فوتو: اقوردا ءباسپاسوز قىزمەتى
«قازىر قازاقستاندا مۇناي-حيميا زاۋىتتارى سالىنىپ جاتىر. شىمكەنتتەگى مۇناي وندەۋ زاۋىتىن جاڭعىرتۋ جۇمىستارى جۇرگىزىلىپ جاتىر. «قازاقستان – قىتاي» مۇناي قۇبىرىنىڭ وتكىزۋ مۇمكىندىگىن ۇلعايتۋ شارالارى قولعا الىندى. كوپ ۇزاماي بۇل جوبالار ەكونوميكامىزعا ۇلەس قوسا باستايدى. ساپار اياسىندا قازاق-قىتاي ىسكەرلىك كەڭەسىنىڭ وتىرىسى ءوتتى. وندا بىرقاتار ينۆەستيتسيالىق كەلىسىمدەرگە قول قويدىق», دەدى قاسىم-جومارت توقاەۆ.
مەملەكەت باسشىسى قحر توراعاسىمەن كولىك-لوگيستيكا سالاسىنداعى ىقپالداستىقتى جانداندىرۋ قاجەتتىگىنە نازار اۋدارعانىن ايتتى. بۇدان بولەك, سي ءتسزينپيننىڭ استانادا جاريالاعان جاھاندىق ء«بىر بەلدەۋ, ءبىر جول» باستاماسى جانە ترانسكاسپي حالىقارالىق كولىك باعدارى اياسىنداعى ىنتىماقتاستىق ماسەلەلەرى تالقىلانعانىن جەتكىزدى.
«بىلتىر تەمىرجول ارقىلى تاسىمالداناتىن جۇك كولەمى 22 پايىزعا ارتىپ, 28 ميلليون تونناعا جەتتى. بۇل – رەكوردتىق كورسەتكىش. ليانيۋنگان, «قورعاس – شىعىس قاقپاسى» جانە سيان قالاسىنداعى قۇرعاق پورتتاردا جۇزەگە اسىرىلعان بىرلەسكەن جوبالاردىڭ ناتيجەسىندە كولىك-لوگيستيكالىق الەۋەتىمىز ەداۋىر ارتتى. قازىرگى تاڭدا «اياگوز – باقتى» ءۇشىنشى ترانسشەكارالىق تەمىر جول قۇرىلىسى بەلسەندى ءجۇرىپ جاتىر. بۇگىن ءبىز ترانسكاسپي حالىقارالىق كولىك باعدارى ارقىلى جۇك تاسىمالىن ىسكە قوسۋ شاراسىنا بەينەبايلانىس رەجيمىندە قاتىستىق. بۇل باعدار ەۋرازيا قۇرلىعىنداعى كولىك-لوگيستيكا قاتىناستارىن دامىتۋعا تىڭ سەرپىن بەرەدى», دەدى مەملەكەت باسشىسى.
