جالپى, رەسپۋبليكالىق ەكولوگيالىق اكتسياسى باستالعاننان بەرى ءۇش اي ۋاقىت ىشىندە «تازا بەيسەنبى», «ROAD-ەستافەتا», تاريحي-مادەني مۇرا ەسكەرتكىشتەرى مەن وبەكتىلەرىن ۆانداليزم ىزدەرىنەن تازارتۋ ءىس-شارالارى جۇيەلى تۇردە ءجۇردى. 160 مىڭعا جۋىق تۇرعىن بەلسەنە قاتىستى. اتاپ ايتقاندا, كاسىپورىندار مەن مەملەكەتتىك مەكەمەلەردىڭ قىزمەتكەرلەرى, ۆولونتەرلار, جاستار, شاعىن جانە ورتا بيزنەس وكىلدەرى بوي كورسەتتى. ءوڭىر اكىمىنىڭ ءباسپاسوز قىزمەتىنىڭ مالىمەتىنشە, «تازا قازاقستان» ەكواكتسياسى «تازا ولكە», «كيەلى مەكەن», «جاسىل ايماق», «ونەگەلى ۇرپاق», ء«مولدىر بۇلاق» باعىتتارى بويىنشا جۇرگىزىلدى.
سولاردىڭ ىشىندە تەكەلىلىكتەر دە تازالىق شارالارىندا بەلسەندىلىك كورسەتۋدە. وتكەن اپتانىڭ سوڭىندا قالانىڭ 150-دەن استام تۇرعىنى قاراتال وزەنىنىڭ جاعالاۋىن تازالادى. «تەكەلى سۋ قۇبىرى» كاسىپورنى, «گاراج» جك جانە تۇرعىن ءۇي-كوممۋنالدىق شارۋاشىلىق, جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى ءبولىمى تاراپىنان قوقىس تيەگىش 2 تەحنيكا, قوقىس تاسيتىن 3 تەحنيكا جۇمىلدىرىلدى. ەكولوگيالىق اكتسياعا تۇراقتى شىعاتىنداردىڭ اراسىندا كاسىپكەرلەر دە بار. سولاردىڭ ءبىرى ساكەن ساندىباەۆ ءوزىنىڭ جەكە نىسانىنىڭ ماڭايىن عانا ەمەس, جالپى قالانىڭ تازالىعىن ساقتاپ, اباتتاندىرۋعا اتسالىسىپ كەلەدى.
«تەكەلى – ءبىزدىڭ تۋعان قالامىز, ورتاق ءۇيىمىز. وسىندا بالالارىمىز, نەمەرەلەرىمىز ءوسىپ-ءونىپ, ەرجەتىپ كەلەدى. سوندىقتان قالانىڭ بولاشاعىنا دا, تازالىعىنا دا ءبارىمىز بىردەي جاۋاپتىمىز. وسىنداي ورتاق ىستەرگە بىرگە جۇمىلىپ, باسقالارعا ۇلگى بولارلىق يگى شارالاردى كوپتەپ اتقارايىق», دەيدى كاسىپكەر.
تەكەلى قالاسى اكىمىنىڭ ورىنباسارى ەرلان جەتىباەۆتىڭ ايتۋىنشا, وسى اكتسيا باستالعاننان بەرى قالادا 34 سەنبىلىك ۇيىمداستىرىلىپ, وعان 3 500 ادام جۇمىلدىرىلعان. 350 ءتۇپ اعاش كوشەتى وتىرعىزىلىپ, 18 مىڭعا جۋىق گۇل ەگىلدى, بەي-بەرەكەت شاشىلعان قوقىستار شىعارىلدى.
سول سياقتى تازالىق اكتسياسىنا قاتىسقان اقسۋ اۋدانىنىڭ ەرىكتىلەرى جانسۇگىروۆ اۋىلىنداعى «سەگىزباتىر» سكۆەرىن اباتتاندىردى. وعان قوسا ارىقتاردى تازالاپ, قوقىس شىعارۋمەن قاتار كوشەتتەردى سۋارىپ, كوگالداندىرۋعا دا ەرەكشە ءمان بەرىلۋدە.
«اكتسيا باستالعالى تازالىق شارالارى تۇراقتى اتقارالىپ كەلەدى. اپتا سايىن «تازا بەيسەنبى» شاراسىن ۇيىمداستىرامىز. وعان نەگىزىنەن جاستار بەلسەندى قاتىسۋدا. بۇل وسكەلەڭ ۇرپاقتىڭ قورشاعان ورتاعا دەگەن قامقورلىعىن قالىپتاستىرۋعا ۇلكەن ىقپال ەتەدى», دەيدى جانسۇگىروۆ اۋىلدىق وكرۋگىنىڭ اكىمى ءىلياس مۇسابالانوۆ.
وبلىستىق قوعامدىق دامۋ باسقارماسىنىڭ مالىمەتىنە قاراعاندا, بۇل شارالارعا بۇگىنگە دەيىن وڭىردە جالپى سانى 154 مىڭنان استام ادام اتسالىسىپ,
1 102 تەحنيكا جۇمىلدىرىلدى. تازالىق شارالارىنىڭ ناتيجەسىندە, 6 162 توننا قوقىس شىعارىلىپ, 2 200 كم ارىق جەلىسى تازالاندى. وبلىس اۋماعىندا اكتسيا كەزىندە 29 514 ءتۇپ اعاش وتىرعىزىلدى.
جەتىسۋ وبلىسى
