ايسۇلتان ءاۋ باستا قاراپايىم گيپس ۇنتاعىنا زەرتتەۋ جاساپ, ودان نە شىعارۋعا بولاتىنىن انىقتاعان. گيپستى قۇرىلىسقا, تاعى دا باسقا قاجەتتىلىكتەرگە پايدالانۋعا بولادى. سونىڭ بارىنە تاجىريبە جاساپ, سوڭىندا گيپستەن قىش ىدىسقا ۇقساس تويباستار قوبديشالارىن, اقشا سالاتىن جاشىك, ءتۇرلى-ءتۇستى قوراپ بۇيىمدارىن جاساپ شىعادى. بۇل زاتتار تويلاردا ۇلكەن سۇرانىسقا يە بولعان.
«كەم دەگەندە ءبىر تويعا 100 قوراپ جاساپ بەرەمىز. بۇل تالدىقورعاندا سۇرانىستىڭ جوعارى ەكەنىن كورسەتەدى. بىراق ءبىز ىستەپ جاتقان زاتتارعا كوپتەگەن دۇكەن يەلەرى سالماقتى كوزقاراسپەن قارامايدى. العا قويعان ماقساتىمىز – شاھارداعى بۇكىل دۋماندى مەرەكەگە ءونىم ۇسىنىپ, تۇرعىن ۇيلەردىڭ گيپس ارقىلى بەزەندىرىلەتىن تۇسىنا اتسالىسۋ. قازىردىڭ وزىندە ءوزىمىزدىڭ جەكە تۇتىنۋشىلارىمىز پايدا بولىپ كەلەدى. وسى باعىتتان تايماساق ءالى ۇلكەن ماقساتقا جەتەمىز», دەيدى ايسۇلتان.
ەڭ قىزىعى سول, جاس تا بولسا باس بولعان جاس كاسىپكەر ەكى ادامدى جۇمىسپەن قامتىپ وتىر. ولارعا تابىستىڭ بەلگىلى ءبىر پايىزىن تولەيدى.
تالاپشىل ورەننىڭ وسى ىسپەن اينالىسۋىنا يدەيا قايدان كەلگەنىن ايتپاي وتپەسكە بولماس. بارلىعى ونىڭ «ادەپ-قۇقىق جۇمىسى جونىندەگى مەنتور» جوباسىنىڭ قالاداعى №21 ورتا مەكتەپتە ۇيىمداستىرىلعان ساتىنەن باستالعان. ايسۇلتان ول جەردە «اسار» سپورتتىق-ساۋىقتىرۋ ورتالىعىنىڭ جەتەكشىسى ەلدوس بايالىشباەۆتى جولىقتىرادى. ونىڭ وتكەن ساباق دارىسىنەن كەيىن كوكەيىنە يدەيالار ۇيالاپ, ەرەكشە سەرپىن الادى. كوپ ايالداماي, كاسىپ اشۋعا بەل شەشە كىرىسىپ كەتەدى.
«وقۋشى بولسام دا قازىرگى ۋاقىتتا ەرەسەك ادامنىڭ ايلاپ ءجۇرىپ تاباتىن قارجىسىن تاۋىپ ءجۇرمىن. مەنىڭ ءبىر تۇيگەنىم – كاسىپتە جانقيارلىق قاجەت. ۇزدىكسىز دامۋ بولماسا قوعامنىڭ سۇرانىسىنا ساي جۇمىس ىستەي المايسىڭ. ارينە, ءبىز جوقتان بار جاسادىق دەمەيمىز, تەك جاڭا يدەيامىزدىڭ ناتيجەسىن كورىپ وتىرمىز», دەيدى جاس كاسىپكەر.
جاس كاسىپكەر ءوزى قاتارلى جاستاردىڭ بوس ۋاقىتىن ءتيىمدى پايدالانۋى ماڭىزدى ەكەنىن ايتادى. كوپ ۋاقىتىن ۇيالى تەلەفونمەن, پايداسىز قىدىرىس, ويىن-ساۋىقپەن وتكىزىپ جاتقان ادامداردان ۇلى ءىس شىقپايدى. ەل بولاشاعى ءۇشىن بۇگىنگى ۇرپاق جان اۋىرتۋى كەرەك دەپ سانايدى. نامىسشىل ورەننىڭ بۇل ويىنا ءبىز دە قوسىلدىق.
جەتىسۋ وبلىسى
