قاسىم-جومارت توقاەۆ انتونيۋ گۋتەرريشتىڭ ساپارى قازاقستان مەن بۇۇ اراسىنداعى جان-جاقتى ىنتىماقتاستىقتى نىعايتۋعا زور مۇمكىندىك بەرەتىنىن اتاپ ءوتتى.
– ءسىزدىڭ استاناعا ساپارىڭىز جانە شىۇ سامميتىنە قاتىسۋىڭىز – قازاقستان مەن بۇۇ اراسىنداعى تىعىز قارىم-قاتىناستىڭ جارقىن بەلگىسى. بۇل ءبىزدىڭ بۇۇ قىزمەتىنە اتسالىسىپ جاتقانىمىزدى كورسەتەدى. قازىرگى كۇردەلى جاعدايدا قازاقستان جانە مەن دە مەملەكەت باسشىسى رەتىندە بۇۇ-نىڭ جۇمىسىن جان-جاقتى قولدايمىز, – دەدى پرەزيدەنت.
انتونيۋ گۋتەرريش ءوزىنىڭ ساپارىن بۇۇ-نىڭ قازاقستانعا جانە ونىڭ شىۇ توراعالىعىنا كورسەتكەن قولداۋى مەن تىلەۋلەستىگىنىڭ كورىنىسى رەتىندە قاراستىراتىنىن مالىمدەدى.
– قازاقستان بەيبىتشىلىك جولىنداعى كۇرەستىڭ جارقىن ۇلگىسىن كورسەتىپ كەلەدى. ءسىزدىڭ ەلىڭىز بىرىگۋ ىسىندە دانەكەر, سونىڭ ىشىندە وتە كۇردەلى جاعدايلاردا ارقاشان التىن كوپىر, بەيبىتشىلىكتىڭ ەلشىسى بولدى. استانا كوپتەگەن بىتىمگەرلىك باستامانىڭ, سونىڭ ىشىندە سيريا بويىنشا استانا ۇدەرىسىنىڭ ورتالىعىنا اينالدى. استانا ءاردايىم بەيبىتشىلىك الاڭى بولدى. قازاقستاننىڭ بەدەلى زور. سىزدەر يادرولىق قارۋسىزدانۋ سالاسىندا كوشباسشى ەلسىزدەر جانە باسقا دا كوپتەگەن سالادا بەيبىتشىلىككە بەيىلدى ەكەندەرىڭىزدى تانىتىپ كەلەسىزدەر, – دەدى بۇۇ باس حاتشىسى.
بۇۇ باس حاتشىسى استانانىڭ شانحاي ىنتىماقتاستىق ۇيىمىنا توراعالىعىن جوعارى باعالادى. انتونيۋ گۋتەرريش قازاقستاندا جۇزەگە اسىرىلىپ جاتقان اۋقىمدى ساياسي جانە ەكونوميكالىق رەفورمالاردى قولدايتىنىن, ەلىمىزدىڭ جاھاندىق قاۋىپسىزدىك پەن بەيبىتشىلىكتى قامتاماسىز ەتۋ ىسىندە ماڭىزدى ءرول اتقاراتىنىن اتاپ ءوتتى.
سونىمەن قاتار كەزدەسۋدە ورتالىق ازيا مەملەكەتتەرى اراسىنداعى ايماقتاعى كووپەراتسيانى نىعايتۋ ماسەلەلەرىنە ەرەكشە نازار اۋدارىلدى. بۇۇ باس حاتشىسى وڭىردەگى ەكونوميكالىق ينتەگراتسيا ۇدەرىسىنە جوعارى باعا بەرىپ, ونىڭ جاھاندىق ماسەلەلەردى شەشۋدەگى الەۋەتى زور ەكەنىنە توقتالدى.
بۇدان بولەك, قازاقستان مەن بۇۇ اراسىنداعى كوپجاقتى ىنتىماقتاستىقتىڭ باسىم باعىتتارى, سونداي-اق حالىقارالىق كۇن تارتىبىندەگى وزەكتى ماسەلەلەر تالقىلاندى.
