىعىندا تۇرىپ جاتىرمىز. مۇندا بارلىق جاعداي جاسالعان. ءۇش مەزگىل تاماق بەرىلەدى, كينوعا, كونتسەرتتەرگە بيلەتتەر تاراتىلادى. پارتيا وكىلدەرى ءتورت جاسار قىزىمدى بالاباقشاعا ورنالاستىرۋعا كومەكتەستى. ءبىز جوندەۋ جۇمىستارىنا كىرىسىپ كەتتىك, جاقىن ارادا ۇيىمىزگە ورالاتىن كۇن دە الىس ەمەس, – دەيدى اقتوبە تۇرعىنى مارجانگۇل ەرنازاروۆا.
قازىرگى ۋاقىتتا ەۆاكۋاتسيا پۋنكتىندە 36 ادامدى قۇرايتىن 9 وتباسى تۇرادى. اقتوبە قالاسى بويىنشا بارلىعى 7 ۋاقىتشا ورنالاستىرۋ پۋنكتى جۇمىس ىستەيدى, وندا قازىر 695 ادام بولسا, ونىڭ 325-ءى بالا.
– باسپانادان ايىرىلۋ ءار وتباسى ءۇشىن ۇلكەن سىناق ەكەنىن تۇسىنەمىز. ءبىزدىڭ مىندەتىمىز – زارداپ شەككەندەردى ۋاقىتشا ورنالاستىرۋمەن قاتار, ولاردى مۇمكىندىگىنشە تەزىرەك قالىپتى ومىرگە ورالۋىنا كومەكتەسۋ. ءبىز سۋ تاسقىنىنان زارداپ شەككەندەردىڭ ارقايسىسىنا قولداۋ مەن قاجەتتى كومەكتى الۋى ءۇشىن بار كۇشىمىزدى سالامىز. بىرلەسكەن كۇش-جىگەرىمىزبەن ءبىز بارلىق قيىندىقتى ەڭسەرەمىز, – دەدى ءماجىلىس دەپۋتاتى قازىبەك الىشەۆ.
سۋ تاسقىنىنان زارداپ شەككەن اقتوبە وبلىسىنىڭ تۇرعىندارىنا ارناپ 517 ءۇي سالىنىپ جاتىر. سونىمەن قاتار مەملەكەت ەسەبىنەن 383 پاتەر ساتىپ الىندى.
