«Smartlook» جۇيەسى – بىلتىر قازان ايىندا ۋنيۆەرسيتەت رەكتورىنىڭ باستاماسىمەن قولعا الىنعان جوبا. اتالعان جوعارى وقۋ ورىننىڭ عىلىمي قىزمەتكەرى, جوبا جەتەكشىسى شىلمىرزا ۇسەننىڭ ايتۋىنشا, ەندى سىناقتان ءوتىپ جاتقان جوبانى نارىققا شىعارۋ كوزدەلىپ وتىر. جىل سوڭىنا دەيىن ءونىم ساپاسىن ارتتىرۋعا بايلانىستى, تاجىريبەدەگى قولدانىسى, بەزەندىرىلۋىنە قاتىستى جۇمىستار ىسكە اسادى. قاۋىپسىزدىك تۇرعىسىنان ۇتىمدى جۇيەنى مەكەمەلەردە, جوعارى وقۋ ورىندارى, مەكتەپتەر مەن بالاباقشالاردا ءتيىمدى قولدانۋعا بولادى. «Smartlook» جۇيەسىنىڭ ماركەتينگتىك شەشىمدەر قابىلداۋدا, جۇمىس ساپاسىن, قىزمەتكەرلەردىڭ بەلسەندىلىگىن ارتتىرۋداعى ىقپالى زور. قازىرگى كەزدە ەلىمىزگە شەتەلدەن تاسىمالداناتىن تەحنولوگيالاردى ونەرتاپقىشتار قۇراستىرعان سكۋد-كارتالار الماستىراتىن بولسا, وندا ونىڭ قۇنى نارىقتا الدەقايدا قولجەتىمدى بولاتىنى انىق.
«Smartlook» جۇيەسى – كافەدرانىڭ زەرتحاناسىندا جۇزەگە اسىپ جاتقان كوپتەگەن جوبانىڭ ءبىرى. زەرتحانانىڭ كىشى عىلىمي قىزمەتكەرى اقجول نۇردان ۇلى كوپ فۋنكتسيونالدى سمارت قۇلپى جۇيەسىنىڭ زەرتحانالىق ءپروتوتيپى قازىرگى كەزدە سىناقتان ءوتىپ جاتقاندىعىنا توقتالىپ, ونى ازىرلەۋ بارىسىندا تەحنيكالىق قيىندىقتىڭ بولعانىن اتاپ ءوتتى. بىراق سوعان قاراماستان, جاس عالىمدار زاماناۋي جۇيەنىڭ ءپروتوتيپىن جاساپ شىعاردى. بۇل تەحنولوگيا قىزمەتكەرلەردىڭ جۇمىسقا كەلۋ جانە كەتۋ ۋاقىتىن باقىلاۋعا, رۇقسات ەتىلمەگەن اۋماققا بوگدە ادامداردىڭ كىرۋىن شەكتەيدى. قاۋىپسىزدىكتى ساقتاۋدا تاپتىرمايتىن تەحنولوگيانىڭ بۇل ءتۇرىن ءارى قاراي جەتىلدىرىپ, كارتانى قولدانۋ بارىسىندا «Face ID», «Touch ID», «QR» تاسىلدەرىن دە پايدالانۋ جاعى ويلاستىرىلىپ وتىر. بولاشاقتا وسى مۇمكىندىكتەر ارقىلى جاس عالىمداردىڭ نوۋ-حاۋدىڭ تيىمدىلىگىن ارتتىرا تۇسسەك دەگەن جوسپارى بار.
جاس ونەرتاپقىشتار ۇنەمدى ءارى قاۋىپسىز ءونىم بولاشاقتا ۇلكەن سۇرانىسقا يە بولاتىنىنا سەنىمدى. ويتكەنى ادام جۇمىسىن جەڭىلدەتەتىن زاماناۋي شەشىمدەردى ءوندىرىستىڭ قاي سالاسىندا بولسىن قولدانعان ءتيىمدى. جاڭا تەحنولوگيالاردىڭ تامىرىن ءدوپ باسقان قىراعى ستۋدەنتتەر «smartlook» جۇيەسىن ارنايى كىلت رەتىندە پايدالانۋمەن قاتار تولەم كارتاسى رەتىندە دە قولدانۋعا بولاتىنىن ايتادى.
الماتى
