سۋرەتتى تۇسىرگەن - اۆتور
ساياحاتتاپ كاتونقاراعايعا بارعان ەل راحمان مەن قاراكول, يرەك پەن كوككول سەكىلدى كوپشىلىك بىلەتىن باعىتتاردى عانا ماڭدايعا الادى. ودان باسقا دا كيەلى جەرلەر از ەمەس-ءتى. سونىڭ ءبىرى – كۇنگەي بەتتەگى تاۋ قۋىسىنداعى بەس ساۋساق ەدى. ىزدەپ بارار بولساڭىز, جول تالعامايتىن كولىكپەن جامبىل اۋلىنىڭ تۇسىنان تاۋ اراسىمەن مارالدى اۋلىنا قاراي تارتاسىز. بۇرالاڭى مەن ءورى كوپ جولدى باسىپ ءوتىپ, اۋىلعا ەكى شاقىرىم جەتپەي, جولدان وڭعا قاراي بۇرىلساڭىز, قورشاۋ ىشىندەگى سوقپاقپەن بەس ساۋساققا تۋرا باراسىز. ول دەگەنىمىز – ءداۋدىڭ ساۋساق ىزدەرى قالعانداي الىپ تاس. جەرگىلىكتى جۇرتتىڭ اۋزىندا جۇرگەن اڭىز-اڭگىمەلەرگە سەنسەك, ەرتەدە, تىم ەرتەدە ءداۋ وسىناۋ تاسقا ساۋساق ىزدەرىن قالدىرسا, ەندى ءبىرى «پايعامباردىڭ ساۋساعى» دەگەن دە بولجام ايتادى. كەيبىرەۋلەر نەوليت داۋىرىندە قاشالعان دەگەن دە نۇسقا ايتقان. ورتاڭعى ساۋساقتىڭ ءىزى ءۇش مەترگە تاياۋ. تاسقا بىتكەن ساۋساق ىزىنە مۇقيات قاراساڭىز, كادىمگى ادام ساۋساعى ىسپەتتى. بۋىندارىنا دەيىن بايقالادى. بالكىم قانداي دا تىلسىم كۇش بار ما؟ ال كاتونقاراعاي ۇلتتىق مەملەكەتتىك پارك قىزمەتكەرلەرى تابيعاتتىڭ جاراتىلىسى دەپ ەسەپتەيدى.
«قاريالار اڭىزعا بالاپ, بەس ساۋساقتى ەرتە كەزدەن ايتىپ جۇرەتىندەرى ەسىمىزدە. بىراق بۇل الىپ تاس سۋدىڭ اسەرىنەن مۇجىلگەن سەكىلدى. جالپى, كاتونقاراعاي اۋماعىندا تاستا قالعان تىلسىم ىزدەر كوپ. اياقتىڭ ءىزى قالعانداي دا جارتاس بار. ونىڭ ءبارىن ارنايى عىلىمي ورتالىق زەرتتەۋى كەرەك شىعار», دەيدى جەرگىلىكتى جۋرناليست تيمۋر سماعۇلوۆ.
ءيا, التايدىڭ قويناۋى تىلسىمعا تولى. اشىلماعان جۇمباعى, ايتىلماعان سىرلارى كوپ. ادەمىلىك تۇرعىسىنان عانا ەمەس, عىلىمي جاعىنان دا زەرتتەلسە, تالاي جۇمباقتىڭ جاۋابى تابىلار ما ەدى؟
شىعىس قازاقستان وبلىسى,
كاتونقاراعاي اۋدانى
