سونىمەن قاتار «ىلە-الاتاۋ» كاسىبي كلۋبى دا قۇرىلعان. ونداعى سپورتشىلار قازاقستاننىڭ 2-ليگا ويىنىندا الماتى وبلىسىنىڭ ابىرويىن رەسپۋبليكالىق دەڭگەيدە قورعايتىن بولادى. جاسىل الاڭ يەلەرىنىڭ باسەكەلى جارىستارى جالعاسىن تاۋىپ كەلەدى.
جۋىردا ىلە اۋدانىنىڭ ورتالىعى وتەگەن باتىر اۋىلىنداعى جاسوسپىرىمدەر سپورت مەكتەبىنىڭ ستاديونىندا العاش رەت «الماتى وبلىسى اكىمىنىڭ كۋبوگى» ءۇشىن فۋتبولدان وبلىستىق تۋرنير ۇيىمداستىرىلدى. وعان وبلىس اۋداندارى مەن قوناەۆ قالاسىنان ىرىكتەلگەن كوماندالار قاتىسىپ, تارتىستى ويىن ورنەگىن كورسەتتى.
«وبلىستا بۇقارالىق سپورتتى دامىتۋعا مەملەكەتتىك قولداۋ كورسەتۋدىڭ ناتيجەسىندە زاماناۋي سپورت نىساندارى سالىنىپ, ماتەريالدىق-تەحنيكالىق بازا جاڭارتىلۋدا. بارلىق اۋدانداردا دەنە شىنىقتىرۋ-ساۋىقتىرۋ كەشەندەرى جۇمىس ىستەيدى. حالىقارالىق جارىستاردا توپ جارعان سپورتشىلارىمىزدىڭ جەتىستىكتەرى جەتىپ-ارتىلادى. بيىل پاريجدە وتەتىن وليمپيا ويىندارىنا الماتى وبلىسى سپورتشىلارىنىڭ 5 ليتسەنزيا جەڭىپ الۋى – ءبىز ءۇشىن ۇلكەن جەتىستىك. وسى جارىستا دايىندىقتارىڭىزدىڭ جوعارى دەڭگەيى مەن سپورتتىق شەبەرلىكتەرىڭىزدى كورسەتە الاتىندارىڭىزعا سەنىمدىمىن», – دەگەن ءوڭىر باسشىسى مارات سۇلتانعازيەۆ فۋتبول كوماندالارىنا ساتتىلىك تىلەدى.
سايىسقا وبلىستىڭ بارلىق اۋداندارى مەن قوناەۆ قالاسىنان 10 كوماندا قاتىستى. تارتىستى ءتۋرنيردىڭ قورىتىندىسى بويىنشا ۇزدىك ويىن كورسەتكەن قوناەۆ قالاسىنىڭ كومانداسى 1-ورىندى يەلەنىپ, جەڭىمپاز اتاندى. ال كەگەن اۋىلىنىڭ جاستارى 2-ورىندى يەلەنسە, ىلە اۋدانىنىڭ فۋتبول كومانداسى 3-ورىنعا تۇراقتادى.
فۋتبول ماۋسىمىن اشقان بۇل تۋرنير الداعى ۋاقىتتا ءوڭىردىڭ بارلىق اۋداندارىندا وتەتىن الا دوپ بايگەسىنىڭ باستاۋى بولعانى انىق.
الماتى وبلىسى
