«ازامات قۇرىلىس» جشس حالىق سانى 5 مىڭعا جۋىقتايتىن باقباقتى اۋلىنداعى ساياباقتى وتاندىق زاماناۋي قۇرىلىس ماتەريالدارىن پايدالانا وتىرىپ سالىپ شىققان. اشىلۋ سالتاناتىنا تۇرعىندار تەگىس جيىلدى. يگى شاراعا ارنايى كەلگەن بالقاش اۋدانىنىڭ اكىمى ازات قۇتپانبەتوۆ جيىلعان قاۋىمدى قۋانىشتارىمەن قۇتتىقتادى.
«اۋىلدىڭ اجارىن اشىپ تۇرعان بۇل ساياباقتىڭ كەلەشەكتە گۇلمەن كومكەرىلىپ, توڭىرەگىنىڭ تازا ءارى ب ۇلىنبەي تۇرۋى – تۇرعىندارعا تىكەلەي بايلانىستى. تۋعان اۋلىمىزدىڭ تازالىعىن قاداعالاپ, كوزدىڭ قاراشىعىنداي ساقتاۋعا ءاربىرىمىز جاۋاپتى بولۋعا ءتيىسپىز. سوندا عانا اۋىل وركەندەپ وسەدى, كوركەيەدى. ەسىگىن ايقارا اشقان ساياباقتا بالالارىمىز الاڭسىز ويناپ, اقساقالدارىمىز ءبىر-بىرىمەن قاۋىشىپ, قاۋقىلداسىپ جۇرگەندەرىنىڭ ءوزى قۋانىش. سول سەبەپتى بىرلىگىمىز بەن تىرلىگىمىز ۇيلەسىپ, ەلىمىزدى كوركەيتۋگە ۇلەس قوسا بەرەيىك», دەدى اۋدان اكىمى.
جان جادىراتار جاعىمدى جاڭالىقتىڭ باسى-قاسىنان تابىلعان اۋداننىڭ قۇرمەتتى ازاماتتارى, باقباقتى اۋىلدىق ارداگەرلەر كەڭەسىنىڭ توراعاسى نۇرسەيىت سارباسوۆ, «قۇرمەت» وردەنىنىڭ يەگەرى ساپارعالي ساتباەۆ, اۋىلدىق قوعامدىق كەڭەستىڭ توراعاسى سادىق ۇركىمباەۆ, وتباسى جانە ايەلدەر ۇيىمىنىڭ ءتورايىمى جانىمگۇل داۋىلبەكوۆا جۇرەكجاردى تىلەكتەرىن ءبىلدىرىپ, باقباقتى اۋلىنىڭ جىلدان-جىلعا كوركەيىپ كەلە جاتقانىن, تۇرعىنداردىڭ ىنتىماق پەن بىرلىگى وزگەگە ۇلگى-ونەگە ەكەنىن تىلگە تيەك ەتتى.
ايتۋلى ءىس-شاراعا ارنايى قاتىسقان اۋدان ونەرپازدارى اسەم ءان اۋەلەتىپ, كۇي كۇمبىرلەتىپ, مەرەكەلىك شارانىڭ ماڭىزىن ارتتىرا ءتۇستى.
«ساياباعىمىزدىڭ اشىلعانى ءبىز ءۇشىن زور قۋانىش. بالا-شاعامىز تازا ءارى قاۋىپسىز الاڭدا ەمىن-ەركىن وينايتىن بولدى. ۇلكەندەردىڭ دە ۇيدەن ۇزاپ, سەرۋەندەۋىنە وتە قولايلى بولعانىنا قۋانىپ جاتىرمىن. دارىگەرلەر تازا اۋادا كوپ ءجۇرۋ كەرەگىن ايتادى. ەندى ەمدەلىپ شىققان سوڭ, ساياباقتا ەمىن-ەركىن سەرۋەندەيتىن بولامىز», دەيدى اۋىل تۇرعىنى ىرىسجان.
جانعا جايلى ساياباقتا بالالاردىڭ ويىن الاڭى مەن وتىرۋىنا ىڭعايلى ورىندىقتار جاسالعان. سونداي-اق تۇنگى مەزگىلدە مۇندا جارىق شامدارى جارقىراپ, توڭىرەككە تۇگەل ساۋلە شاشىپ تۇرادى.
ءدال وسىنداي يگى ءىس-شارا كەگەن اۋدانىنىڭ جالاعاش اۋلىندا دا جالعاسىن تاپتى. «اۋىلىم – التىن بەسىگىم, تۋعان جەر – ءومىردىڭ قاينار بۇلاعى» قورىنىڭ ۇيىمداستىرۋىمەن اۋىل جۇرتشىلىعى جۇمىلا كىرىسىپ, سايالى ساياباقتىڭ اشىلۋىنا مۇرىندىق بولدى. جالپى, اۋماعى ءبىر شاقىرىمعا جۋىقتايتىن ساياباقتا شىرشا, اققايىڭ, تال-تەرەك پەن سيرەن اعاشتارى جايقالا وسكەن. جالاعاش اۋىلدىق اقساقالدار القاسىنىڭ توراعاسى ءارىپ سىبانباەۆ جيىلعان قاۋىمعا اق باتاسىن بەرىپ, يگىلىكتى بولۋىنا تىلەكتەستىگىن بىلدىرسە, اق جاۋلىقتى انالار شاشۋ شاشىپ, قۋانىشتارىن ەسەلەدى.
«كوپ بولىپ قولعا العان ءىستىڭ بىتۋىنە اتسالىسقان اۋىلدىڭ ۇلكەن-كىشىسىنە, ەل اعالارى مەن جاستارعا العىسىمىزدى بىلدىرەمىز. وسى كۇنى كەگەن اۋدانىندا 34 ەلدى مەكەن بولسا, جالاعاش ەڭ ۇلكەنى ءارى ۇلگى بولارلىق اۋىلدار قاتارىندا. جىل ون ەكى اي «كولساي كولدەرىنە» اعىلاتىن تۋريستەردەن دامىل تاپپايتىن اۋىلدىڭ اجارلى بولۋى – بارىمىزگە سىن. سول سەبەپتى قورشاعان ورتانى, اۋلىمىزدى تازا ۇستاۋعا بارشامىز كوڭىل ءبولۋىمىز كەرەك», دەگەن كەگەن اۋدانى اكىمىنىڭ ورىنباسارى مەدەت يساەۆ ساياباقتىڭ اشىلۋىنا ەلەۋلى ەڭبەك سىڭىرگەن ءبىر توپ ازاماتتى اۋدان اكىمىنىڭ العىسحاتىمەن ماراپاتتادى.
الماتى وبلىسى
