سۋرەتتەردە: تاۋلى وڭىردەگى تۋريزم ورتالىقتارى
الماتى وبلىسىنىڭ رايىمبەك اۋدانىن بەتكە العان تۋريستەردىڭ «شوعانساي», ء«حانتاڭىرى» مەن «اق كول» دەپ اتالاتىن اتاقتى دەمالىس ورىندارىن كورمەگەندەرى كەمدە-كەم. مۇنداعى قاراعايلى شاتقالدار مەن كوز جاۋىن الاتىن مىڭ ءتۇرلى وسىمدىكتەر ادام جانىن راحات سەزىمگە بولەرى ءسوزسىز. سوندىقتان اۋداننىڭ كاسىپكەرلەرى الىس-جاقىننان كەلەتىن تۋريستەرگە قازاقى قوناقجايلىلىق پەن سۇرانىسقا ساي سەرۆيستىك قىزمەت كورسەتۋدىڭ ساپاسىن جاقسارتۋعا ۇمتىلۋدا. كوكپەن تالاسقان قاراعايلى تاۋلاردىڭ اراسىندا تىگىلگەن اقبوز ۇيلەردە سارى قىمىز ساپىرىپ, ىستىق باۋىرساق ۇسىنۋدان باستالاتىن قىزمەت تۇرلەرى تۇرلەنىپ, تابان تىرەگەن تۋريستەر تابيعاتتىڭ كوركەم كورىنىسىن قىزىقتاۋمەن قاتار, ۇلتتىق تاعامدارىمىزدان ءدام تاتىپ, ادەت-عۇرپىمىزدى تانۋىنا مۇكىندىك جاسالعان. بۇل قادام وتاندىق ءتۋريزمدى ىلگەرىلەتۋگە مول مۇمكىندىك بەرۋدە.
«شوعانساي» ەكوتۋريزم ورتالىعى تۋريستىك الەۋەتىن ارتتىرۋعا 300 ملن تەڭگە كولەمىندە ينۆەستيتسيا سالىپ وتىر. كاسىپتىڭ العا جىلجۋىنىڭ ارقاسىندا 20-عا تاياۋ اۋىل تۇرعىندارى تۇراقتى جۇمىسپەن قامتىلىپ, اۋدان بيۋدجەتىنە 1 ملن تەڭگەگە جۋىق سالىق قۇيىلدى. بۇل اۋىلىمىزدىڭ الەۋمەتتىك-ەكونوميكالىق دامۋىنا وڭ سەرپىن بەرىپ, كاسىپكەرلىكتىڭ كەڭەيۋىنە ىقپال ەتۋدە», دەيدى جامبىل اۋىلدىق وكرۋگىنىڭ اكىمى رومان قويلىباەۆ.
وڭىردە 30 جىلدان استام ۋاقىت ۇزدىكسىز جۇمىس ىستەپ كەلە جاتقان ەكوورتالىقتىڭ جەتەكشىسى سارسەنحان بەرىكباەۆا تۋىپ-وسكەن ولكەسىنىڭ تاۋ-تاسى مەن قاراعاي-شىرشاسىن, ساف اۋا, ءمولدىر سۋىن تۋريزم كوزىنە اينالدىرۋدا تاباندىلىق تانىتىپ كەلەدى.
«تاۋەلسىزدىكتىڭ العاشقى جىلدارى وسى جەرگە كەلىپ, ءۇي تىگىپ, كىشىگىرىم شارۋاشىلىقپەن اينالىستىق. 2007 جىلدان باستاپ, جەردى جالعا الىپ, 2 قازاق ءۇي تىگىپ, كىسى كۇتىپ, تابىس تابۋدىڭ نەگىزى قالانا باستادى. ودان كەيىنگى 7 جىلدىقتا جارىق تارتىلىپ, اعاشتان قوناقۇي سالىنىپ, تاماقتانۋ ورنى جاسالىپ, بىرتىندەپ دامي باستاعان تۋريستىك ورتالىعىمىزعا كەلۋشىلەر قاتارى جىل وتكەن سايىن كوبەيىپ, بۇل سالاداعى تاجىريبەمىزدى شىڭداي ءتۇستى. وتاندىق ءتۋريزمدى دامىتۋعا مەملەكەت باسشىسى دا باسا نازار اۋدارىپ, جەرگىلىكتى بيلىكتىڭ قولداۋ ءبىلدىرۋىنىڭ ارقاسىندا ءىسىمىز ىلگەرىلەپ, جىراقتا بولساق تا باسەكەلەستىكتە ءباسىمىز جوعارى بولۋىنا بار كۇش-جىگەرىمىزدى, بىلىكتىلىگىمىزدى جۇمىلدىرۋدامىز. ناتيجەسىندە, بيىلعى جىلى ءبىر مەزەتتە 90 ادامدى قابىلداۋعا قاۋقارلى زاماناۋي ۇلگىدەگى قوناقۇي تۇرعىزىپ, پايدالانۋعا بەرىلدى. تاۋلى ايماققا كەلگەن تۋريستەر ەندى جايلى دا جارىق بولمەلەرگە ورنالاسىپ, الاڭسىز تىنىعۋىنا بولادى», دەيدى كاسىپكەر سارسەنحان اپا.
ايتقانىنداي-اق الماتى قالاسىنان 360 شاقىرىم قاشىقتىقتاعى تاۋ قويناۋىندا ورنالاسقان «شوعانساي – الىشەر» جاۋاپكەرشىلىگى شەكتەۋلى سەرىكتەستىگىنىڭ ەكوتۋريزمگە ارنالعان دەمالىس ورنى بيىل جاڭاشا سيپاتقا يە بولۋىمەن ەرەكشەلەنەدى. وندا جايلى قوناقۇيلەر بوي كوتەرىپ, جاز ماۋسىمىنا ارنالعان قازاق ۇيلەر تىگىلىپ, كەڭ دە جارىق تاماقتانۋ ورىندارى جۇمىسىن باستاعان. ەڭ باستىسى, دەنساۋلىعىن نىعايتۋدى كوزدەگەن دەمالۋشىلارعا «ساۋمال تەراپياسى» مەن ۇلتتىق تاعام تۇرلەرى ۇسىنىلادى.
سونىمەن قاتار تاۋ بوكتەرىندەگى دەمالىس ورنىندا زاماناۋي مونشا مەن باسسەين بارىنا ءبىرى سەنەر, ءبىرى سەنبەسى انىق. ال دەمالىسىن قىزىقتى وتكىزۋدى دىتتەگەن جاندارعا بيليارد, شاحمات, ناردا ويناۋعا ارنالعان ويىن زالدارى جاساقتالعان. بۇل وڭىرگە كەلگەن تۋريستەردىڭ باستى ارمانى – اتاقتى ءحانتاڭىرى شىڭىن كورۋى ءۇشىن اتپەن جانە جول تالعامايتىن كولىكپەن قارسى بەتتەگى تاۋعا شىعىپ, تاماشالاۋىن ۇيىمداستىرۋى ەكوورتالىقتىڭ ۇتقىرلىعى بولىپ تابىلادى.
تۋريستىك ورتالىق باسشىسى سارسەنحان اپانىڭ ايتۋىنشا, اتالعان دەمالىس ورنىنا ەلىمىزدىڭ تۇكپىر-تۇكپىرىنەن جانە الىس-جاقىن شەتەلدەردەن كەلەتىن تۇراقتى دەمالۋشىلار كوپ كورىنەدى.
الماتى وبلىسى
