جەر مەن جەسىر داۋىن جالعىز اۋىز سوزبەن شەشكەن بۇرىنعىلار ءاز جانىڭدى جازىلماستاي جارالايتىن قۇدىرەتتىڭ ءسوز ەكەندىگىن جانە سول جارادان ەمدەپ الاتىن كۇشتىڭ دە ءسوز ەكەندىگىن جاقسى بىلگەن. سوندىقتان دا سويلەۋ پارقىنا, قاي جەردە نەنى ايتىپ, نەنى ايتپاۋ كەرەكتىگىن دە سانامەن سالماقتاعان. وسىدان اتتاي قىرىق جىل بۇرىن جۋرناليستيكانىڭ جالىنا جارماسقاندا ءسوز ونەرىن ەركىن مەڭگەرگەن الدىڭعى بۋىن اعالارىمىز قولىمىزعا قالام ۇستاتىپ وتىرىپ, ءار سوزىڭە ايرىقشا ءمان بەر, استارىنا بۇككەن ماعىنا-مازمۇن كىمگە, قالاي اسەر ەتەتىندىگىن باعامدا, تاۋىپ ايتقان ءبىر سوزىڭمەن جانىن جادىراتاسىڭ, جاڭىلىپ ايتقان ءبىر سوزىڭمەن جانىن جارالايسىڭ دەۋشى ەدى.
وبلىستىق «كوكشەتاۋ پراۆداسى» گازەتىنە جازۋشى جانايدار مۋسين باسشىلىق جاساپ تۇرعان كەزدە رەداكتسيادا وتەتىن لەزدەمەلەردە ءار ماقالا بۇگە-شۇگىسىنە دەيىن تالدانىپ, جازعان ءسوزىمىزدىڭ ورىندى, ورىنسىزى قولمەن قويعانداي كورسەتىلىپ, تالداناتىن. ول ءبىر زامان ەدى. ءتىل ۇستارتقان ۇستاحانا ء«مۋسيننىڭ مەكتەبى» دەپ اتالاتىن. بۇگىنگى كۇنى ءبىز وسى ۇستانىمنىڭ ۇدەسىنەن شىعا الىپ ءجۇرمىز بە, الدە جوق پا؟ ماسەلەنىڭ ءمانىسى ءدال وسى جەردە جاتقان ءتارىزدى. ءسوز ۇستاعان ەل اعاسىنىڭ ءسوز ساپتاۋىنا قاراپ باعالايتىن ەدىك قوي. كوبىك ءسوز تۇيدەك-تۇيدەك. ىشىنەن كەيدە ءدانىن دە تابا الماي قالاسىڭ. ەلىنە قورعان, ۇرپاعىنا ۇلگى بولعان بۇرىنعىنىڭ ابىزدارىنىڭ ءسوزى ءتالىمدى تاربيە, ءورىستى ونەگە ەمەس پە ەدى. تۇتاس ءبىر مەكتەپ-تۇعىن. مىنە, سول كەزدە ءسوز قادىرى ادامنىڭ ءوز قادىرى بولىپ ەسەپتەلەتىن. ءسوزىن سالماقتاعان بىلايعى جۇرت ءسوزى قۇنسىزدىڭ ءوزى قۇنسىز دەر ەدى.
بۇگىنگى تاڭدا اقپاراتتار لەگى تەڭىزدىڭ اقباس تولقىنىنشا الاسۇرىپ-اق تۇر. بىلايعى جۇرت قاي ءسوزدىڭ شىن, قاي ءسوزدىڭ جالعان ەكەنىن باستان جاقتى ايىرعانداي ەتىپ انىقتاي المايتىنداي كۇيگە ءتۇستى. بۇل سوزگە دەگەن جاۋاپكەرشىلىكتىڭ ازايعاندىعىن كورسەتەتىن شىعار. ونىڭ ۇستىنە قۋاتى كەمىگەن, ساۋلەسى ازايعان.
ىلكى زاماندا كوش باستاعان كوسەمدەر, ەل باستاعان شەشەندەر ۇرپاعىن اس پەن تويدا اتالى سوزىمەن تاربيەلەگەن. بۇگىنگى اسقا, تويعا بارىپ كورىڭىزشى, اسىرا ماقتاۋ. وزگەنى ەمەس, ءوزىن. تىڭداعان ءتامام جۇرتتىڭ تۇگەلگە جۋىعى رەتسىز, ءجونسىز سوزگە ك ۇلىپ وتىرادى. قايران دا قايران ءسوزدىڭ قادىرى كەتكەندىگى سول ەمەس پە؟ ءسوزدى تەگىن دۇنيە كورىپ, ايتەۋىر سويلەگەننىڭ ءجونى وسى ەكەن دەپ قىزىل قۋىرداق قۋىرا بەرسە, تالعام ازايىپ, قادىر كەمىمەك.
ءسوز – تاربيە قۇرالى. اتا مەن اجەنىڭ ءاي دەگەنىن ۇعاتىن بالا بولسا, كانەكي. قوعامداعى كەيبىر كەلەڭسىز كورىنىسكە كۋا بولعان كەزدە جەتپەي جاتقان ولقىلىق وسى ماڭدا دەپ ويلايتىنىم بار. ارىدەن ويلاعان ارىداعى اتامىز «جىلى-جىلى سويلەسەڭ, جىلان ىنىنەن شىعادى» دەگەندى نەگە ايتتى دەيسىز. قازاق قوعامى ءۇشىن كۇردەلى ماسەلەگە اينالعان ۇرپاق تاربيەسىندە نەمەرەنىڭ باسىنان سيپاپ وتىرىپ جەتەسىنە حالقىمىزبەن بىرگە جاساسىپ كەلە جاتقان ۇلتتىق قۇندىلىقتاردى سىڭىرەتىن ۇلاعاتتى اعا بۋىننىڭ, اق ساقالدى اتا مەن اق جاۋلىقتى اجەنىڭ مەيىرىم تۇنعان ءجۇزىن اڭسايتىنىم بار كەي-كەيدە.
قۇنارسىز ءسوز كوبەيىپ كەتتى دەپ ىشىمىزدەن قان جىلاپ وتىرىپ, ءوزىمىز دە دىلمارسىعانىمىز جاراسپاس. ءسوز قادىرى تۋرالى اڭگىمەنىڭ ءتۇيىنىن وسى جەردەن قايىرعانىمىز ءجون.
