فوتو: newsweekespanol.com
قازاقستاندا مەملەكەتتىك قىزمەتشىلەر جاڭا ادىسپەن ىرىكتەلەدى
مەملەكەتتىك قىزمەت ىستەرى اگەنتتىگىنىڭ مالىمەتىنشە, مەملەكەتتىك قىزمەتكە ىرىكتەۋدىڭ اشىق ءوتۋىن قامتاماسىز ەتۋ ماقساتىندا بىلتىر e-Qyzmet.gov.kz سىرتقى ينتەرنەت-پورتالى ىسكە قوسىلىپ, ىرىكتەۋدىڭ جاڭا ەرەجەلەرى ازىرلەندى.
قازىر پورتالعا 22 مەملەكەتتىك ورگان قوسىلدى. 1 شىلدەدە جۇيە 22 مەملەكەتتىك ورگاندا قوسىمشا ەنگىزىلەدى.
جاڭا جوبانىڭ ەرەكشەلىگى - ازاماتتار كەز كەلگەن ۋاقىتتا جانە ينتەرنەتكە قولجەتىمدى كەز كەلگەن جەردەن ونلاين رەجيمىندە بايقاۋدىڭ بارلىق كەزەڭىنە قاتىسا الادى.
نەسيە بەرۋدىڭ جاڭا ەرەجەلەرى
سونداي-اق كوللەكتورلارعا قارىز بەرۋگە ەكى جىلدىق موراتوري ەنگىزىلىپ جاتىر. وسى كەزەڭدە نەسيە بەرۋشىلەر مەرزىمى وتكەن نەسيەلەردى كوللەكتورلارعا بەرە المايدى. قارىزدارى كوللەكتورلارعا بەرىلگەن قارىز الۋشىلاردى قولداۋ ءۇشىن 2024 جىلعى قازاننان باستاپ كوللەكتورلاردىڭ بەرەشەكتى رەتتەۋ راسىمدەرىن جۇرگىزۋ مىندەتى ەنگىزىلەدى.
سونىمەن قاتار 1 شىلدەدەن باستاپ ازاماتتار جۇبايىنىڭ كەلىسىمىنسىز نەسيە الا المايدى.
ينتەرنەت پەن ۇيالى بايلانىس تاريفتەرىنىڭ ءوسۋى
«قازاقتەلەكوم» 1 شىلدەدەن باستاپ مۇراعات جەلىسىنىڭ 51 تاريفتىك جوسپارى بويىنشا تاريفتەردىڭ كوتەرىلگەنىن حابارلادى. بۇل ۇيدەگى ينتەرنەت پەن ۇيالى بايلانىستىڭ پاكەتتىك قىزمەتتەرىنە ارنالعان مۇراعاتتالعان تاريفتىك جوسپارلارىنا قاتىستى.
كۇدىكتى اقشا اۋدارىمدارىن بۇعاتتاۋ
ۇلتتىق بانك قارجىلىق الاياقتىقپەن كۇرەسۋ ءۇشىن الاياقتىققا قارسى ورتالىق قۇرىلعانىن حابارلادى. الاياقتىققا قارسى ورتالىق 22 شىلدەدەن باستاپ - تسيفرلاندىرۋ ماسەلەلەرى تۋرالى ءتيىستى زاڭ كۇشىنە ەنگەن ساتتەن باستاپ كۇدىكتى اقشا اۋدارىمدارىنا توسقاۋىل قويۋدى باستايدى.
جۇيەنىڭ نەگىزگى مىندەتى - ازاماتتاردى الاياتاردان قورعاۋ. كۇدىكتى اقشالاي ترانزاكتسيالارعا توسقاۋىل قويىلادى.
«الاياقتىققا قارسى ورتالىققا بارلىق بانكتەردىڭ, تولەم ۇيىمدارىنىڭ, ىشكى ىستەر مينيسترلىگىنىڭ, قارجى مونيتورينگى اگەنتتىگىنىڭ, قارجى نارىعىن رەتتەۋ جانە دامىتۋ اگەنتتىگىنىڭ, باس پروكۋراتۋرانىڭ, ۇيالى بايلانىس وپەراتورلارىنىڭ اقپاراتتىق جۇيەلەرى قوسىلادى. بۇل فۋنكتسيا 2024 جىلعى شىلدەدە تولىعىمەن ەنگىزىلەدى دەپ جوسپارلانعان», دەدى پرەمەر-مينيستر ولجاس بەكتەنوۆ.
تەمەكى باعاسىنىڭ ءوسۋى
قارجى مينيسترلىگىنىڭ بۇيرىعىنا سايكەس, 20 (جيىرما) ءفيلترلى, ءفيلترسىز سيگارەتكە, پاپيروستارعا, سيگاريللالارعا جانە قىزدىرىلاتىن تەمەكىسى بار بۇيىمدارعا: 2024 جىلعى 1 شىلدەدەن باستاپ 2024 جىلعى 31 جەلتوقساندى قوسا العانعا دەيىن 820 تەڭگە; 2025 جىلعى 1 قاڭتاردان باستاپ 870 تەڭگە بولادى.
سۇيىتىلعان گازدىڭ جاڭا باعاسى
1 شىلدەدەن باستاپ قازاقستاندا سۇيىتىلعان گاز باعاسى وسەدى دەپ جوسپارلانعان.
قازاقستاننىڭ وبلىستارى مەن قالالارىندا جاڭا باعالار مىناداي دەڭگەيدە بەلگىلەنەدى:
- استانا – 84 تەڭگە;
- الماتى – 89 تەڭگە;
- اقتوبە وبلىسى – 59 تەڭگە;
- اتىراۋ وبلىسى – 59 تەڭگە;
- اقمولا وبلىسىنا – 84 تەڭگە;
- الماتى وبلىسىنا – 89 تەڭگە;
- شىعىس قازاقستان وبلىسىنا – 84 تەڭگە;
- جامبىل وبلىسىنا – 78 تەڭگە;
- باتىس قازاقستان وبلىسىنا – 70 تەڭگە;
- قوستاناي وبلىسىنا – 84 تەڭگە;
- قىزىلوردا وبلىسى – 70 تەڭگە;
- قاراعاندى وبلىسى – 84 تەڭگە;
- ماڭعىستاۋ وبلىسى – 59 تەڭگە;
- پاۆلودار وبلىسىنا – 81 تەڭگە;
- سولتۇستىك قازاقستان وبلىسىنا – 89 تەڭگە;
- تۇركىستان وبلىسىنا – 70 تەڭگە;
- شىمكەنت – 70 تەڭگە;
- اباي اۋدانى – 84 تەڭگە;
- جەتىسۋ وبلىسىنا – 84 تەڭگە;
- ۇلىتاۋ وبلىسى – 84 تەڭگە.
مينيسترلىك گاز باعاسىن قايتا قاراۋ قاجەتىن بىرنەشە سەبەپتەرمەن ءتۇسىندىردى. اتاپ ايتقاندا, بۇل شەشىم تابيعي گاز ءوندىرۋدىڭ تيىمسىزدىگىنە بايلانىستى.
ەنەرگەتيكا مينيسترلىگى قازاقستان تمد ەلدەرىندەگى گاز باعاسىنىڭ ەڭ تومەنى – 54 تەڭگەدەن 86 تەڭگەگە دەيىن ەكەنىن, ال رەسەيدە ءبىر ليتر گازدىڭ باعاسى - 132 تەڭگە, ازەربايجاندا – 171 تەڭگە, تاجىكستاندا – 273 تەڭگە ەكەنىن اتاپ ءوتتى.
دارىلەردى تاڭبالاۋ
2024 جىلعى 1 شىلدەدەن باستاپ قازاقستاندا بارلىق دارىلىك زاتتى مىندەتتى تۇردە تاڭبالاۋ جانە قاداعالاۋ ەنگىزىلەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, دامۋشى ەلدەردە ءدارى-دارمەكتىڭ ءاربىر 10-شى پاكەتى جالعان. ەلىمىزدە كونترافاكتىلىك دارىلەردىڭ اينالىمى 10-12 پايىزدان اسادى. بۇل تەك ەكونوميكالىق ماسەلە ەمەس, ۇلتتىڭ ءومىرى مەن دەنساۋلىعىنا تىكەلەي قاۋىپ توندىرەدى.
زەرگەرلىك بۇيىمداردى تسيفرلىق تاڭبالاۋ
زەرگەرلىك بۇيىمداردى ساندىق تاڭبالاۋ 1 شىلدەدەن باستاپ زەرگەرلىك بۇيىمدارعا مىندەتتى تسيفرلىق تاڭبالاۋ ەنگىزىلەدى: ولارعا تاۋار بەلگىسى, مەكەن-جايى, بۇيىمنىڭ اتاۋى, ارتيكۋل, سىناما, ماسسا, ولشەمدەر, كىرىستىرۋلەر تۋرالى اقپارات كورسەتىلەتىن ارنايى بەلگى قوسا بەرىلەدى. سونداي-اق ساراپتاما اكتىلەرىن تسيفرلاندىرۋ جانە ولاردى تسيفرلىق تاڭبالاۋمەن بايلانىستىرۋ جوسپارلانىپ جاتىر.
تسيفرلىق تاڭبالاۋ جانە تاۋارلاردى قاداعالاۋ جۇيەسىنىڭ باستى ماقساتى - قازاقستانداعى تاۋار اينالىمىن اشىق ەتۋ.
زەينەتاقى جارنالارىن تولەۋ ەرەجەلەرىندەگى وزگەرىستەر
ۇكىمەت قاۋلىسى بويىنشا مىندەتتى زەينەتاقى جارنالارىن, مىندەتتى كاسىپتىك زەينەتاقى جارنالارىن, جۇمىس بەرۋشىنىڭ مىندەتتى زەينەتاقى جارنالارىن تولەۋ قاعيدالارىنا وزگەرىستەر مەن تولىقتىرۋلار ەنگىزىلەدى.
ءتيىستى ەرەجەلەرگە وزگەرتۋلەر ISO 20022 قارجىلىق حابارلامالاردىڭ حالىقارالىق ستاندارتىنا كوشۋمەن بايلانىستى.
دەمالىس
2024 جىلعى شىلدەدە ەل ازاماتتارى جىل سايىن 6 شىلدەدە تويلاناتىن استانا كۇنىن مەرەكەلەۋدىڭ ارقاسىندا تاعى ءبىر دەمالىس كۇنى قوسىلادى. بۇل كۇن - مەملەكەتتىك مەرەكە جانە بيىل ول سەنبىگە ءتۇسىپ تۇر, سوندىقتان مەرەكە 8 شىلدە دۇيسەنبىگە اۋىستىرىلدى. وسىلايشا, اپتاسىنا بەس كۇن جۇمىس ىستەيتىندەر قاتارىنان ءۇش كۇن دەمالادى: 6, 7 جانە 8 شىلدە.
اپتاسىنا 6 كۇن جۇمىس ىستەيتىندەر ءۇشىن 8 شىلدە ادەتتەگى جۇمىس كۇنى بولادى.
اۋا رايى
«قازگيدرومەت» شىلدەدە اۋا رايى سالقىندايتىنىن ايتتى. رەسپۋبليكانىڭ باسىم بولىگىندە وتكىنشى جاڭبىر جاۋىپ, نايزاعاي وينايدى, ەكپىندى جەل سوعادى, بۇرشاق جاۋى مۇمكىن.
نەگىزگى تەمپەراتۋرالىق فون جوعارى بولادى دەپ بولجانادى: باتىس جانە وڭتۇستىك وبلىستاردا: +30+38, كەي كۇندەرى تەرمومەتر 40-تان 45 گرادۋسقا دەيىن جەتەدى. قازاقستاننىڭ سولتۇستىگىندە, ورتالىعىندا جانە شىعىسىندا اۋا تەمپەراتۋراسى +25+38 گرادۋس شاماسىندا بولادى دەپ بولجانىپ وتىر.
