فوتو:qazaquni.kz
دەپۋتاتتار س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ قۇرامىنا كىرەتىن اقساي بالالار ورتالىعىنا باردى. بۇل – 70 جىلدىق تاريحى بار ەڭ بايىرعى كوپسالالى بالالار ەمدەۋ-دياگنوستيكالىق مەكەمەلەرىنىڭ ءبىرى.
كەيىنگى جىلدارى كلينيكانىڭ تەحنيكالىق بازاسى كەيبىر مەديتسينالىق جابدىقتار ءىشىنارا جاڭارتىلدى, ماماندار شەتەلدە بىلىكتىلىگىن ارتتىردى.
الايدا شەشىمىن تاپپاي تۇرعان وزەكتى ماسەلە – كەڭەس زامانىنان قالعان ەسكى عيمارات.
– بۇل جەردە جوعارى بىلىكتى ماماندار جۇمىس ىستەيدى. ءبىز بۇل ەمحانانى جوندەۋگە قارجى ءبولۋ تۋرالى ماسەلەنى كوتەرەمىز, – دەدى «Respublica» فراكتسياسىنىڭ مۇشەسى, ءماجىلىس دەپۋتاتى نۇرگۇل تاۋ.
ال دەپۋتاتتاردىڭ قالالىق كارديولوگيا ورتالىعىنا ات باسىن بۇرۋىنا ونداعى مەديتسينالىق قىزمەتكەرلەردى جۇمىستان شىعارۋعا بايلانىستى ۇجىمدىق ءوتىنىش سەبەپ بولدى. ورتالىقتىڭ باس ديرەكتورى روزا قۋانىشبەكوۆانىڭ ايتۋىنشا, مەكەمەنىڭ قوماقتى دەبيتورلىق بەرەشەگى بولعان. الايدا قازىر جاعداي وزگەرىپ, تابىس تابۋ مۇمكىندىگىنە يە بولدى.
قازاقستان حالىقتىق پارتياسىنان سايلانعان ءماجىلىس دەپۋتاتى گاۋحار تاناشەۆا اتاپ وتكەندەي, سايلاۋشىلار ءوتىنىشى نازاردان تىس قالمايدى جانە قىزمەتكەرلەر زاڭسىز جۇمىستان شىعارىلعان جاعدايدا مىندەتتى تۇردە ءتيىستى شارالار قابىلدانادى.
