سۋرەتتە: مەرەكەلىك شارادان كورىنىس
بەلگىلى كۇيشى, كومپوزيتور سەكەن تۇرىسبەكوۆ, قر ەڭبەك سىڭىرگەن قايراتكەرلەرى مەيرامبەك بەسباەۆ پەن نۇركەن ءاشىروۆ سىندى اعا بۋىن وكىلدەرى دومبىرا قۇلاعىندا ويناپ, ەل اراسىندا كەڭىنەن تارالعان شىعارمالاردى ورىندادى.
ال اۋداندىق جانە قالالىق مادەنيەت ورتالىقتارىنىڭ جانىنان جۇمىس ىستەيتىن 80 ۇيىرمەنىڭ 1000-نان اسا شاكىرتى كۇمىس كۇيدەن شاشۋ شاشتى. ولارعا ءار ايماقتان كەلگەن 92 ۇيىرمە ۇستازدارى جەتەكشىلىك ەتتى.
ۇلتتىق اسپاپ ۇلىقتالعان فەستيۆالگە ءوڭىر باسشىسى مارات سۇتانعازيەۆ ارنايى قاتىسىپ, قازاق مادەنيەتىنىڭ داستۇرلەرىن ساقتاۋ مەن دامىتۋدىڭ ماڭىزىنا توقتالدى.
«دومبىرا – بۇل جاي عانا مۋزىكالىق اسپاپ ەمەس, بۇل ءبىزدىڭ تاريحىمىزدىڭ, بىرەگەيلىگىمىزدىڭ سيمۆولى. جاس ۇرپاقتىڭ ءوز مادەنيەتىن ءبىلۋى جانە جاقسى كورۋى ماڭىزدى. سوندىقتان دومبىرادا ويناۋ ونەرىن كەڭىنەن ناسيحاتتاۋ قاجەت», دەگەن وبلىس اكىمى مارات ەلەۋسىز ۇلى كۇي تىڭداۋعا قۇمارتقان قالا تۇرعىندارى مەن قوناقتاردى ۇلتتىق مەرەكەمەن قۇتتىقتادى.
«دومبىرا-داستان» فەستيۆالى قازاق مۋزىكاسى مەن مادەنيەتىن سۇيەتىندەر ءۇشىن ناعىز مەرەكە بولدى. ارنايى مەرەكەلىك باعدارلاما كورەرمەندەردى قۇرمانعازى ساعىرباي ۇلىنىڭ كلاسسيكالىق شىعارمالارىن ورىنداۋمەن, سونىمەن قاتار كومپوزيتور ءابدىمومىن جەلدىباەۆتىڭ «ەركە سىلقىم» سياقتى زاماناۋي اۋەندەرىمەن دە قۋانتتى. كۇمبىرلەگەن كۇي توگىلگەن ءىس-شارا سوڭى ءسۇيىنباي اتىنداعى وبلىستىق فيلارمونيانىڭ مەرەكەلىك كونتسەرتىنە ۇلاستى.
الماتى وبلىسى
